पिम नेपाल चलचित्र महोत्सव २०२२या निंतिं लागि संकिपा दुथ्याकेत आव्हान याःगु दु । थ्व हे वइगु असार १३ निसें १५ गते तक्क येँ हे जुइगु पिमया न्यागूगु संस्करणया फिल्म फेष्टिवलया निंतिं आह्वान याःगु खः। फिचर फिल्म,बृत्तचित्र व शर्ट फिल्म नं दुथ्याःके फइगु खँ आयोजकं जानकारी ब्यूगु दु । आवेदनया अन्तिम मिति २०८० असार ७ गते तक्क बियातःगु दु ।
थुगु फिल्म फेस्टिभलया विशेषता धैगु हे नेपालय् दुने न्ववाइगु न्ह्यागु नं भाय्या प्याखँ, वृत्तचित्र व शर्ट फिल्म दुथ्याके फइ । नेपाःया प्याखँ, कला संस्कृति व पर्यटन प्रवर्द्धन व सम्वर्द्धन यायेगु उद्देश्यं सन् २२०१८ निसें पावर इन्टरनेशनल मिडिया नेपाल (पिम नेपाल)या महोत्सव शुरु याःगु खः । आः जुइत्यंगु न्यागूगु संस्करणया ज्याझ्वः जुइगु संस्थाया नायः माधवराज खरेलं कनादील ।
पिम नेपाल चलचित्र महोत्सवय् नेपाःया प्याखँ, व थी थी भाषाभाषीया प्याखँ पाखे निर्देशक, लेखक, नायक व नायिकाया अवार्ड लिसें वृत्तचित्र पाखे पर्यटन, मानवअधिकार व सामाजिक उत्तरदायित्व थें जाःगु विषय धेधेंबल्ला जुइ गुकि निर्देशक, लेखक, स्वरांकन, छाँयाकार विद्या दुथ्याकातःगु दु । उकथं हे शर्ट फिल्म पाखे नं निर्देशक, नायक, नायिकायात नं अवार्ड बिइगु खँ आयोजकं जानकारी बियातःगु दु ।
नेपालभाषा ख्यलय् नं आपलं हे शर्ट मूभी, डक्युमेन्टरी व फिचर फिल्म दुगुलिं नेवाः प्याखँत नं दुथ्याइ धैगु खँय् आयोजक पाखें माधवराज खरेलं आशा प्वंकगु दु ।
