नेपालभासाया शर्ट फिल्म इन्द्रायणी थी थी अवार्ड त्याकेत ताः लाःगुलिं लसता हना ज्याझ्वः जुल । ज्याझ्वलय् थुगु शर्ट फिल्मया निर्देशक दर्शनवीर शाक्यं इन्द्रायणीया कलालाकार छनोट निसें लोकेशन छनोट तक्कया खँ न्ह्यथनादील । आतक्क थुगु शर्ट फिल्मं स्वंगु अवार्ड नेपालभाषा चीहाः संकिपा अवार्ड, नेपाल कल्चरल इन्टरनेशनल फिल्म फेस्टीभल एनसिआइएफफ, स्पाइनि ब्याबलर इन्टरनेशनल फिल्म फेस्टीभलय् उत्कृष्ट शर्ट मूभीया अवार्ड त्याके धुंकुगु दु ।
फिल्मया कलाकार आराध्य लक्ष्मी खड्गीं थुगु प्याखँया स्क्रीप्ट ब्वनाः हे म्ह सिरिंग जुयाःवःगु खँ कनादिल । ब्वनाबलय् हे म्ह सिरिंग जुल धाःसा प्याखा बनेजुल धाःसा गथे जुइ धकाः थःम्हं बिचाः तकं याये मफूगु खँ न्ह्यथनादिल ।
निर्देशन सहायक राजन शाहीं थुगु शर्टफिल्म नेवाः संस्कृति व सभ्यताया बिषय जुुगुलिं तसकं हे संवेदनशील व सावधान जुयाः ज्या यानागु खँ न्ह्यथनादिल ।
शर्ट फिल्मया छायाँकार मनोजरत्न शाहीं लाइटिंगया माध्यमं प्याखंया पक्षत न्ह्यब्वयेत स्वयाःगु खँ तयादिल ।
कलाकर रुपेन श्रेष्ठं थुगु प्याखनं याना समग्र कलाकारपिनिगु उत्साह थहाँवंगु खँ नं न्ह्यथनादिल ।
मेकअप आर्टिस्ट उमिशा पाण्डें थःगु अनुभवय् कलाकारपिं परिपक्व व बाखँ तसकं हे बांलाःगुलिं प्याखँ सकस्यां यकुगु खँ कनादिल ।
कलाकार रविना तुलाधरं प्याखनय् ब्वतिकाये खंगु लसताया खँ धका कनादिल ।
उजय शाहीं प्याखनं सिरपाः त्याकादिगुलिं सकसितं हे भिंतुना दिल ।
प्राविधिक ग्वहालिइ सर्जु वज्राचार्यं थःगु जीवनय् न्हापां खुशी प्याखनय् संलग्न जुय खंगु अले प्याखँ सुटिंग लिपा गथे जुइ धकाः बिचाः मयानागु तर प्याखँ तयार जुइ धुंकाः सकस्यां बांलाः धाःगु खँ कनादील ।
मेम्ह प्राविधिक ग्वहालि यानादीम्ह रानी शोभा महर्जनं सुटिंग याःगु इलय् हे धात्थेंगु परिवेश कथं खनेदुगु अनुभव यानागु कनादील ।
नविन थेच्वमिं प्याखनय् आवद्ध जुइखंगु लसताया खँ कथं थःगु अनुभव कनादील ।
बाल कलाकारया रुपय् अनुस्का महर्जनं ज्याझ्वलय् झायादीगु खः ।
कार्यक्रमय् वक्ताका रुपय् वरिष्ठ सिने पत्रकार बिजयरत्न असंबरें इन्द्रायणी शर्तमूभीं थी थी अवार्ड त्याकुगु जक मखुसे सकल स्वकुमिया मतिना त्याकेत नं ताः लाःगु खँ न्ह्यथनादिल ।
वरिष्ठ फोटोग्राफर राजभाइ सुवालं इन्द्रायणी शर्टमुभि युट्युबय् एक लाख तिसहजारया हाराहारी स्वयेधुंकुगु खँ न्ह्यथंसें थौंया इलय् आः इन्द्रायणी थें हे शर्टमूभी दयेकाः वनेमाःगु खँ न्ह्यथना दिल ।
उकथं हे जापानपाखें नेपाल भ्रमणय् झायाच्वनादीम्ह जापानी नागरिक मिकाको किदातें इन्द्रायणी शर्ट मूभी सब टाइटल स्वयाः हे तसकं मार्मिक जूगु खँ न्ह्यथनादिल । लिसें थुगु शर्ट मूभी स्वयाः नेवार संस्कार र सभ्यता नं थुइके फूगु खँ न्ह्यथनादिल । वय्कलं थः पासापिन्त नं थुगु प्याखँ क्यंकाःगु धाःसें दक्वस्यां हे थुगु प्याखँ छक्व स्वये हे माःगु खँ न्ह्यथनादिल ।
इन्द्रायणीया निर्माता नरेशवीर शाक्यं थः विगत ४० बर्ष निसें नेपालभाषाया उत्थानयया नितिं जुयाःच्वनाःगु अले २३ बर्ष न्ह्यः निसें नेवाः पत्रपत्रिका पिकयाः च्वनाःगु व थ्व हे क्रमय् इन्द्रायणी प्याखँ नं निर्माण यानाःगु खँ न्ह्यथना दिल । झीगु साहित्यय् व समाजय् हिरामोतिया रुपय् थज्योगु आपलं लोक बाखंत दुगु तर झीसं अझं मुने मफूगु खँ त न्ह्यथनादिल ।
अन्तय् फिल्मया निर्देशक दर्शनवीर शाक्यं थुगु प्याखनय् मू कलाकारया रुपय् आराध्यलक्ष्मी खड्गीयात कयाःगु कारण मां व म्ह्याय्या स्वापू स्थापित यायेमाःगुलिं आराध्या लक्ष्मीया तःमां देवकुमारी खड्गी नं कलाकार हे जुगुलिं पर्दाय् खने सातकं स्वकुमि पिंत मां व म्ह्याय्या स्वापू खने दयेमाः धैगु कारण कनादिल लिसें इन्द्रायणीया भुमिकाय् आराध्या लक्ष्मीया ख्वाः बांलूगु कथं मेमेपिं कलाकर छनोट यानां इन्द्रायणीया छेँ जः क्यनेत कुतःयानागु खँ न्ह्यथनादिल ।
ज्याझ्वः पुतलिसडक स्थीत सिन्की भान्छाघरय् जूगु खःसा कल्पना बज्राचार्यं ज्याझ्वः न्ह्याकादीगु खः ।
