जेम्स प्रधानयात आः संगीतकार वा गायक जक धयाः सम्बोधन यानां मगाये धुंकल । मनोरंजनया क्षेत्रय् जेम्स प्रधान छम्ह निर्देशक व लेखक कथं STML शर्ट टर्म मेमोरी लस नांया शर्ट मूभी विश्वज्योति सिनेप्लेक्सय् प्रिमियर जगु दु । तसकं हे रोमांचक व थ्रिल लिसें लवस्टोरी प्याखँ शर्ट टर्म मेमोरी लस तयार जूगु दु । थुगु हे शर्ट मूभीलिसें जेम्स प्रधानया हे न्हूगु छपू म्ये नं रिलिज जूगु खः ।
शर्ट टर्म मेमोरी लसय् समिशन जिसि व बेदना राइया अभिनय् दु । छगू अनकन्टार खुसि सिथय् निम्ह म्हमस्युपिं मनूत नापलाइगु व निम्ह नापलाय् धुंकाः वइगु थी थी मोडं स्वकुमिपिंत हलया सिटय् प्यपुंकाः हे तइ । शर्टमूभीया हरेक पलय् आः छु जुइ धैथे मनय् वात्तुवालाच्वनि । तर सुनांनं आः छु जुइ धकाः अनुमान धाःसा याये फइ मखु । तसकं हे असोचनीय मोडय् प्याखँ क्वचाइ । प्याखँया संवाद तसकं हे सामान्य जु । तर नं प्याखँया पकड् धाःसा स्वकुमियात चिनाः तः ।
शर्ट टर्म मेमोरी लस जेम्स प्रधानया कथं जेम्स प्रधानया न्हापांगु शर्ट मूभी धाःसा मखु । थौं सिबें १५ १६ बर्ष न्ह्यः नं जेम्स प्रधानं शर्ट मूभी धाःसा दयेके धुंकुगु जुयाःच्वन। थुगु शर्ट मूभी जेम्स प्रधाना हे युट्युबय् अपलोड जूगु दुसा थुग शर्ट मूभी नेपाली, नेवाः, तामांग व भोजपुरी भासं नं पिदनिगु खँ जेम्स प्रधानं धयादीगु दु ।
नेपालभाषां नं याकनं हे पिदनीगु जेम्स प्रधानं धयादीगु दु सा नेपालभाषाय् विराजकाजी राजाेपाध्याय् व लसता जाेशीं डब् याःगु दु ।
