नेपाःया संचार ख्यलय् थःगु हे मांभाषां कला, तजिलजि, संस्कार, सम्पादा संरक्षण या थीथी मुद्दा लिसें राष्ट्रिय अन्तराष्ट्रिय बुखँ प्रचार यायेगु अज्जुं न्ह्याकेगु ताःतुनां परिक्षण प्रशारण क्वचायेकाः नेपाः टिभीया औपचारिक उलेज्या जुल । थी थी राजनैतिक व्यक्तित्व, नेवाः न्ह्यलुवाः, नेवाः कलाकार लिसें भाषिक कार्यकताया तःधंगु हे जमघट यानां सानेपा स्थीत हेरिटेज ब्यांक्वेटय् तःजिक उलेज्या याःगु खः । ज्याझ्वलय् मू पाहाँ कथं यल महानगरपालिकाया प्रमुख चिरिबाबु महर्जनं त्वाः देवाय् मत च्याकाः उलेज्या यानादीगु खः ।
उलेज्या ज्याझ्वलय् नेपाः टिभिं प्रशारण जुयाःच्वंगु व जुइगु ज्याझ्वःया प्राेमाे न्ह्यब्वःगु खः । ज्याझ्वःलय् प्राेमाे मार्फत हे नेपाःटिभिया दुजः पिनिगु म्हसीका न्ह्यब्वःगु खः । ज्याझ्वलय् नेपाःटिभिया निर्देशक रामकृष्ण खड्गीं नेपाःया मूलधार संचार माध्यमय् नेवाःतय्गु बिषयलय् बुखँ पिदनीगु धैगु हे न्हूदँ खुन्हु जक खः, अले व नं देय्या प्रधानमन्त्री वइगु जुयाः जक हे जुगुलिं खः धकाः धयादील । उकिं नेवाःतय्गु मुद्दा ल्ह्वनेगु निंतिं संचार ख्यलय् धिसिलाक्क न्ह्यांवनेगु हे नेपाःटिभीया अज्जु खः धकाः कनादील ।
ज्याझ्वलय् थी थी राजनैतिक व्यक्तित्व कथं बागमति प्रदेशया माननीय हरिप्रभा खड्गी, अन्नपूर्ण मिडियाया नायः रामेश्वर थापा, गेदावरी नगरपालिकाया मेयर गजेन्द्र महर्जन, नेवाः न्ह्यलुवाः मल्ल के सुन्दर, जनकवि दुर्गालाल श्रेष्ठ, प्रा डा नरेशमान बज्राचार्य, संचारकःमि तिकाराम यात्री, ज्यापु समाज यलया तिर्थ राम महर्जन, बाैद्ध विहार संघया अध्यक्ष नानिकाजी शाक्य, किपू नगरपालिकाया उपमेयर शुभलक्ष्मी शाक्य, ख्यालि जुजु मदनकृष्ण श्रेष्ठं व यल महानगरपालिकाया मेयर चिरिबाबु महर्जनं भिंतुना देछानादीगु खः ।
ज्याझ्वलय् नेपाःतिभिया संचालक दिपेश शाक्यं नं नुगः खँ तयादीगु खःसा नेपाः टिभिया नायः राजेन्द्र शाक्यं नेवाः ख्यलय् नेवाःतय्गु तिभिया अवश्यकता खंगुलिं हे नेपाः टिभि न्ह्याकाःगु खँ तयाःदील लिसें थुगु टिभिया मू उद्देश्य हे नेवाः भाय् प्रचार खः धकाः धयादीगु दु ।
