न्ह्य: खँ
फिल्मस्टार धाल कि फिल्मय् एक्टिंग याइपिं धकाः याउँक हे सी दु । थथे फिल्मय् एक्टिंग याना नां व दां कमे या:पिं फिल्मस्टारतय्त सेलिब्रिटी धका धाइ । अले सेलिब्रिटीया रूपय् नांजापिं स्टारत मध्ये छुं छुं स्टारतय्सं गब्लेंगब्लें च्वसा न्ह्याकेगु याये य: । थथे च्वसा न्ह्याका सफू हे च्वम्ह फिल्म स्टार छम्ह मनिषा कोइराला नं ख: । मनिषां च्वःगु सफूया नां “हिल्ड” ख: । छुं दँ न्ह्य: मनिषायात दुरूपाय् क्यान्सर जूगु इलय् थ:म्हेसिनं भोगे यानागु कष्टयात कयाः च्वयात:गु सफू बेष्ट सेलरया रूप का:गु नं ख: । थ:म्हेसिनं न्हापांखुसी च्व:गु सफू थुकथं लोकंह्वाबलय् मनिषां हाकनं मेगु सफू च्वयेगु मति त:गु ख: तर आ:तक थुखेपाखे पला: न्ह्याकूगु मदुनि ।
फिल्मस्टारतय्सं सफू च्वइगु धइगु विशेष याना थ:गु आत्मबृतान्त च्वयेत ख: । आ: तक पिदना च्वंगु सफूया ल्या: स्वयेबले नं अज्यागु हे सफू आपालं पिदना च्वंगु खने दु । हलिउड व बलिउडय् थथे थ:गु आत्मबृतान्त कथं सफू च्व:पिं फिल्मस्टार न्हियान्हिथं अप्व:या व:गु दुसा: मनिषा कोइराला थुकिया न्हूगु दसु ख: । बलिउडया नांजापिं फिल्मस्टारत मध्ये देव आनन्दया “रोमान्सिंग द लाइफ” साप हे बय्बय् जूगु सफू ख:सा ऋषि कपुरं च्वंगु “खुल्लमखुल्ला : अनसेन्सर्ड” नं लोकंह्वा:गु हे ख: । फिल्मस्टारतय्सं थथे थ:गु नुग: खँ च्वयेत जक सफू च्वइगु मखसे साहित्य सृजना नं यायेगु या:सा गब्लें गब्लें मेमेगु विषययात कया नं सफू च्वयेगु या: । गुबलें गुबलें जक फिल्मस्टारतसें मेगु विधायात क:घाना सफू च्वयेगु कुत: उलि या:गु खनेमदु ।
नेपा:या सन्दर्भय् चर्चा यायेबले ख्यालिजुजु कथं नांजाम्ह मदनकृष्ण श्रेष्ठं च्व:गु “महको म”नांयागु आत्मबृतान्त सफू साप हे बय्बय् जूगु ख: । थ:गु जीवनया अनुभवयात कयाः च्व:गु उगु सफूसिबें न्ह्य: मदनकृष्ण श्रेष्ठया “साझा पृथ्वी”नांयागु छगु सफू नं पिदने धुंकूगु दु । झी म्वाना वया च्वनागु पृथ्वी धइगु झी मनूतय्गु जक मखसे झंग:, पशु पन्छिया नं साझाबासं च्वनेगु थाय् ख: धकाः धयात:गु उगु सफू मचा साहित्यया रूपय् पिदंगु ख:, तर उगु सफू धा:सा उलि बय्बय् जूगु खनेमदु ।
अथे हे तुं मह जोडीया रूपय् नांजापिं मदनकृष्ण श्रेष्ठ व हरिवंश आचार्य मध्ये हरिवंश आचार्यया नं निगु सफू “चिना हराएको मान्छे” व “हरिबहादुर” पिदने धुंकूगु दु । थ्व निगु मध्ये “चिना हराएको मान्छे” नांयागु सफू वय्क:या थ:गु जीवनया अनुभूति कथं च्वयात:गु सफू ख:सा “हरिबहादुर”धा:सा छगु उपन्यासया रूपय् च्वयात:गु सफू ख: । थ्व निगु सफू मध्ये नं हरिवंश आचार्यया आत्मबृतान्त “चिना हराएको मान्छे” साप हे लोकंह्वा:गु सफू ख: । तर वय्कया मेगु सफू “हरिबहादुर” उपन्यास धा:सा उतिमग्यं ।
आत्मबृतान्तपाखे ल्हा: न्ह्याकूम्ह छम्ह पुलांम्ह कलाकार सुभद्रा अधिकारी नं ख: । वय्क: नेपा:या हे नांजाम्ह कलाकार ख:सां वय्कलं “राजमति” व “चाण्डालिका” थेंज्यागु नेवा: फिल्म नं म्हितादीगु दु । वय्कलं वि.सं. २०६९ पाखे “सुभद्रा अधिकारी : एक रथ पांग्रा” नांयागु आत्मबृतान्त सफू पिकागु ख: । उगु इलय् थ्व सफूतिं उलि बांलागु छाप त्वते मफुत । थथे थ:गु सफूतिं छाप त्वते मफूसां हारे मचाम्ह सुभद्रा अधिकारीं लिपा हाकनं “कलाकार सुभद्रा अधिकारी : जीवनगाथा” धका नां छुना न्हूगु हे कथं पिकागु ख:सा थ्व सफूतिं धा:सा बांलागु छाप त्वतेत ता:लात । थ्व हे झ्वलय् नेपालभाषा ख्यलय् नं कलाकार जुया: नं सफू पिका:पिं थुकथं दु । थ्व बाहेक नेपालभाषाया संकिपाः ख्यलय् मेपिं सुनां सुनां सफू पिकाःगु दु धैगु छक्व दुवाले ।
सुरज व्यन्जनकार
सुरज व्यन्जनकार नेवा: फिल्मख्य:या छम्ह लोकंह्वाम्ह कलाकार ख: । झिंन्यादँति न्ह्य: “मतिनाया कलि” नांयागु फिल्मय् हिरो जुया म्हितुम्ह ख:सा थ:यात छम्ह हिरो कथं मखसे न्ह्यागु नं रोलय् उत्तिग्यंक न्ह्यब्वयेफुम्ह कलाकार कथं कयात:गु दु । वय्क:या “स्वय्नगु”, “आसकुति”, “बहिदार बाबु” लगायत आपालं फिल्म पिदने धुंकल । वय्क:यात छम्ह मल्टि टेलेण्ट कलाकार धका: धयात:गु दु । सुरज व्यन्जनकार छम्ह म्येहालामि नं ख:सा छम्ह म्येच्वमि नं ख: अले साहित्य ख्यलय् वय्क:या पला: न्ह्याना हे च्वंगु दु । वयकलं छुं ई न्ह्य:जक छगू मुक्तक मुनाया सफू “ सब्बुचा २” धका पिकाना थुखेपाखे थ:गु न्हाय् धस्वाका क्यंगु ख: । थ्व सिबें न्ह्य: ने.सं. ११२७ पाखे वयकया “सक्बुचा” नांयागु मुक्तक मुना सफू पिदने धुंकुगु ख: । थुकथं वयकया च्वसा: न्ह्याना च्वंगु दु ।
दर्शनवीर शाक्य
दर्शनवीर शाक्यया म्हसीका धइगु छम्ह सन्चारक:मि कथं धस्वाना च्वंगु दु । तर वय्क: छम्ह फिल्मक:मि नं ख: धइगु खँ थन थाय् चर्चा याये बहजू । खुदँ न्ह्यति वय्क:या “द मिथ” नांयागु छगू शर्ट फिल्म तसकं बय्बय् जूगु ख: । थ्व फिल्मं उगु इलय् मच्छिन्द्र क्लबया ग्वसालय् जूगु शर्ट फिल्म कासाय् न्हाप सिरपा त्याकेत ता:लागु ख: । व धुंका “द मिथ जिरो” नांयागु फिल्मं लिउ सिरपा व “इन्द्रायणी” फिल्मं लियांलिउ सिरपा त्याकुगु ख: । थ्व “इन्द्रायणी” नांयागु शर्ट फिल्मं ला नेपाल कल्चरल इन्टरनेशनल फिल्म फेस्टिभलय् बेष्ट नेशनल स्पेशल मेन्सन अवार्ड त्याकेत ता:लागु ख: । थ्व स्वंगुलिं फिल्म दर्शनवीर थम्हं हे च्वयादीगु ख: । थ्व सिबें न्ह्य: वय्कलं च्वयादीगु “पला:” नांयागु फिल्मया नं दयेके ज्या न्ह्या:गु तर उगु फिल्म धा:सा पूमवन । वय्कलं घोषकया स्क्रीन प्ले नं च्वयादीगु ख:सा छम्ह म्ये च्वमिया रूपय् ल्हा: ज्वम्ह दर्शनवीरया आपालं म्ये पिदने धुंकुगु दु ।
थथे मनोरन्जनख्यलय् ल्हा: न्ह्याम्ह दर्शनवीरया ७गू सफू पिदने धुंकुगु दु । ख्यालि मुना १, विश्वया न्यापू मचा बाखं ३, ख्यालि मुना २, शायद मतिना धैगु (चिनाखँ), मनया गथ:, नागरसर्वस्व व कामकला (जगन्नाथ देग:या तुना:सिँइ) पिदने धुंकल । मनया गथ:, नागर सर्वस्व, कामकला स्वंगुलिं बिस्कं महत्वं सफू पिदंगु दु । नेपा:या हे वाङ्गमयख्यलय् कामकला वा यौन बिषय या दुग्यंगु सफू पिदंगु खने मदुनिसा दर्शनवीरया थ्व लिपांगु निगु सफू ज्व:मदुगु कृति कथं कायेमा ।
राकेश महर्जन
दर्शनवीर शाक्यया थें हे राकेश महर्जनया म्हसीका धइगु छम्ह सन्चारक:मिया रूपय् दया च्वंगु ख:सा वय्क: छम्ह फिल्मक:मि नं ख: । झिदँति न्ह्य: हे वयकलं दयेकादीगु “कल्ली” नांयागु शर्ट फिल्म तसकं बयबय् जूगु ख: । अस्कर इन्टरनेशनल शर्टफिल्म कासाय् बेस्ट सेकण्ड शर्ट फिल्म व धरानय् जूगु नेपाल अन्तर्राष्ट्रिय फिल्म फेस्भिलय् नं दुथ्यागु फिल्म ख: । थुकथं छम्ह दुग्यंम्ह फिल्मक:मिया रूपय् न्हाय् धस्वाकेत ता:लाम्ह राकेश महर्जन छम्ह धिसिलाम्ह चिबाखँ च्वमि नं ख: । वयकया चिबाखं मुना सफू “धुकधुक धुकधुक” पिदने धुंकुगु दु । साहित्यख्यलय् जक मखसे वाङ्गमयख्यलय् हे दिपा मदिक्क ल्हा न्ह्याका वयाच्वंम्ह राकेश महर्जनं च्वयादीगु “फिल्म सिद्धान्तया खँ” व “आमसन्चार व नेपालभाषा पत्रकारिता” नांयागु निगु सफूया नापनापं “धर: पौ— अभिलेख सम्पादन” व “भृकुटी उपन्यासय् ऐतिहासिकता” नांयागु निगु सफू पिहाँ वये धुंकुगु दु ।
राजु मर्हजन जुजु
नेपालभाषा संकिपा ख्यलय् राजु महर्जन जुजुया नां छगू नं ल्वमंके मफइगु नां ख: । ग्वाज्य:चा, अय् जि योम्ह थें नेपालभाषाया संकिपा म्हिते धुंकुम्ह भिंतुना थें जा:गु संकिपा: नं म्हिते धुंकुम्ह ख: । वय्क:या नं आपलं हे म्यूजिक भिडियो नं म्हिते धुंकुगु दुसा म्यूजिक भिडियो नं निर्देशन याये धुंकुगु दु । राजु महर्जन छम्ह कलाकर ख:सां थी थी पत्रिकाय् नं फुटकर कविता मद्दिक्क च्वयाच्वनिंम्ह ख: । तर कविता जक च्वच्वं हे राजु महर्जनं ह्वयेत्यंगु स्वां व ह्वया:च्वंगु स्वां पिथने धुंकुगु दु अले याकनं हे न्हूगु सफू कथं नेपालभाषा मचा गद्य व पद्य मुना व झी व झीगु तजिलजि च्वखँ मुनां सफू नं पिदने त्यंगु दु ।
माणिक उराय्
माणिक उराय्या पूवंगु नां माणिक रत्न तुलाधर ख: । माणिक उराय् नेपालभाषाया संकिपा ख्यलय् छगू सेल्लागु उपस्थीतिया नां ख:। वय्कःया च्वसा, निर्देशन अले सम्पादनय् हाकु सुपाँय् व अज: मिखा पिदेने धुंकुगु संकिपा: ख: । वय्क: इलय् व्यलय् साहित्य ख्यलय् नं उतिकं थ:त न्ह्यब्वयाच्वनिंम्ह छम्ह ब्यक्ति नं ख: । थुगु हे झ्वलय् वय्कलं दोहलपा नांया चिबाखँ सफू नं पिकागु ख: । थुगु सफूया हे नेपाली अनुवाद रमा कारंजीतं पिका:गु नं दु ।
अनरेबल मेन्सनस्
सिने धकिंया संसार छगू मनमोहक संसार ख: । थ:गु लजगा: सिबें पा:सां नं यक्व हे साहित्यकाार व यक्व हे संकिपा: क:मिं थी थी सफू पिकयाच्वंगु ख: । थ्व हे झ्वलय् डा. राजनलाल जोशीं नं छगू चिहा: प्याखँ ईया बाखं निर्देशन यानादीगु दु । वय्कलं आपलं हे नेवा: सफूत च्वयादीगु दुसा न्ह्यलं ल्हाये मफूगु चा वय्क:या लोकंह्वा:गु उपन्यास ख: । थुकथं हे साहित्यकार जुया: नं प्याखँ वा सिल्भर स्क्रीनय् दुथ्या:पिं नं आपलं हे दु । हनेबह:म्ह दिवंगत राम शेखर नक:मि, हास्यव्यंग विधाया च्वमि हृदयप्रसाद मिश्र, साहित्यकार शुशिल राजोपाध्याय्पिं नं साहित्यकार लिसें फिल्म मेकर वा प्याखँ लिसे स्वा:पू दुपिं ब्यक्तित्वपिं ख: । थुगु बिषयलय् मेपिं आपलं कलाकारपिं दनिं । थुगु च्वसुयात निरन्तररूपं न्ह्याका यंकेगु निंतिं अझं सल्लाह सुझावया अपेक्षा यानाच्वना ।
