नेपालभाषा ख्यलय् सांगीतिक विविधताय् छगू न्हूगु पहः कथं नेपालभाषाया कव्वाली म्यूजिक भिडियो बिमोचन जूगु दु । संगीतकार निल शाक्यं थःत आपलं हे कलाकारपिंसं म्ये हायेकेत अनुरोध वयाच्वंगुलिं दक्वं कलाकारपिंत हे समावेश यानां म्ये दयेकेगु सोचं छपू कव्वाली म्ये दयेकाःग खँ न्ह्यथना दिल । वय्कलं थुगु म्येय् मुक्कं न्याम्ह मिजंपिं म्ये हालामि व न्याम्ह मिसापिं म्ये हालामिपिं तयाः म्ये च्वमि चण्डेश्वर महर्जनया च्वसाय् अले जिवित जल्मिया संगीत संयोजनय् कविता जोशी, सविना मानन्धर, सुमन मानन्धर, सर्मिष्ठा शाक्य, एलिना शाक्य, सुरेश प्रधान, राजेश महर्जन, धर्म महर्जन, रोबिनशन कंसाकार व मोहन शाक्यं म्ये हालातःगु खः ।
म्येया बारे न्ववासें वरिष्ठ सिनेपत्रकार बिजयरत्न असंवरें सकल कलाकारपिं मोडलसिबें म्हो मजूगु धाःसें कलाकारपिनिगु तारिफ यानादीगु खः । वरिष्ठ संचारकर्मि रामकृष्ण खड्गीं हरेक मनुखं म्यूजिक भिडियो स्वयेगु थःगु हे विस्कं नजर दइ धाःसें छम्हेसित यःगु मेम्हेसित पानाच्वनिं तर भिडियोलं म्येयात यक्व हे बुस्त याःगु दु धकाः खँ तयादिल । पेजथ्री बाःछिपौया सम्पादक दर्शनवीर शाक्यं कव्वाली म्ये न्हापा नं पिदने धुंकुगु खँ कुलादिलसा म्येय् हरेक कलाकारयात निर्देशकं बांलाक्क न्ह्यब्वयातःगु धाःसें निर्देशक विश्वसास बज्राचार्य व म्ये सर्जक निल शाक्ययात च्वछायादीगु खः ।
म्ये च्वमि चण्डेश्वर महर्जनं थःत निल शाक्य पाखें एप्रोच वःगु व थःम्ह च्वयागु म्येया छगः शब्द हे उखेथुखे मयाःसे म्ये दयेकुगु खँय् निल शाक्यया तारिफ यानादील ।
म्येया निर्देशक विश्वास बज्राचार्यं म्येय् दक्व कलाकारपिनिगु सहकार्यं यानाः जक म्ये तयार जूगुलिं सकल कलाकार लिसें सकल टिमया मेहनत खः धकाः खँ तयादिल । कलाकार पक्ष पाखें रोविनशन कंसाकारं नं नुगः खँ तयाःदीगु खःसा ज्याझ्वः कविता जोशीं न्ह्याकादीगु खः ।
