शुटिंगया इलं निसें हे बयबय् जुयाःच्वंगु ख्यालि जुजु मदनकृष्ण श्रेष्ठया सः व अभिनय दुगु नेपालभाषाया छपू म्ये यः मदन दाइया प्रिमियर लुभूया महाक्ष्मी ब्यांक्वेटय् जुल । म्येच्वमि आनन्द रत्न बज्राचार्यया च्वसा व अनिल तुलाधरं लसय् हनातःगु थुगु म्ये ‘यः मदन दाई’लय् निशा देशार व दिपा महर्जनया सः नं दु । नेपालभाषा ख्यःयापिं निम्ह लाेकंह्वाःपिं कलाकार भिंतुना जाेशी व राेजीना सुवालया लिसें मीरा डंगाेल व सरीता श्रेष्ठया नं अभिनय दुगु खः ।
म्युजिक भिडियो पितब्वज्या ज्याझ्वः कृष्णभक्त श्रेष्ठ (केबिएस लुभु) या सभानायःसुइ न्ह्याःगु खःसा जनकवि दुर्गालाल श्रेष्ठ मूपाहां कथं झायादीगु खः । ज्याझ्वलय् म्ये व म्युजिक भिडियोया कलाकार, प्राविधिक व ग्वाहालिमिपिन्त सुभाय् पौ नं देछाःगु खः । थुगु म्यूजिक भिडियो बालमुकुन्द प्रजापति व विश्वास बज्राचार्य जानाः निर्देशन यानातःगु खः । थुकथं हे थुगु म्युजिक भिडियोया सिनेम्याटोग्राफर, ड्रोन व सम्पादन लुभू वेभ म्यूजिक इन्ष्टिच्यूट एण्ड स्टुडियोया सैलेश श्रेष्ठ लुभुं यानादीगु खःसा मेकअप आर्टिष्ट उमेश पाण्डे खः ।
म्युजिक भिडियो पितब्वज्या ज्याझ्वलय् नेपालभाषा संगीत ख्यलय् ख्यालिजुजु मदनकृष्ण श्रेष्ठं आपालं योगदान यानादीगुया कदर स्वरुप वयकःया विषयलय् नं म्ये तयार याना वनेमाः धइगु विचाःकथं थुगु म्ये वयकःया व्यक्तित्वयात कःघाना च्वयागु खः धकाः म्येच्वमि आनन्द रत्न बज्राचार्यं कनादिल । थुगु म्यूजिक भिडियो निर्भान मिडिया नेपालया यूट्युब च्यानलपाखें सार्वजनिक जूगु खः।
ज्याझ्वलय् केबिएस प्रोडक्शन पाखें हे निर्माण जूगु ‘धौबजि’ नांयागु चिहा संकिपा नं पितब्वज्या जूगु खः । ज्याझ्वलय् मूपाहाँ जनकवि दुर्गालाल श्रेष्ठ, ख्यालिजुजु मदनकृष्ण श्रेष्ठ लगायत पितब्वज्या जूगु म्ये व म्युजिक भिडियोयात कया नेपालभाषाया न्हापांम्ह सिने पत्रकार विजयरत्न असंबरें व कलाकार यमन श्रेष्ठं नुगःखँ तःगु खः।
