न्ह्यः खँ
नेपालभाषाया सांगीतिक ख्यलय् छगू स्यल्लाःगु कथंया कोलाय्बाेरशन जुइगु तसकं म्हो । अकसर नेपालभाषाया म्ये वा म्यूजिक भिडियोलय् छम्ह कलाकार वा छम्ह संगीतकार वा छम्ह कम्पोजरया भारय् लानाच्वनिं गुकिं यानां अकसर नेपालभाषाया म्ये औसत वा औसत सिबें म्हो हे जक जुयाःच्वनिं । गुब्लें सकलें हे स्येलाःपिं कलाकार दयाः नं म्ये ताः मलागु नं जुयाःच्वं । थज्योगु हे फुक्कं कथंया परिस्थीतियात हित्तुहिनां पिदंगु छपू न्हूगु म्ये खः खेलु इताः । म्ये आबद्ध जुपिं कलाकार पिनिगु जक नां न्ह्यब्वःसां नेपालभाषा सांगीतिक ख्यःया छगू अतिविशेष कोलाय्ब्रेशन कथं खने दु । थुगु म्ये दकलय् न्हापां म्ये हालातःपिं कथं जेम्स प्रधान व निशा देशारया युगल सः दु । म्ये च्वःम्ह व भिडियो निर्देशन याःम्ह विश्वास वज्राचार्य, कम्पोजर निल शाक्य, संगीत संयोजन जीवित जल्मी, रेकर्डिस्ट सुरेन्द्र श्रेष्ठ व मास्टरिंग फिरोज बज्राचार्यया कोलाय्बाेरशन जुयाःच्वंगु दु । नेपालभाषाया सांगीतिक ख्यलय् थुकथंया कोलाय्बाेरशन छगू कथंया विशेष संगोग कथं नालेमाः ।
खेलु ईता – अडियो
खेलु ईताः जेम्स प्रधानया सलय् दकलय् लिपांगु म्ये खः । थ्व सिबें न्ह्यः जेम्स प्रधानं नेवाः म्ये गुब्ले हाःगु खः धकाः इतिहासया हे पाना पुइके माःथें जुइ धुंकल । जेम्स प्रधानं धेधेचुल पासा २०५५ सालय् हाले धुंकाः २०८० साल अथे धैगु २५ बर्ष लिपा तिनि नेपालभाषाया म्ये हाःगु ताये दत । २५ बर्षतक्क नं नेवाः म्ये महाःसे च्वनेमाःगु कारण छाय् जुइ थें ? छाय्की खेलुईता म्येया छगू सेल्लाःगु पक्ष धैगु हे जेम्स प्रधानया सः जुयाःच्वंगु दु । छाय्सां नेवाः म्ये थुलि बोल्ड सः लिसें मेलोडी ल्वाःकज्याःगु तसकं हे दुर्लभ संयोग खः । थुकिइ तुं हे निशा देशारया सलं यक्व हे कमप्लिमेन्ट बियाःच्वंगु दु । निशा देशार थाैंया इलय् नेपाः न्यंक हे लाेकंह्वानाच्वंम्ह म्ये हालामि खः ।
म्येया संगीत संयोजनय् जीवित् जल्मिं गुगु १९५० व १९६०या दशकया हिन्दी सिनेमाया सवाः बियाःच्वंगु दु व तसकं हे बिस्कं सवाः तायेदु । जिवित जल्मीया थुगु कथंया सवाः आः तक्क न्यनेमदुनि । निल शाक्यया कम्पोज नं तसकं हे सरल लिसें तसकं हे मेलोडीं जायाःच्वंगु दु । म्येच्वमि कथं विश्वास वज्राचार्यं नं थःगु ल्हाः न्ह्याकाःच्वंगु दु । न्हूगु सोच दुम्ह विश्वास बज्राचार्यया च्वसाय् न्हू न्हूगु मोटिफ व शब्द लुयाःच्वंगु खंके फइ । गथेकि खेलु इताः । खेलु इताः शब्द थौं तक्क नं छगू सांस्कृतिक मोतिफ् या रुपय् जक हे छ्यलाबुलाः जुयाःच्वंगु दु । तर नं थुगु खँग्वःयात छपू रोम्यान्टिक म्येय् दयेकाः छय्ले फइ धैगु खँ तसकं हे रचनात्मक बिचारया हे उपज कथं नाले माः । नेपालभाषा ख्यलय् न्हू न्हूपिं म्ये च्वमिया आगमन जुयाच्वन धैगु संकेत खः । थ्व सिबें न्ह्यः नं विश्वास बज्राचार्यया च्वसाय् सचिका चिनां बोलाया म्ये पिदने धुंकुगु दु गुकिया भ्यूज नं १ मिलियन पुले धुंकुगु दु ।
खेलु ईता – भिडियो
नेवाः म्येया क्लाय्सिक स्वरुप धकाः न्ह्याब्लें हे पुलांगु छेँय् व हाकुपतासि अले भचा रेट्रो लुकय् प्रिन्टेड सर्ट व बेलि बटम पाइन्ट न्ह्याना रक एण्ड रोल स्टेप व ट्विस्ट डान्सं पिहांवनां छगू सिनेमेटिक न्ह्यब्वया खेलु ईताःया भिडियो जुयाःच्वंगु दु । तसकं हे ताजा कन्सेप्टया थुगु भिडियो खनेदु । कलाकारय् मनोज महर्जन व रोजिना सुवाल लिसे जेम्स प्रधान व निशा देशारया नं स्क्रिन प्रिजेन्स दु । सांगितिक नृत्य कथं रोहिया महर्जनया कोरियोग्राफि दु । क्लाय्सिक हलिउड व बलिउडया किचः खनेदुगु कोरियोग्राफि नेपालभाषा ख्यलय् तसकं हे रिफ्रेसिंग जु । संगीत कथं नृत्यया लागी मनोज महर्जनयात तसकं बांलाक्क छ्यलातःगु दु । नेपालभाषा ख्यलय् छम्ह प्याखं ल्हुइ सःम्ह व अभिनय नं याये फूम्ह कलाकार कथं मनोज महर्जन खने दः वःगु दु । उकथंया रोजिना सुवालयात छम्ह डान्सया ल्वय्क न्ह्यब्वयाःतःगु दु । छायाँकनय् योवन शाक्यया फ्रेमिंग यइपुसे च्वं । सम्पादनय सामान्य नेवाः म्ये सिबें यइपुक्क यानातःगु दु ।स्पिल्ट स्क्रिन छ्यलाः संगीतया धुनय् म्हिताःतःगु छगू न्हूगु यइपुगु प्रयोग बिजन राज बज्राचार्यं यानातःगु दु । व हे कथं भि एफ एक्सय् नेपाःया पुलांगु थाय्त छ्यलातःगुलिइं छगू न्हूगु हे संसारय् लसकुस यानाच्वंगु भिडियो स्वयाःच्वंपिंसं वाःचायेकी ।
आलोचना
सामान्य रुपं खेलु ईता म्येया आलोचना यायेगु थाय् मालेत थाकु । अथेनं थुगु म्येयात छगू पर्फेक्ट म्येया मिखां स्वयेगु खःसा थुकी छुं छुं खँयात कयाः कुँ खिनेथाय् लुइके फइ । गथेकी शब्दय् खेलु ईताया मत च्याके थें धैगु भावार्थ वा झीगु चलन चल्तिइ खेलु ईता च्याके थें धाःसा गाः । झीसं खेलु इताःया मत याना च्याकी मखु । शाब्दीक रुपं थुकी छुं भचा कसावट हयेफइगु अवस्था दुगु खः ।
म्येया परिवेश झीसं हलिउड व बलिउडया १९५० निसें १९६०या दशक कथं खने दु । मनोज महर्जनया स्कृन प्रिजेन्सय् बलिउड कलाकार राज कपुरया छवि थें खने दु । थुकीयात आलोचनाया मिखां स्वये माःगु अवस्था मदु तर रोजिनाया ड्रेसअप गनं गनं थौंया मोर्डन ड्रेस जुयाःच्वंगु दु । गुकिंयानां थुगु म्ये विस्कं विस्कं कालखण्डया थें खने दु । व हे कथं रोजीनाया मेकअपय् व हयेर स्टाइलय् क्लाय्सिक टच् नं बिइफइगु अवस्था दुगु खः ।
नेपाःया सिनेमा भारतीय सिनेमा सिबें यक्व हे लिपाः पिदंगु खः । भारतय् गुगु रुपं सिनेमाया विकास जुल व हे अनुरुप नेपालय् मजू लिसें १९५० वा १९६०या गुगु फेशन व बलिउड समाज दुगु खः व स्थीति नेवाः सिने जगतय् गब्लें मब्वलं । थ्व हे कारण थुगु भिडियो स्वयेगु इलय् नेवाः हे परिवेश थिंक नालेगु सिबें छगू कथंया कल्पना जक हे जुयाःच्वंगु खः ।
खेलु ईता म्येया मेगु छगू पक्ष कुलेमाःगु धैगु थुकीया क्यारेक्टरर्सया स्वापू खः । म्येय् प्यम्ह मू क्यारेक्टर न्ह्यब्वयातःगु दु तर प्यम्हेसिया छु स्वापू दु धैगु प्रष्ट मजू । म्येय् क्यारेक्टर स्टाय्ब्लिसमेन्ट पाखे भचा ध्यान मवंगु कारण थुगु म्ये छगू म्यूजिक भिडियो सिबें नं छगू प्याखँयात स्वानाच्वंगु म्ये थें जक जुयाः च्वंगु दु ।
लिखँ
खेलु इता म्ये नेपालभाषा ख्यलय् छगू ह्युपाःया संकेत खः । नेपालभाषाया मनोरंजन ख्यलय् दुपिं दिग्गज पिनिगु जमधट खः । थौंया इलय् याकःबाकःया कुतलं मगाय् धुंकल । नेपालभाषाया मनोरंजन ख्यलय् थुकथं हे थी थी व्यक्तित्वपिनिगु जमघटं छगू उत्कृष्ट नमुना तयार जुइ धैगु दसू खः । म्ये उत्कृष्ट जुयाः नं दक्व हे पक्ष सलल न्ह्यां वं । थुगु म्येयात गुलि फु उलि प्रचार यायेगु नं झीगु हे दायित्व खः ।
