संचारकःमि, कलाकार, छायाँकार, निर्देशन एवं म्ये हालामि कथं बहुप्रतिभाशाली राजेन्द्र डंगोलया सलय् न्हूगु एलबम ‘ह्याउँ सिन्हः’ म्येचाः पितब्वज्या जुल । लिसें राजेन्द्र डंगाेलया च्वसु मुना सफू ‘झुमिं यंकूगु समाज’ सफूया नं पितब्वज्या जुल ।
ख्यालिजुजु मदनकृष्ण श्रेष्ठ मूपाहाँ कथं झायादीगु उगु ज्याझ्वःलय् थुगु हे म्येचाःया छपू म्ये चकना अाे चकनाया म्यूजिक भिडियाे नं पितब्वज्या जूगु खः । दिनकर महर्जन व सृष्टि महर्जनया मूभुमिका दूगु थ्व भिडियो दुने म्येहालामि राजेन्द्र डंगोलं नं छगू विशेष भुमिकाय् अभिनय यानातःगु दु । रोहिया महर्जनं कोरियोग्राफि या नापनापं उगु म्युजिक भिडियो निर्देशन नं यानादीगु खः । रत्नदेवी महर्जनं निर्माण यानादीगु थ्व भिडियो या किपालुमि राजेन्द्र डंगोल थःहे खःसा छ्याय्फ्वाय् ज्या इन्द्र मानन्धरं यानादीगु खः । म्येचाःलय् छपू ज्व म्येनं दुथ्यानाच्वंगु दु । म्ये हालामि राजेन्द्र डंगोलयात निशा देसारं साथ बियातःगु दु ।
‘ह्याउँ सिन्हः’ म्येचाया म्येच्वमि नातिकाजी महर्जन खःसा लय् चिनामि व बाजं ग्वसाः जुगल डंगोलया खः ।
पन्चनारायण डंगोलया सभानायसुइ ज्याझ्वः जूगु खः । ज्याझ्वलय् विशेष पाहाँ वाद्य सम्राट न्हूच्छे बहादुर डंगोल , लोककवि राजभाइ जकःमि , संगीतकार जुगल डंगोल लगायतं नुगःखँ तयादीगु खः ।
