संगीतकार जुगल डंगोलं तेजवती जोशीयात २० २५ न्ह्यः हे म्हस्युगु खःसां ताः ईया अन्तराल लिपा वय्कःलिसे ज्या याये खंगु खँ मिखाया भाय् एल्बमया बिमोचनय् खँ कुलादिल । तेजवती जोशीया सांगीतिक यात्राय् ताः ई दिपाः कयाः हाकनं म्येचाः हे पिदंगु खँ तसकं हे च्वछाय्बहःगु खँ नं व वय्कलं कुलादिगु दु ।
यलया मेयर चिरिबाबु महर्जनं तेजवती जोशीया मिखाया भाय् एल्बमया बिमोचन नाचघरय् यानादीगु खः । थुगु एल्बम जुगल डंगोलया एकल संगीत व तेजवती जोशीया सः दुगु खः । थुगु म्येचालय् हरिराम महर्जन थेच्व, दर्शनवीर शाक्य, योगेन्द्र राजकर्णिकार व सुरजवीर बज्राचार्यया च्वसाय् प्यपु म्ये दुथ्यानाच्वंगु खः ।
म्येच्वमि हरिराम महर्जन थेच्वं, यः मां जितः बियाछ्वेम्वाल बोलया म्ये च्वयादीगु खः । म्येय् थौंया मिसामचाया वैवाहिक जीवन न्ह्याकेत थः जीवनपासा थःम्हं हे नाले धैगु भाव च्वयातःगु दु । मिखां मिखाया भाय् मथुगु, खै ला मखु.. दर्शनवीर शाक्यया म्येय् छम्ह मिसां थः यःम्हेसित तप्यंक मखुसे चाः हिइका मनोभाव प्वंकाच्वंगु खँ न्ह्यथनादिल । योगेन्द्र राजकर्णिकारया हाकुदाइचा म्येय् हास्यरस जायेकाः तःगु खःसा सुरजवीर बज्राचार्यया म्ये सुलुलुलु हायाःच्वन निगः मिखां ख्वबि छगू जीवनया भावं जाःगु म्ये खः ।
म्येचाः उलेज्या ज्याझ्वलय् म्येच्वमि लिसें, म्येचाः पिथनेत ग्वाहलि याःपिन्त नं दसिपौ लःल्हाःगु खः । लिसें ज्याझ्वःलय् विशिष्ट पाहां कथं ब्वनातःम्ह भृगुराम श्रेष्ठ, लोकगायक रत्न बेहोसी व तेजवती जोशीया मां बशुमाया जोशीयात नं सम्मान याःगु खः । तर उसाँय्या कारणं मेम्ह श्रष्टा रत्न बेहोसि धाःसा ज्याझ्वलय् थ्यंके मफूत ।
एल्बमय् दुथ्याःगु प्यपुं हे म्ये तेजवती जाेशीं लाइभ हाःगु खः । मू पाहां यल महानगरपालिकाया मेयर चिरिबाबु महर्जनं तेजवतीया सः तसकं हे बांलाः धकाः तारिफ यानादीगु खःसा म्ये च्वमि एवं पेजथ्री बाःछिपौया सम्पादक दर्शनवीर शाक्यं म्येहालामिपिंसं थःगु म्येचाःया बिमोचन यायेगु इलय् थथे हे यानाः कलाकारपिंसं लाइभ प्रस्तुति याःसा जक हे कलाकारया क्षमता सक्स्यां वाःचायेकफइगु खँ कुलादीगु खः ।
ज्याझ्वलय् यल १६ वडाया अध्यक्ष निर्मलरत्न शाक्य, आर्टोम्यूज स्टुडियोपाखें क्येन्जुमा सुब्बा, वरिष्ठ पत्रकार बिजय रत्न असंबरे, वरिष्ठ म्येहालामि जुजुकाजी रंजित लिसें आपलं संगीत व मनोरंजन ख्यःया ब्वक्तित्वपिनिगु उपस्थीति दुगु खः ।
