आजु द्यःया आशिर्वाद

न्ह्यः खँ
नेपालभाषाया फिचर प्याखँ सिबें नेपालभाषाया शर्ट मूभी ख्यः यक्व गतिशिल जू । छखें नेपालभाषाया फिचर प्याखँया संख्यात्मक रूपं नं म्हो हे जक निर्माण जुयाच्वंगु दु सा नेपालभाषाया शर्टमूभी ख्यलय् धाःसा मद्दिक्क व थी थी ख्यःयात कःघानां शर्टमूभी निर्माण जुइगु याः । शर्ट मूभी वा प्याखँ निर्माणया खँय् नं राज्यया कुतः जुइबलय् व मजुइबलय् नं यक्व हे खँ पाः । स्थानीय सरकारया तिबः दइबलय् नं प्याखँया निर्माणय् राज्यया गुगु छाप लाइगु याः संघसंस्था थज्योगु ज्याखँ याइबलय् सिबें बिस्कं छाप लायेत ताः लाः । थज्योगु हे छगू लकसय् चिहाः संकिपाः निर्माण जुयाः ताः लाःगु शर्ट मूभी खः – आजु द्यः, बाघ भैरव ।
नेसं ११४०य् किपूया नगरपालिका पाखें नेवाः चिहाः संकिपाः धेंधेंबला कासाय् ल्यू सिरपाः त्याकेत लाःगा लागु शर्ट मूभी खः आजु द्यः बाघ भैरव । किपूया एतिहासिक देगः बागभैरव लिसे स्वानाच्वंगु किंबदन्तिइ दयेकातःगु थुगु शर्टमूभीया निर्देशक योवन शाक्य खः । योवन शाक्यया थ्वसिबें न्हापा नं आपलं शर्टमुभी पिदने धुंकुगु दु । नेपालभाषा ख्यलय् योवन शाक्यया म्हसिका नं छम्ह शर्ट फिल्म मेकर कथं हे दु । सुनां हे बिचाः मयाःगु विषयवस्तुइ हरर, थ्रीलर लिसें रोम्यान्टिक यानां थीथी जेनरेसनया शर्ट मुभी योवन शाक्यं दयेकातये धुंकुगु दु । हाकुगु पौ, स्वापू, स्वन्हु, नेवाः म्यूजियम लिसें मेमेगु नं आपलं हे शर्ट मूभी योवन शाक्यं निर्देशन याये धुंकुगु दु । तर योवन शाक्यं थःम्हं न्हापा यानाच्वंगु शर्ट मूभीसिबें बिस्कं विषय वस्तुया आजु द्यः बाघभैरव निर्देशन याःगु दु, गुगु संकिपा उगु धेंधेंबल्ला कासाय् ल्यू लायेत ताःलाःगु खः ।

बाखं व कलाकार
बाघ भैरवया बाखं लोक बाखं खः । लोकय् प्रचलित बाखं कथं छपुचः मस्त जंगलय् वनां च्वलेचा जः वनाच्वनीगु झ्वलय् मस्तय्सं म्हिता म्हिता च्वलेचा स्वयेत चायाम्ह धुं छम्ह दयेकी । चायाम्ह धुंयात म्ये तया बिइ धकाः हः माः वनिं । हः मालाः स्वः वइगु इलय् धाःसा च्वलेचा छम्ह नं दइ मखु तर उम्ह चायाम्ह धुंइ धाःसा च्वलेचिया हि किनाच्वनिं । गुकिं यानां छम्ह मचां धुँयात सरा बिइ । मस्तय्सं थःपिंसं चायाम्ह धुँ दयेका च्वलेचा फुक्कं धुँ नल धकाः कनिं तर मस्तय्गु खँ गामय् च्वंपिं पत्याः जुइमखु । तर मस्तय्गु सरालं पुनां उगु गामय् धुँ छम्ह हाः वइ । उम्ह हे चायाम्ह धुँ दुने भैलः द्यः दुबिनां च्वलेचा आहार यात धकाः देय्या तान्त्रिकं कनिं अले थुम्ह भैलद्यःयात सरा नं मुक्तयानां देय्या रक्षा यायेगु निंतिं भैलः द्यःयात धुँया रूपय् हे जात्रयानां बाघ भैरव जात्रा न्याकुगु धकाः प्याखँया बाखं दयेकातःगु दु ।

लोक बाखंयात हे हुबहू रूपं सिने पर्दाय् तया तःगु दु । लोक मान्यतायात हे थुगु प्याखनय् न्ह्यब्वयातःगु दु । चरित्र विशेषयात निर्माण मयाःसे छगू सामान्य परिवेशय् बाखंयात न्ह्याकातःगु दु । बाखंया परिवेशय् ओपनिंग सीनं तसकं प्रभावित याः । मस्तय्गु संवादं न्ह्याकातःगु थुगु प्याखनय् बाखंयात धायेथाय् मदयेक सल्ल न्ह्याकातःगु दु । बाखनय् उखेँ थुखें गनं हे मवंसे व हे तंपिं च्वलेचियाः जःखः जक हे न्ह्यानाच्वंगु दु । छपुचः परिवारया च्वलेचा जंगलय् रहस्यमय ढंगं तनेवं व हे च्वलेचा माः वनेगु झ्वलय् बाखं न्ह्यानाच्वंगु दु ।। कलाकार कथं अमन महर्जन, सरिता बज्राचार्य, राजेन्द्र महर्जन, विक्रम महर्जन लिसें मस्तय्गु अभिनय्लय् सिम्रिक श्रेष्ठ, लुनिभा खड्गी व आज्ञाश्री महर्जनया अभिनय तसकं सेल्ला ।

स्क्रीनप्ले व निर्देशन
आजु द्यः बाघ भैरवया स्क्रीन प्ले राज महर्जनं च्वयातःगु खः । राज महर्जन छम्ह स्क्रृप्ट च्वमि कथं नेपालभाषा संकिपा ख्यलय् नां दु । वय्कःया ह्याँगु हि थें जाःगु सशक्त बाखं, हाकुगु पौ थें थ्रिलर शर्ट मूभी पिदने धुंकुगु दु । थ्व हे झ्वलय् आजु द्यः बाघ भैरवया स्क्रीन प्ले राज महर्जनं च्वयातःगु दु । एतिहासिक बाखनय् दयेकातःगु आजु द्यः बाघ भैरव खः। उकथं हे योवन शाक्यं थ्व प्याखं निर्देशन यानातःगु दु । योवन शाक्यं शर्ट मुभी देयेकेगु विषय वस्तु रोमांचक व थ्रील दुथ्यानाच्वनेगु याः । थुगु शर्ट मूभीनं स्क्रीनप्ले च्वमि व निर्देशक जोडी छुं भचा रोमांच व अलौकिक शक्तिया बाखंयात हे न्ह्यब्वयातःगु दु । लोक बाखनय् विश्वास याइपिन्त थुगु प्याखं छगू मनोरंजनया सेल्लागु हे दसू जुयाःब्यूगु दु । कलाकारपिंत नं निर्देशकं थःगु नियन्त्रणय् तयातःगु खने दु । थुगु शर्ट मुभीया सिनेमेटोग्राफि कथं रविन डंगोल व योवन शाक्य दु । शर्ट मुभीया सेल्लाःगु पक्ष छगू सिनेमेटोग्राफि नं जुयाच्वंगु दु । फ्रेमिंगयात ध्यानय् तयाः हरेक शट कयाःतःगु दु । सम्पादनय् धाःसा अझ भचा बांलाके फइगु थाय् खने दु । योवन शाक्य स्वयमं हे सम्पादन यानातःगु दु । मस्तय्गु दृष्य माःगु सिबें भचा ताःहाकः जुयाच्वंगु तायाः वइ । प्याखँयात छगू डार्क टेक्सचर बियाः तनावं जाःगु वातावरण क्यनेत स्वयाःच्वंगु दु । सकलें हे तनावय् दुपिं कथं क्यनातःगु दु ।

आलोचना
आलोचनाया ल्याखं थुगु शर्ट मूभीयात धायेगु खःसा अझ भचा बांलाके फइगु थाय् दुगु खः, यद्यपि थुगु प्याखँ छगू सेल्लाःगु व न्हाप लाःगु हे प्याखँ खः । थुकी अन्यथा रूपं स्वयेमाःगु मखु । बाखंया ल्याखं थ्व छगू लोकबाखं वा किम्बदन्ति जूगुलिं थुकियात छगू लोकबाखंया रूपय् अलौकिक यानां हे क्यनेगु सिबें नं छगू इतिहास थें याना क्यनेगु कुतः जुयाच्वंगु दु । लोकबाखनय् चायाम्ह धुँं नं च्वलेचा नये फइ । छगू लोकबाखं थें क्यनेगु खःसा सुत्रधार वा तेश्रो पुरुष कथं क्यने फुसा अझ झन बांलाइगु जुइ । यथार्थ परक रूपं क्यनेगु इलय् थ्व हे इतिहास खः थें जुइ । थथे इतिहास थें याना क्यनेगु खःसा थुगु बाखंया ई नं कितान यानां वा टाइम लाइन क्यनेगु आवश्यक जू । अले जक थुकियात एतिहासिक कथं काये फइ ।
धुँ च्वलेचा नल धकाः धायेगु इलय् नं दक्वं च्वलेचा धुँ हे नःगु खः कि मखु धैगु नं सिइ मदु । धुँ च्वलेचिया हि छफुति हे बँय् मलाक्क नल धकाः बाखनय् धाये छिं तर प्याखनय् क्यने मछिं । थौंकन्हे झीसं नेशनल जोग्राफी व जनावर सम्बन्धि आपलं च्यानल स्वयाः धुँ गथे यानां शिकार याना नइ धकाः स्वयागु दु । च्वलेचा तं थाय् धुँ नःगु खःसा अन धुँया म्हुतिइ जक मखुसे बेँय् नं हि किगु वा संघर्षया छुं चिं दयेमाःगु । तर च्वलेचिया छुं हे चिं मदु । थ्व हे कारण बाखँया स्कृनप्ले न्ह्याकेगु इलय् थज्योगु खँ नं वाः चायेके माः ।
शर्टमूभीस चायाःम्ह धुँ बाहेक मेम्ह धुँ क्यनातःगु मदु । धुँया सः दु तर धुँ क्येने मफू । बजेटया अभाव नं जुइफु अले झीके टेक्निकल टिमया कमि नं जुइ फु । तर धुँ हे मक्यंसें धुँ च्वलेचा नयाः जात्रा न्यायेकल धैगु प्याखनं छगू कथंया अन्धविश्वासयात नं तिबः बियाच्वनिं ।
निश्चित रूपं हे प्याखँया ई भचा ताःहाकः वा टाइम ल्याप्सया आवश्यकता थुगु प्याखँया माग खः । छन्हु न्ह्यः धुँ च्वलेचा नःगु व वहे चान्हे धुँ हाःगु अले कन्हे खुन्हु हे आचाःजुं तन्त्र साधनां भैलःद्यःयात मचां सरा ब्यूगु सिइकी । थुगु घटनाक्रमय् छुं भचा टाइम ल्याप्स क्यंगु जुसाः अझं नं पत्याः याये बहजुइगु परिस्थीति न्ह्यब्वये फइगु खः ।

मेमेगु खँ
छगू निश्चित श्रोत साधन मुंकाः थःथःगु व्यक्तिगत कुतःलय् नेपालभाषाया मनोरंजन ख्यः म्वानाच्वंगु दु । नेवाःतय्गु पारम्परिक व लोक बाखनय् आपलं हे नेवाः संकिपाः निर्माण जुयाच्वंगु दु । झीगु ख्यलय् अझंनं आपलं हे लौकिक व अलौकिक बाखंत दनि गुकी झीसं शर्ट मुभी वा फिचर फिल्म हे दयेके नं फइ । नेवाः प्याखँयात सकस्यां हे तिबः बिइमाःगु सकसिगु हे जिम्मेवारी खः । सामाजिक संजालय् थुगु प्याखँया भ्यूज यक्व मदुनिं तर थुगु प्याखँया प्रचार प्रसार जूगु खने मदु । संकिपाः बांलानानं भ्यूज आपा मदुगु धैगु संकिपाःया वजार व्यवस्थापनय् ध्यान मवंगु तायेके माः । प्याखँ जक निर्माण यायेगु तर थुगु प्याखँ गथे च्वं धकाः क्येने माःपिं मनूतय्त क्यने मफइगु नं झीगु हे व्यवस्थापनया कमजोरी खः । प्याखँ सामाजिक संजालय् तये धुंकाः स्वकुमितक्क गथे यानां थ्यंकेगु धैगु योजना नं अति आवश्यक जु ।
बाघ भैरब प्याखं छगूलोकथ्या बाखं खःसा थुकियात हे ऐतिहासिक धकाः जात्रानापं किपुलिइ जुइगु याः । थ्व पौराणिक व लोककथ्यायत संरक्षण स्थानीय निकायपाखें नंजुइमाःगु स्थिति दुसा छम्ह प्याखं च्वमि व स्यनामिं तयार यानातःगु शतर्टमू्रभियात हे फुक्कं खः धायेफइगु स्थिति नं मदयेफु । थुज्वःगु बाखंयात नखः जात्रा धकाः हनाच्वंपिपाखें नं समर्थन वा विमतिया आवश्यक दयाच्वनी सा सिनेमा दयेकसपिन्सं नं थुज्वःगु लोकमान्तयात स्थानीय मनूतय्सं गुकथं कयाच्वंगु दु धयागु खँय् ध्यान बिइमाः ।
लोक कथनयात सिनेमाय् हयाः प्रचार प्रसार यायेगु ज्या बांलांगु खःसां आधुनिक समाज दुने थुकिया प्रतिक्रिया नं दुवाले फयेमाः ।