फिल्मय् म्हितिपिं स्टारतय्गु नां झीसं सिउगु छगू जुयाच्वनि तर इमिगु वास्तविक नां मेगु हे जुयाच्वनि । बलिउडया ट्रेजेडि किंग दिलिप कुमारया नां दिलिप कुमार मखसे युसुफ खान खःसा बलिउडया न्हापांम्ह सुपर स्टार राजेश खन्नाया नां जतिन खन्ना खः । अक्षय कुमारया नां राजिव कुमार भाटिया खः । अथे हे तुं बलिउडया मेगास्टार धका धयातःम्ह अमिताभ बच्चनया नां नं अमिताभ मसखे ईन्कलाब राय बच्चन खः । संसारय् अथे नां हिला तिनि फिल्मय् वःपिं यक्वः दु । थ्वहे झ्वलय् थःगु वास्तविक नां हिला थन नेवाः फिल्म म्हितूपिं नेवाः स्टारतय्गु बारे चर्चा यायेगु कुतः जुइ ।
जय श्रेष्ठ
दकले न्हापांगु नेवाः फिल्म “सिलु”या हिरो जय श्रेष्ठया धकाः सकस्यां स्यु । वय्कःया फिल्मी नां जय श्रेष्ठ खःसा वास्तविक नां धाःसा जुजुकाजी महर्जन खः । वय्कलं थःगु नांया नापनापं जात तकं हिलाः जय श्रेष्ठ धकाः तःगु खः । उगु इलय् वय्कलं थःयात श्रेष्ठ धकाः धाल कि बाँलाइ तायेका थर तकं हिला क्यंगु खः।
सबिन शाक्य
सबिन शाक्यलिसे स्वापु दूगु छगू घटना धइगु छुं ई न्ह्यः वय्कःया काय् भाजुया इहिपाया खः । वय्कलं थः काय्या इहिपाया ब्वनापौ इनादीबलय् जिम्ह काय् सबिन शाक्यया इहिपाया लसताय् धकाः च्वया तःगु कार्ड इन । व कार्ड स्वया आपालं मनूत अजू चाल । अजू मचाइगु नं गनं ? सबिन शाक्यं इनाच्वंगु कार्डय् थः काय् सबिन शाक्यया इहिपा भ्वय् धका च्वया तल । थ्व कार्डयात कया नेवाः मनोरन्जन ख्यलय् तःधंगु हुइना भुइना जुल । थ्वहे झ्वलय् तिनि सिइदत कि वास्तवय् सबिन शाक्यया नां सबिन शाक्य मखसे रबिन्द्र शाक्य खनि । वय्कःया कायया नां जक सबिन खनि । वय्कलं न्हापा छकः घडि पसः तःगु जुयाच्वन सा पसःया नां सबिन धडि पसः धका तःगु जुयाच्वन । व हे पसलय् म्हसिउपिं कलाकःमिंपिन्सं वय्कयात हे सबिन धका तायेकल । छगू टेलिफिल्मय् हे नां पिहाँ वल । वहे नामं वयागु म्हसिका च्वन । अथेजूबले थःगु नां हे सबिन धका तया पलाः न्ह्याका च्वन ।
हिसिला महर्जन
“राजमति” फिल्मया हिरोइन कथं म्हसिका दुम्ह छम्ह ज्वमदुम्ह कलाकार खः हिसिला महर्जन । वय्कः मयजुया नां नं हिसिला मखसे हिरा शोभा महर्जन खः । शंकरदेव क्याम्पसय् ब्वना च्वंगु इलय् उगु क्याम्पसया चकना साहिन्य पालाःपाखे ब्वति काःगु “पिब्वयेमाःगु यथार्थ” नांयागु नाटक म्हितूम्ह हिरा शोभा उगु नाटकय् हिसिला नांयागु पात्र जुया म्हितुगु खः । व हे नां लिपा राजमति संकिपाः म्हितेवं वय्कयाः नां हिसिला जूवंगु खः ।
आर्यम नकःमि
थथे नां हिलावःपिं मध्ये छम्ह आर्यम नकःमि नं खः । नेवाः फिल्म ख्यलय् तसकं नांजाम्ह कलाकःमि कथं न्ह्यःने लाना च्वंंम्ह आर्यम नकःमिया नां महेन्द्र मान नकःमि खः । “सुभाय्” व “न्याल्लब्यां” थेंजागु तसकं बय्बय् जूगु लोकंह्वाःगु नेवाः फिल्मपाखें थःगु पलाः न्ह्याकूम्ह आर्यम नकःमिया नां थौंकन्ह नेवाः फिल्मख्यलय् छगू ज्वमदुगु नां कथं न्ह्यने लाये धुंक्रगु दु ।
मेलिना मानन्धर
नां हिला फिल्मय् वःपिं मध्ये छम्ह हिरोइन मेलिना मानन्धर नं खः । वयकया नां सुनिता खः । वय्कलं “पटाचारा” “कृषा गौतमी” व “धम्मवति”, “बाँला मयजु” थेंजाःगु नेवाः फिल्म म्हितूगु दुसाः कलिउडया वय्कः छम्ह लोकंह्वाम्ह, नांजाम्ह हिरोइन खः । कलिउडया हे नांजाम्ह अले लोकंह्वाम्ह जक मखसे मेलिना नाप हे “पटाचारा” व “कृषा गौतमी” फिल्मय् हिरो जुया म्हितुम्ह कर्माया नां नं कर्मा मखसे महेश शाक्य खः ।
आराध्य लक्ष्मी खड्गी
थौंकन्हे छम्ह म्यूजिक भिडियो ख्यःया तसकं चर्चितम्ह मोडल अले कोरियोग्राफर आराध्य लक्ष्मी खड्गी मय्जुया वास्तविक नां नं आराध्य लक्ष्मी मखसे लक्ष्मी खड्गी खः । वय्कः नं मनोरन्जन ख्यलय् छम्ह कलाकःमिया रूपय् पलाः न्ह्याकेत जक थःगु नां हिला आराध्य लक्ष्मी तःगु खः । “लिबाय् धुंका” फिल्मपाखें नेवाःउढय् ईन्ट्रि याम्ह वय्कःया “बहिदार बाबु” नांयागु फिल्म नं पिहाँ वये धुंकल । आराध्यया धापु कथं वय्कः भारतया मिस वल्र्ड नांजाम्ह हिरोइन ऐश्वर्या रायया फाय्न खनि । ऐश्वर्याया म्ह्याय् छम्ह दु । वयागु नां आराध्य खः । वहे नां ल्ह्यःया कया थःगु नामय् स्वाना आराध्य लक्ष्मी खड्गी धका तःगु खः ।
अनु महर्जन
“बसन्त ऋतु” फिल्मं चर्चाय् वःम्ह अन्नु महर्जनया वास्तविक नां बुद्ध लक्ष्मी महर्जन खः । साँस्कृतिक ज्याझ्वलय् ब्वति कायेत वय्कः मय्जु थीथी देशय् वना च्वनिम्ह कलाकार खः । थथे हे छक्वः दुबई वंगु इलय् अन मेमेगु देशं वःपिं कलाकःमिपिन्सं वय्कःयात बुद्ध लक्ष्मी धकाः उच्चारण याये थाकु तायेकल । उलि जक मखसे ग्ल्यामरया संसारय् पलाः न्ह्याकेत बुद्धलक्ष्मी थें जाःगु नांसिबें नां कायेत अपुइ कथंया नां जुइमा धकाः खँ जूबले थःगु नां हिला अन्नू धका तःगु जुया च्वन ।
शोभा महर्जन
“बसन्त ऋतु” फिल्मपाखें हे डेब्यु याम्ह छम्ह मेम्ह हिरोइनया नां शोभा महर्जन खः । वय्कः मय्जुया “गालय् वन” व “बहिदार बाबु” पिदने धुंकलसाः “तिबः — द सपोर्ट” नांयागु फिल्म पिदनिगु लँपुइ दु । हिरोइनया रूपय् जक मखसे छम्ह फेशन डिजाइनया रूपय् नं नांजाम्ह वय्कःया नां शोभा महर्जन मखसे कृष्ण शोभा महर्जन खः । अले वय्कःयात पासापिन्सं न्हापां निसें शोभा धकाः सःतिगु जुयाच्वन । अले थः थ्व ख्यलय् पलाः न्ह्याकेत वय्कलं थःगु नां शोभा महर्जन धकाः जक तःगु खः ।
प्रेमा शाक्य
प्रेमा शाक्य छम्ह संकिपाया कलाकर, निमार्ता व स्टेज कलाकार कथं नं म्हस्यू । छुं ई न्ह्यः तिनि हे घोषक संकिपाःया छम्ह निर्माता कथं प्रेमा शाक्यं खने दुगु खःसा स्टेज प्रोगामय् वा नाटक म्हितेत न्हापा छेँय् सिइका काइ धकाः थःगु नां हिलाः पुष्पा शाक्य धकाः तइगु खः ।
पुरुषोत्तम पक्का
पुरुषोत्तम पक्का ‘गालय् वन’ प्याखनय् कलाकार एवं लेखक कथं न्ह्योने दं वःगु नां खः । तर पुरुषोत्तमयात विज्ञान पक्का वा चकलेट नांम्ह आपासिनं म्हस्यू ।
अनरेबल मेन्शन
“तापलय्” फिल्म दयेकादीम्ह बाल मुकुण्ड प्रजापति थिमिया छम्ह नांजाम्ह कलाकःमि खः । वय्कलं “अरनिको” नाटक नं यानादीगु दुसाः वय्कः छम्ह कुशल नृत्यकःमि नं खः । स्यनेगु ज्याय् नुगः क्वसाम्ह बालमुकुण्ड यात अन स्येनामि प्रजापति धका हे म्हसीका वया च्वंगुृ दु । “मू मदुगु जिन्दगी” फिल्मय् आर एल महर्जन नां छुना हिरो जुया म्हितुम्ह हिरोया नां रामलाल महर्जन खः । वय्कः भाजु नं फिल्मय् वयेत नां हिला वःम्ह खः । आपासिनं फिल्मय् नां हिला वयेगु याइसा हरिश तण्डुकार नांयाम्ह हिरो धाःसा फिल्मय् वयेधुंका लिपा जक नां हिउम्ह हिरो खः । वय्कलं न्हापा थःगु नां हरि तण्डुकार धका हे छुं छुं फिल्म म्हितूगु खःसा लिपा वना जक हरिश धका छूगु खः । ख्वपःय् हर्के माइला धका नांजाम्ह कलाकःमिया वास्तविक नां हरिकृष्ण दुवाल खः । वय्कःया “लिधंसा” नांयागु छगू तसकं बयबय् जूगु खःसा ख्वपः देयया छम्ह तसकं ल्हा न्ह्याम्ह कलाकःमि खः वय्कः । वयकलं थःगु फेसबुक आइ डि हे स्यनामी प्रजापति धका दयेकातःगु दु । नां हिला फिल्मय् पलाः न्ह्याकुपिनिगु चर्चा याना वनेगु खःसा ताहाकः थाय् मालि । उकिं थन ला छुं छुं प्रतिनिधी पात्र ल्यःया जक चर्चा याना च्वनागु खः ।
