नेपालभाषाया विकास याना यंकेगु नितिं नेवाःभाय्या संकिपा निर्माण यायेत तिबः बियाः वनेमाः धइगु मान्यताय् ‘नेपालभाषा संकिपा संघ’ तसकं म्हो इलय् निस्वनेमाःगु खँ संघया नायः हृदयप्रशाद मिश्रं जानकारी ब्यूगु दु । नेपाःया न्हापांम्ह ट्राफिक इञ्जिनीयर डा. शान्तवीरसिंह तुलाधर संरक्षक जुयादिगु थुगु संस्थाया निंतिं वय्कलं थःगु ज्याःजंक्वय् जुइगु खर्च फुक्कं संघया कोषय् तयाब्यूगु नं पत्रकार सम्मेलनय् जानकारी बियादीगु खः । संस्थाया निंतिं धकाः वय्कलं न्यागू लाख तका कोषय् तयादीगु खः ।
ज्याझ्वलय् मू पाहांकथं प्रदेश सासंद हरिप्रभा श्रेष्ठ झायादीगु खः । वय्कलं सभ्य व नेवाः संस्कृतिं जाःगु प्याखँ दयेके माःगु खँ न्ह्यथनादिगु खः ।
ज्याझ्वलय् बागमति प्रदेश सांसद शैलेन्द्र मान बज्राचार्यं नेपालभाषाया मनोरंजन ख्यलं आः अनुसन्धानत्मक रुपं लिच्वः वइ कथं न्ह्यचिले माःगु व थःम्हं थुगु बिषयलय् फूगु ग्वाहलि यायेगु खँ न्ह्यथनादीगु दु ।
संघया न्वकु पत्रकार सुरेश किरण, छ्यांज्ये कलाकार श्यामसुन्दर सिल्पकार, दांभरि कलाकार अन्नपूर्णेश्वरी श्रेष्ठ जुयादीगु दुसा दुजलय् निर्देशक लिसें च्वमि आर्यम नकःमि, लिपि विशेषज्ञ एवं कलाकार शरद कसाः, गायक पवित्र कसाः, कलाकार कृष्णभक्त महर्जन, कलाकार अर्नेश्वरी शिल्पकार, कलाकार अन्नपूर्णेश्वरी श्रेष्ठ व अधिवक्ता जुजुकाजी महर्जन (कानुनी सल्लाहकार) दु ।
संघं नेपालभाषां संकिपा दयेकीपिंत आर्थिक, प्राविधिक ग्वाहालि चूलाकाः उत्कृष्ट संकिपा दयेकेत तिबः बिया वनेगु उद्देश्य ज्वंगु दु । संघं थौं छगू पत्रकार सम्मेलन यासें थःपिनि औपचारिक घोषणा यायेगु ज्याझ्वः नं तयातःगु दु ।
