नेपालभाषाया लोकंह्वाःम्ह कलाकार एवं मोडल आराध्या लक्ष्मी खड्गीं गायन क्षेत्रय् नं डेब्यू याःगु दु । किर्तिपुर सिनेप्लेक्सय् थौं आराध्या लक्ष्मी खड्गीया सलय् मतिना देशय् बोलया म्येया प्रिमियर जूगु खः । राजेश मान सिंहया च्वसाय्, विरेन शाक्यया संगीतय् मतिनाया देशय् म्ये पाखें डेब्यू याःगु खः । म्यूजिक भिडियोलय् आराध्या लिसें विजय मान सिंहया जोडी दु । थुगु म्येया छायाँकन व सम्पादन सोहन मानन्धरं याःगु खःसा निर्देशन राजेश मान सिंहं याःगु खः ।
ज्याझ्वलय् बिजय मान सिंहया सलय् भन तिमिलाइ बोलया नेपाली भाय्या म्ये नं प्रिमियर जूगु खः । दिपक श्रेष्ठया निर्देशनय् तयार जूगु थुगु भिडियोलय् बिजय मान सिंहयात नन्दिता केसिं साथ बियाःच्वंगु दु् । थुगु म्येय् च्वसा, संगीत व सः बिजय मान सिंहया हे दु ।
ज्याझ्वलय् मू पाहाँ कथं वरिष्ठ हास्य अभिनेता व ख्यालि जुजु मदनकृष्ण श्रेष्ठ झायादीगु खःसा पाहाँ कथं नरायण देवी श्रेष्ठ, जुजुकाजी रंजित, प्रकाश साय्मि, विजयरत्न असंबरे झायादीगु खः ।
ज्याझ्वलय् आराध्या लक्ष्मी खड्गीया मां सुर्ज लक्ष्मी खड्गीं लसकुस यानादीगु खः । म्येया प्रिमियर न्ह्यः आराध्या व बिजयया बःचाहाकःगु नृत्य नं न्ह्यब्वःगु खःसा आराध्यां हे लाइभ म्ये नं हालाः न्यंकुगु खः । ज्याझ्वः बिजयमान सिंहया सभापतित्वय् जूगु खः ।
