थःगु लजगाःया कारण नेवाः संगीत पाखें तापानाच्वंम्ह इन्जिनियर भुपेन्द्रमान शाक्यया सलय् म्हगसय् वयाः बाेलया म्येया प्रिमियर सिटिसि मलय् जुल । प्रिमियर ज्याझ्वलय् मूपाहां इन्जिनियर बालसुन्दर मल्ल भिडियाे स्वयाः पलख भावुक हे जुयाःदिल । छाय्कि थुगु म्यूजिक भिडियाे सत्य घटनाया लिधंसाय् निर्माण यानातःगु धकाः नं च्वयातःगु दु ।
थःगु ज्याया कारण निम्ह तिपू बायाःच्वने मालीगु व अन्तत ताः इ लिपा हे जक नापलाये खनिगु म्युजिक भिडियाेया बाखं इन्जिनियर भुपेन्द्रमान शाक्य व वय्कया तिरीमय्जु अन्नपुर्ण तुलाधर शाक्यया जीवनय् आधारीत बाखँ खः गुकि वय्कःपिनिगु हे अभिनय दुसा कलकार अमाेघवीर बज्राचार्य व सुमि मानन्धर, संकिपाः श्रेष्ठ व उजय शाहीं नं साथ बियाःच्वंगु दु । थुगु हे भिडियाे यात विश्वास बज्राचार्यं निर्देशन यानातःगु खःसा, आकृष्ट शाक्यं सिनेमेटाेग्राफी व सम्पादन यानातःगु दु अले काेरियाेग्राफी राेहिया महर्जनं यानातःगु दु ।
थुगु म्ये पेजथ्रीया सम्पादक दर्शनवीर शाक्यं च्वयातःगु खः । म्ये सुरेन्द्र श्रेष्ठं लसय् हनां संगीत संयाेजन नं यानादीगु खःसा रत्न शाेभा महर्जनं आलाप हालातःगु दु ।
नेपालभाषा व संगीत ख्यःया वरिष्ठ व्यक्तित्वपिं केशव राज राजभण्डारी, जुजुकाजी रंजित, संगीता शाक्य, नरेशवीर शाक्य, विजयरत्न असंबरे, राजेन्द्रमान शाक्य, सुरेन्द्र तुलाधर, रामकृष्ण खड्गी, रवि साय्मि लगायत अन्य व्यक्तित्वपिनिगु नं ज्याझ्वलय् उपस्थीति दुगु खः ।
ज्याझ्वलय् म्येच्वमि दर्शनवीर शाक्यं थुगु म्येया विषयलय् थःगु अनुभव कनादीगु खःसा, संगीतकार सुरेन्द्र श्रेष्ठं म्ये निर्माणया अनुभव कनादीगु खः । अथे हे निर्देशक विश्वास बज्राचार्यं भिडियाे निर्माणया अनुभव न्यंकादीगु खः अले पाहां विजयरत्न असंबरें म्येया बःचाहाकलं विश्लेष्ण यानादील । पाहांपिं रामकृष्ण खड्गी, रवि साय्मि व सुरेन्द्र तुलाधरपिंसं नं नुगः खँ तःगु खः ।
