योगदान शब्द गुलि अःपुक्क झीसं छ्यलाच्वंगु दइ उलि हे थुगु शब्दया अर्थ दुग्यं । सुं छम्ह ब्यक्तिया योगदान थ्व ख्यलय् थुलि दु, उलि दु धकाः सम्मान कार्यक्रमय् न्ववायेगु याइ तर नं वास्तवय् उम्ह मनूया धात्थें हे छुं योगदान दु वा मदु धकाः मूल्यांकन याये अःपू मजू । सुं मनुखं जीवनकाःछि हे नेपालभाषा ख्यलय् योगदान बियाच्वंगु दइ सा सुं मनू ताः ई मदुसां नं उम्ह मनुखं प्रभावकारी ज्याखँ यात धकाः मूल्यांकन यानाच्वंगु दइ तर जबतक झीसं सुं छम्ह मनूया मूल्यांकन यायेगु बांलाक्क सइ मखु उम्ह मनूया योगदानया कदर नं जुइमखु ।
अःपुक्क हे धायेगु खःसा गुम्ह मनूया योगदान अर्थात वं याःगु ज्याखँया प्रभाव समाजय् लाइ मखु वा धाये यदि उम्ह मनुखं याःगु ज्यायात चट्ट मिंक लिकाना छ्वयाः समाजय् ब्वलनाच्वंगु परिस्थीति परिकल्पना याये हे मफइगु जुल धाःसा जक उम्ह मनूया ज्याखँयात योगदान धकाः धाये छिनि । यदि उम्ह मनुखं याःगु ज्यां समाजय् छुं कथंया प्रभाव हे मलाइगु जुल धाःसा उकियात योगदान धकाः नाले मछिं । योगदानया छगू नमुनाकथं स्वये कि मातृभाषां शिक्षा बिल धाःसा मस्तय्सं याकनं सयेका कायेफइ धकाः मास्तर जगत सुन्दर मल्लं छगू अभियान न्ह्याकल, लिपा व हे नामं स्कुल नं चायेकल । यदि मास्टर जगत सुन्दर मल्लं थुगु अभियान मन्ह्याकूगु जुसा थौं मातृभासं ब्वंकिगु ब्वनेकुथि चायेकेत अझं लिबाइगु जुइ वा मातृभाषाया स्कुल चायेकेत गुलि प्रभाव एवं बातावरण आः ब्वलनाच्वंगु दु उलि वातावरण वा थ्व स्थीति थ्यंकेगु निंतिं अझं ई काइगु जुइ ।
थ्व हे परिवेशयात नालेगु खःसा थौंया इलय् आपलं हे कलाकारपिं नेपालभाषाया मनोरंजन ख्यलय् नं खनेदयाच्वंगु दु । थःगु प्राइम ई क्वचायेकाः नं संगीत व एक्टिंग याये कथं थी थी म्येहालाः वा म्यूजिक भिडियोस अभिनय यानां च्वंगु हे दु । संगीत वा कलाकारिता ख्यः छगू साधना खः । संगीतय् वा मनोरंजन ख्यलय् थःगु रिटायर्ड लाइफ पाये धकाः वःपिं नं आपलं हे कलाकारपिं खनेदयाच्वंगु दु । म्ये हालेत सः मदये धुंकल सा अभिनय् यायेत छुं न्हूगु सयेकाः कायेगु ई मदये धुंकल, साधना मदये धुंकल । शौख पुरा यायेगु खःसा छपू म्ये हालां वा अभिनय यानां छु्ं मपाः तर थःके क्षमता हे मदयेक थथे लाक्व पाक्व अभिनय यानां वा म्ये हालाः नेपालभाषा ख्यलय् योगदान जुइ मखु । मात्र जगहसाइ जुइ ।
मनोरंजन ख्यलय् न्ह्यालाः नं थःगु जीवनया प्राइम ई बिइमफूगु धैगु छगू दुखद् स्वप्न खः । तर अथे धायेवं थौं ई वने धुंकाः ईयात न्याय याये मफूगु भुमिका म्हितेगु नं पाय्छि मखु । बरु थःगु प्राइम इलय् थः गथे मनोरंजन ख्यः पाखें बंचित जुइ माल, अथे हे थौंया पुस्तायात छगू सहि मार्ग निर्देशन बियाः छम्ह प्रोड्युसरया भुमिका म्हितेगु खः ला ? बलिउडय् नं स्वल धाःसा आपलं अज्योपिं प्रड्युसर लिसें प्रोमोटरपिं दु गुपिंसं यानां न्हूगु पुस्ताया कलाकारपिंत आपलं अवसर चुलानाच्वंगु दु ।
मनोरंजन ख्यलय् स्वानाच्वनेगु अले छगू सम्मानया पद ग्रहण यानाच्वनेगु छगू अवसर बारे सकस्यां चिन्तन याये आवश्यक जुइ धुंकल लिसें सल्लाह सुझावया रूपय् शुभचिन्तकपिंसं नं उचित सल्लाह बिइ आवश्यक जु ।
