गन वन हिराेइन त ?

थगुने व नगुने कोरोनाया कारणं संसारया फिल्म ख्यलय् छगू शून्यता वःगु खःसा आः व शून्यता चिला वना हाकनं फिल्मख्यः बाँलाक हे न्ह्याना च्वंगु दु । थ्व शून्यया ई दुने नेवाः फिल्मख्यः नं शून्य हे जुउगु खः । आः वया तिनि न्हून्हूगु गतिविधि खनेदयाः वःगु खःसा थ्व शून्य ईया दुने गुलिखे नेवाः स्टारत फिल्म ख्यलं हे तापाना वन धइगु छगू चिन्ताया खँ जुया ब्गुयू दु । फिल्मया हलिमय् छगू इलय् अतिकं सकृय जुया च्वंपिं स्टारत आकाझाकां फिल्मया पर्दां तापाना वनिबले व तापाना च्वनिबले इमित कया च्यूता ब्वलनिगु स्वाभाविक हे खः । नेवाः संकिपाया ख्यलय् छगू इलय् अथेहे व्यस्तपिं तर थौंकन्हे फिल्मया पर्दां तापाना च्वंपिं कलाकारत यक्वः हे दु । उकी मध्ये छम्ह खः आशिष्मा नकःमि ।

आशिष्मा नकःमि
आशिष्माया आःतक पिदंगु लिपांगु नेवाः फिल्म धइगु “कर्म” खः । वसिबें न्ह्यः आशिष्माया कमब्याक फिल्मया रूपय् “रश्मी” नांयागु छगू फिल्म म्हीतल । थ्व प्यदँन्यादँति न्ह्यःया खँ खः, तर उगु फिल्म नं आः तक पिहाँ वय्मफुनि । अनं लिपा वय्क मय्जु थःम्हेसिन “लाखे भाजु” निर्माण याःगु खःसा शुटिंग क्वचायेधुंकुगु थ्व फिल्मया मेगु खँ छुं सीमदुनि । “लाखे भाजु” फिल्मय् नामय् विवाद वःबले आः थ्व फिल्मया नां “लाखे आजु” धकाः तःगु दु । स्वदँति न्ह्यः इहिपा याःम्ह आशिष्माया जहानया बसाई अमेरिकाय् जुगुलिं व नं थौंकन्हे उखे हे च्वना च्वंगु दु । अथे जुयाः आशिष्मा नकःमियात याकनं हे फिल्मया पर्दाय् स्वय्खनि धाय् मछिंंनि ।

मेलिना मानन्धर
“बांला मय्जु” फिल्मय् हिरोईन् जुया नेवाः फिल्मख्यलय् ईण्ट्रि जूम्ह मेलिना मानन्धर नेपाःया हे फिल्म ख्यःया छम्ह नांजाम्ह हिरोईन् खः । आपालं खस नेपाली भाय्या फिल्म म्हिता लोकंह्वाय् धुंका तिनि नेवाः भाय्या फिल्म म्हितूम्ह मेलिना मानन्धरं “पटाचारा” व “कृषा गौतमी” थेंज्यागु निगु बुद्धकालिन बाखनय् आधारित नेवाः फिल्म व “धम्मवति” व “बांला मय्जु” थेंज्यागु निगु समकालिन नेवाः फिल्म नं म्हितल । “पटाचारा” व “बांला मय्जु” पाखें निक्वः तक राष्ट्रिय पुरस्कार नं त्याकेत ताःलाम्ह जुलं नं थौंकन्हे वय्क मय्जु नं जहान मुकेश ढकाल व मचालिसे अमेरिकाय् हे च्वना च्वंगुृ दु ।

भिन्तुना जोशी
“बांला मय्जु” या मेम्ह छम्ह हिरोईन् भिन्तुना जोशी नेवाः फिल्म ख्यःया छम्ह साप हे लोकंह्वाम्ह हिरोईन् खः । आपालं नेवाः फिल्म म्हितेधुंकूम्ह भिन्तुना जोशीया आः तक पिहाँ वःगु लिपांगु फिल्म “मनू म्हसीकी” व “स्वय्नगु” धुंका “मू मदुगु जिन्दगी” खः । थ्व स्वंगू फिल्मय् नं “मनू म्हसीकी” या क्यनेज्या उलि बांलाक्क जूगु मदुनिसा “मू मदुगु जिन्दगी” या क्यनेज्या उलि जूगु मदु । दँबदँ न्ह्यःतक विशेष याना विदेशया यात्राय् जक नुगः क्वसाय्का वया च्वंम्ह भिन्तुना जोशींं म्हितीगु धका क्वछिना तःगु फिल्म “मां” खः । तर थ्व फिल्मया ज्या न्ह्यागु मदुनि ।

हिसिला महर्जन
हिसिला महर्जन “राजमति” फिल्मया मू नकिं खः । थुगु फिल्मय् हिसिलां राजमतिया मू भुमिका म्हितूगु खः । राजमति लिपा हिसिलाया “चाण्डालिका” पिहांवःगु खः । थ्वयां यक्वः लिपा नेवाः फिल्मय् कमब्याक कथं “त्याग” म्हितलसा “तुयुमति” नांयागु फिल्मय् छगू चिकिचा धंगु रोल जक म्हितल । अले न्याद खुदँँति न्ह्यःव कीपुया इतिहास दूगु खस नेपाली भाय्या फिल्म “कीर्तिपुर ः द लिजेण्ड अफ कीर्तिलक्ष्मी” म्हितल । तर थ्व फिल्म धुंका हिसिलां छुं छुं म्युजिक भिडियो बाहेकं मेगु फिल्म म्हितुगु मदुनि ।

रेश्मी महर्जन
“भिन्तुना” नांयागु छगू अतिकं च्वछाय् बहगु नेवाः फिल्मया छम्ह हिरोइन खः रेश्मी महर्जन । रेश्मीं लिपा वना “महारानी”, “इहिपा” “तिनतिकः महाबिकः” थेज्यागु फिल्म म्हितल । थौंकन्हे तिपु जीवन हना च्वंम्ह रेश्मी महर्जन नं “तिनतिकः महाबिकः” धुंका मेगु फिल्म म्हितूगु खनेमदुनि ।

सिन्तिया सेन ताम्राकार
सिन्तिया सेन ताम्राकारं निर्देशक आर्यम नकःमिया “ सत्य धरोधर्म ” फिल्मय् सबिन शाक्यलिसे , निर्देशक रोशन नवीन ताम्राकार या “ तुतां ” फिल्मय् यज्ञरत्न शाक्यलिसे व निर्देशक शान्तराज शाक्यया “यले बाथ” फिल्म लगायत मेमेगु फिल्मय् नं हिरोइन जुया म्हितल । अनं लिपा इहिपाः याना विदेश वंम्ह सिन्तिया मय्जु अन हे परिवारलिसे जीवन हना वयाच्वना दीगु दु । थुकथं नेवाः प्याखं ख्यलं तापाःख्वाः जुया वंम्ह सिन्तिया हाकनं प्याखनय् खनेदयेक वःगुु मदु ।

गीता शाही
नेपाःया पत्र्या भाय्या फिल्म न म्हितुम्ह गीता शाहीया चर्चित नेपाली फिल्म “बन्धकि” खःसा वय्क मयजुं “मतिना” व “निफ्वः स्वां” फिल्म नांयागु छुं छुं नेवाः फिल्म म्हितल । गीता शाहीया मेगु लुमंकेबहःगु प्याखँ धैगु माया रे रत्न खः । नेपालभाषा लिसें नेपाली संकिपा जगतय् नं गीता शाहीया चर्चा जुयांतु च्वनेगु याः । छम्ह प्रतिभां जाःम्ह कलाकार खः । थथे छगू निगु फिल्म म्हिते धुंका गीता शाही नं तापाःख्वाः जुया वन ।

मीरा माली
नेवाः फिल्म ख्यलय् छम्ह प्रतिभाशाली हिरोइन कथं छगू इलय् बय्बय् जूम्ह हिरोइन धइम्ह मीरा मालि नं खः । मीरा मालिं “छ हे मदुसा” फिल्मय् राजकुमार श्रेष्ठ लिसे हिरोइन जुया म्हितुगु खःसा निर्देशक रविन्द्र शाहीया “थःम्ह म्हूगु गाः” फिल्मय् उगु फिल्मया हिरो किशोर शाहीया जीवनय् भुखाय् ब्वयेका बिइम्ह पात्र कथं नेगेटिभ रोल नं म्हितल । उगु रोलय् बाँलाक अभिनय याःगुलिं पेजथ्री पिपुल्स च्वइस अवार्डय् बेस्ट नेगेटिभ रोल अवार्डया निंतिं नोमिनेशनय् नं लात । थथे छगू निगु प्याखं म्हिते धुंका विदेश वंम्ह मीरा मालि हाकनं लिफः स्वया नेवाःप्याखं म्हितः मवः ।

अनरेबल मेंशन
थन विशेष याना छगू इलय् फिल्मय् सकृयपिं तर थौंकन्हे खनेमदया च्वंपि अले हाकनं फिल्मय् खनेदय्क वये त्यंपिनिगुबारे जक ध्वः कियागु खः । उकि मध्ये छम्ह निकि महर्जन नं खः । बीग बजेट नेवाः फिल्म धकाः बय्बय् यानातःगु “च्वापुफय्” फिल्मं थःगु पलाः न्ह्याकेगु कुतः याःम्ह निकि महर्जनया थ्व फिल्म आः तक नं पिहाँ मवनिसा वय्कः मयजु न्हापांगु फिल्म कथं “तिनतिकः महाबिकः ” पिहाँ वये धुंकूगु दु । अनं लिपा “हिसिमति” नं पिदने धुंकल तर निकीया मेगु फिल्म धाःसा खने मदुनि । भिंतुना संकिपाया मेम्ह नकिं रेमा महर्जन नं तीपू जीवन हनां विदेशय् च्वनाच्वंगु दु । “इहिपा” संकिपाया हे मेम्ह हिरोईन् अनूर मानन्धर, “सर्गःमिला” या सुमिका बज्राचार्य, व “मतिनाया कलि” व “गोखुन” नांयागु फिल्म म्हितुम्ह मधु शाही नं बाँलासे च्वंम्ह कलाकार खः तर वय्कः मयजु नं फिल्मं तापानावंम्ह हिरोइन खः ।
थुलि मच्छि कलाकार नकिं मय्जुपिं छम्ह छम्ह याना थुगु ख्यः त्वताः वने धुंकाः छुं न्हूगु चहलपहल नं जुयाच्वंगु मदुनिं । नेपालभाषाया छगू स्वर्णयुग थथे हे क्वचाना वंगु खनेदु ।
à