संसार अनलाइनपाखें सिंगिंग स्टार यात म्ये लःल्हायेया नापनापं थीथी ज्याझ्वः यात संसार्स अनलाइनया ग्वसालय् स्वदँ न्ह्यः ग्वसाः क्वचाःगु संसार्स अनलाइन सिङ्गिङ स्टार २०२०–०२१ कासाय् टप टेन तक थ्यनेत ताःलापिं कासामिपिन्त अफिसियल सङ ह्याण्डओभर प्रोग्राम धका म्हतिं छपू छपू म्ये अौपचारिक रुप लःल्हायेगु ज्याझ्वः जूगु दु ।
संसार्स अनलाइनया क्रियटिभ डाइरेक्टर स्वतन्त्रसंसार महर्जनया सभानायसुइ जूगु उगु ज्याझ्वलय् संस्थाया संस्थापक दुजः प्रेमा संसार महर्जनं लसकुस यानादीगु खः । ज्याझ्वलय् सिंगिंग स्टार्सया फाइनलिष्टपिन्त अफिसियल सङ ह्याण्डओभरया नापनापं कलाकार राजु महर्जन जुजुया कविता संग्रह “कोपिला” सफूया नं पितब्वज्या जुउगु खः ।
नांजाम्ह साहित्यकार व फिल्म निर्देशक प्रकाश सायमी व नेपालभाषाया न्हापांम्ह पत्रकार विजयरत्न तुलाधर जाना उगु सफूया उलेज्या यानादीगु खः । उगु हे ज्याझ्वलय् नेवाःसुपरस्टार जुयादीइत ताःलापिं आर्यम नकःमि,अन्नपुर्णेश्वरी श्रेष्ठ, हिसिला महर्जन, भिन्तुना जोशी, सुरज व्यन्जनकार, राजु महर्जन, रजनी खडगी, रोजिना सुवाल , रुपेन्द्र श्रेष्ठ व भोगेन्द्र मानन्धर नापंयाना झिम्हेसित व नेवाःआइडल जुइत ताःलाम्ह मन्जिल शाक्य छम्हेसित नं भिन्तुना देछागु खः ।
आनन्दरत्न बज्राचार्यं च्वयादीगु संगीता शाक्यं हालादीगु म्येय् नांजाम्ह संकिपामि पवन जोशीं निर्देशन यानादीगु राजमति मखु जि बोलया भिडियो व निर्देशक राजेन्द्र कुमार महर्जनं निर्देशन यानादीगु छन्त स्वया म्येया भिडियो पितब्वज्या यागु खः । लुँझ्या कला कुन्जपाखें निर्माण यागु थ्व भिडियो लय् राजु महर्जन जुजु व अन्नु महर्जनं अभिनय यानादीगु दु । थ्व म्ये परमेश्वर नारायण जोशी व रेखा नापितं हालादीगु खः। राजमति मखु जि बोलया म्येय् धाःसा ज्यापुनि इन्दु , प्रबिन अमात्य,श्याम महत व सुमिना महर्जन लगायत अापालं कलाकार पिन्सं अभिनय यानादीगु दु । थ्व म्येया संगीतकार अनिल तुलाधर खः ।
