नेपालभाषाया मनोरंजन ख्यलय् नेवाः म्यूजिक भिडियो आः सिनेप्लेक्सय् प्रिमियर यायेगु प्रचलन न्ह्यानाच्वंगु दु । नेपालभाषाया मनोरंजन ख्यलय् नेवाः कलाकारपिंसं नं सिनेप्लेक्सय् प्रिमियर याये खंगु यात छगू स्टारडम कथं नालेगु यानाः च्वं । ज्याझ्वलय् थी थी पाहांपिंसं म्यूजिक भिडियोया तारिफ यायेगु लिसें कलाकार, प्राविधिक व निर्देशकयात नेपाःया हे उत्कृष्ट कलाकर्मि कथं घोषणा यायेगु वा लापा थायेगु, थाकीगु माहौल अले ज्याझ्वः लिपा फोटोसेशन व समयबजिं नेवाः मनोरंजन ख्यःया माहौलयात छगू जीवन्तता बियाच्वंगु दु ।
प्रिमियर ज्याझ्वःया किपाः सामाजिक संजालय् बय्बय् जुइ । सकसिनं भिंतुना व बधाइया असंख्य मन्तुना च्वइ । तर गुलिं गुलिं म्ये ला फेसबुकय् गुुलि लाइक व शुभकामना वइ उलि भ्यूज नं युट्युबय् वइ मखु । ध्येबा खर्चयानां प्रिमियर याःसां थुकीया लिच्वः धाःसा युट्युबया भ्यूजय् खने मदु । थथे छाय् भ्यूज मवल धैगु चिन्तन झीत मदु । ५०औं हजार तका मल्याक्क प्रिमियरय् जक खर्च याःसां ५०हजार भ्यूज नं उगू म्येया युट्यु्बय् छाय् मवल धकाः झीसं बिचाः मयाना। तर गुलिंगुलिं म्ये धाःसा प्रिमियर वा छुं कथं प्रचार हे मयाःसां हजारौं लाखौंलय् भ्यूज वनाच्वनिं । उकिं झी गन चुके जुयाच्वन धैगु खँ झीसं वाः चायेकमाः ।
सिनेप्लेक्स प्रिमियर वा गनं रेष्टुरेन्टय् ज्याझ्वः यानां झीसं पिथनागु कृतिया भ्यूज युट्युबय् थहांवनाच्वंगु मदु । तर नं झीसं ज्याझ्वः यानां तुं च्वनागु दु । खःगु मखूगु तारिफ यानां तुं च्वना । झीसं यानागु ज्यां युट्युबया नेवाः भ्यूअर्सतय्त मथ्यू । सामाजिक संजालय् किपाः ब्वये खनां झी लय्ताः । छगू भर्चुअल संसार व भर्चुअल स्टारडमय् झी लिकुनाच्वना थें ताइ । तर अथे जक नं बिचाः यायेगु पाय्छि मखु । झीसं नेवाः म्यूजिक भिडियो निर्माण याये धुंकाः प्रिमियर तकं यायेगु ज्या न्ह्याके धुंकल तर झीसं प्रिमियरया निंतिं उचित दर्शक ल्यये मफूनी । अकसर झीसं प्रिमियरय् थःथितिपिंत हे सःताच्वनिं । तर झीसं थज्योगु ज्याझ्वलय् सःतेमाःगु धैगु हे सोसियल इन्फ्लुएन्सरतय्त खः । गुपिंनि लाखौंया संख्याय् फलोअर्सत दइ । गुपिसं उगु ज्याझ्वःया किपाः जक पोष्ट याःसां लाखौं प्रतिशतया छुं फलोअर्सं जक स्वःसां म्येया भ्यूज् आपा दइ तर झी धाःसां थःगु स्वार्थं च्वये वनां स्वये मफूनी ।
थौंया इलय् म्यूजिक भिडियो छगू विक्री योग्य कृतिया रूपय् वजारीकरण यानां वनेमाः । सामाजिक प्लाय्टफर्मय् चकनेत थःपिंके नं चकनेगु बिचाः वयेमाः । मखुसा सामाजिक संजालय् किपाः ब्वयेत बाहेक उगु ज्याझ्वःया छु्ं हे महत्व दइ मखु । झीगु मुख्य आज्जु धैगु हे थःगु कृति चकंकेगु खः ।
