नेवाःतय् म्ये व संगीतलिसेया स्वापू आपलं हे दु । हरेक ऋतु व लोक लसय् झीसं म्ये न्यना, म्ये हालाः न्ह्यइपुकेगु याना । नखः चखःबलय् म्ये व संगीतया स्वापू उतिकं हे दया हे च्वं । ऋतु हिला वं कथं हे थी थी म्ये ऋतुया सवालय् झीसं न्यनां हे वयाच्वनागु खः । बसन्त वयेवं हे बसन्त रागय् होलिया म्ये, पाहाँच¥हेबलय् घातु राग, मोहनी बलय् मालश्री, बाह्रमासे म्ये, सिनाज्या यायेगु इलय् सिनाज्या म्ये इत्यादि ।
थौंया इलय् नेपालभाषाया संगीतय् लोकलय्या प्रभाव नं उतिकं हे लानाच्वंगु दु । आधुनिक नेवाः म्ये सिबें नं नेवाः लोक संगीतय् आधारित व पुलांगु पारम्परिक म्येया प्रभाव हे आपाः लानाच्वंगु वाः चाइ । नेपालभाषाय् आधुनिक म्येया धलः सिबें पारम्परिक म्येया धुन हे यक्वसित सालाच्वनेगु याः । तर म्येया धुन सिबें नं खँग्वःया चर्चा आपाः हे झीथाय् जुइगु याः । गुब्लें गुब्लें संगीतया धुनय् हरेक शब्द झीसं मचायेक हे नालाच्वंगु दइ । पारम्परिक म्येया धुन जुसां आधुनिक वा शब्दया प्रभावं झीत थियाच्वंगु हे दइ ।
म्येयात शब्द, संगीत, वाद्यवादन व सःया समिश्रण कथं कायेज्यु । म्येया उद्देश्यय् म्येया शब्दं प्रभाव लाकाच्वंगु दइ । रचनात्मक, प्रभावशाली, हःपाः बिइगु जुयाच्वंसा म्येया वइगु शब्दं म्ये च्वमिया भावयात प्रस्त हे यानाच्वंगु दइ । म्येया प्रकार कथं नं विद्धान सिग्मण्ड लिनहार्डं थःगु सफू संग्स अफ नेपालय् म्येयात धार्मिक म्ये, मतिना व व्याहाया म्ये – मिजंनं हालीगु, मिसां हालीगु, थी थी घटना वा ज्याझ्वलय् हालीगु – जातक व अवदानया म्ये, सिनाज्या म्ये, ऐतिहासिक घटनाया म्ये, येँयाःया म्ये, व व्याख्या याये थाकुगु म्ये धकाः ब्वथलाः तःगु दु । वय्कलं थुगु म्येत नेपालय् हालिगु व उपलब्ध जूगु म्येया आधारय् ब्वथलातःगु खः । तर थथे खयाःनं नेपालभाषाय् यौन व यौन मनोविज्ञानया खँ आधुनिक नेवाः म्येय् इलय् ब्यलय् उतिकं हे तायेदयाःच्वंगु नं दु । दक्षिणकाली बनय् निम्ह मिसा मिजं पासा उगु ईया ल्याखं थ्व म्ये आधुनिक धाःसां थुकीया च्वसाय् जनकवि दुर्गालाल श्रेष्ठं च्वयाः दिइ कि गथे गथे मय्जुयाःगु सालु गाच्व ब्यने, स्वयाच्वंम्ह भाजु छत्थुं मनकामना थ्यन । नेवाः म्ये थुकथं तप्यंक यौनभाव ब्वयातःगु म्हो हे जुसां यौन स्वापू वा यौन विषययात हे कयाः द्वैअर्थपिज्वइगु म्ये नं आपलं लुमना वइ । पुर्णकाजी ज्यापुया च्वसाय् न्ययाः गाच्व ब्यनावल, पवित्रकसाया सलय् मिखा बाला बाला बोलया म्येय् भुतु मय्जु ख्वयेम्वाः छिपिं म्हाइपुसे च्वंसा जिथाय् वाः धैगु खँग्वः, सतिश महर्जनया सलय् बुलुहुँ बुलुहुँ बोलया म्येय् लमि म्वायेक ल्याम्हलिसे मेलय् वने त्यनाला, मदनकृष्ण श्रेष्ठया निम्ह कलाः दुम्ह मनूया म्येय् ज्वरा ज्वरा पर्सि बोलया म्येय् ज्वरा ज्वरा लासा लानां छ छाय् मद्यना धकाः न्ह्यसः तइबलय् लिसः वइ – वैत जक घय्पुना तल उकिं मद्यना ।
नेवाः म्येय् थुकथं तप्यंक हे यौन व यौन कृयाकलापयात कःघानाः तःगु वाःचायेके फइ । तर थथे हे तप्यंक न्यनातःगु वा धयातःगु सिबें द्विअर्थी म्ये नं नेपालभाषा ख्यलय् लोकंह्वाः । तजाः छेँय्या कःसिइ च्वंगु गमलाया स्वां सुनां वयाः थ्वइ कारे ह्वये ब्यात न्हां थुगु म्यें छ्यलातःगु मेटाफोर कथं च्वमि दुर्गालाल श्रेष्ठं धायेत्यंगु मेगु हे थुइके फइ । बुद्ध शाक्यं च्वयादिगु मतिना यानागु जिं उलि मछि दत, जिगु मतिनाया चिं ग्व बोलया म्यें द्विअर्थी लगे जु । चिंया अर्थ छु खः ? म्येया बोलकथं मतिनाया चिं वा समाजय् प्रचलनय् वयाःच्वंगु चिं धैगु प्वाथय् दुला धाःगु नं अर्थ वइ । म्ये न्यनिबलय् नं म्येया छु पक्ष दकलय् महत्वपूर्ण धैगु खँ नं आः वाःचायेके माली । थौंकन्हे लोकं ह्वानाःच्वंगु छपू म्ये खः सालुगु गाःचा । लोकलसय् हालातःगु थुगु म्ये मस्त मस्त दथुइ नं लोकंह्वानाच्वंगु दुसा म्येया खँग्वः तसकं हे द्विअर्थी तायेदु । म्येया बोल कथं सालुगु गाःचा साले मते, खाइसि झमसि हायेके मते दु । अथे हे म्येया बिचय् नं चुपा नयेगु त्वते मते म्ये ग्वः दु । म्येग्वःया तप्यंगु अर्थ हे यौन मनोविज्ञान लिसे स्वानाच्वंगु दु । तर नं थुगु म्ये लोकंह्वानाच्वंगु दु ।
बलिउडय् मध्य ९०या दशकय् थथे हे द्विअर्थी म्येया बोल तसकं लोकंह्वाःगु खः । थुकीया छुं कथंया किचः नेपाली प्याखँया म्ये नं भचाभचा लात तर नेवाः म्ये पाखे धाःसा लाःगु खने मदु । आः वयाः सालुगु गाःचा साले मते बोलया म्यें नेवाः संगीतख्यलय् द्विअर्थी म्येया लुखा ह्वातां चायेका ब्यूगु दु । थुगु म्येया धून हे थुलि यइपुसे च्वंकि थुगु लसय् मेमेगु नं म्ये न्यने दु । तर नं सालुगु गाचा म्ये हिट् जुइवं युट्य्बयनं थुकीया भ्यूज् चालिस लाख पुले धुंकुगु दु ।
म्येया बोलय् मिसां – सालुगु गाचा साले मते, खाइसी झम्सी हायेके मते धायेवं थुकी निता खँ प्रस्त यानाच्वनि कि मिसाया सालुगु गाः सालेमते धयाःच्वंगु दु सा खाइसी झम्सी धकाः नां कयाः हायेके मते धाःगु दु अथेहे मेता खँ धैगु सालुगु गां न्ययातःम्ह मिसां सालुगु गाः साले धुंकाः खने दैगु मिसामचाया अंगयात खाइसी झम्सी धकाः हायेके मते धयाच्वंगु दु । छखे जनकवि दुर्गालाल श्रेष्ठं गथे गथे मय्जु याःगु सालु गाःच्व व्यन, स्वयाःच्वंम्ह भाजु छत्थुं मनकामना थ्यन धकाः थःगु म्येय् छ्यलातःगु शब्दं मनूतय्त सालुगु गाः छगू क्लिशे (अष्अिजभ०जुयाःबिइ गुकिया अर्थ अथें हे यौन सिले स्वाः वनिं ।
यौवनं जायाच्वंगु म्येया सवाः सकसिनं कायाच्वं । म्येया भावयात छुं कथं नकारात्मक रूपं स्वयेमाः धैगु नं मदु । साहित्य धैगु समाजया न्हाय्कं हे खः । समाज न्ह्याक्व हे सभ्य धाःसां समाजय् निर्माण जुयाच्वंगु यौनभावया म्ये धाःसा सकस्यां हे न्यनाच्वंगु दइ । थौं सालुगु गाःचा बोलया म्ये युट्युबय् जक हे ४० लाख नाघे जुइ धुंकुगु दुसा थ्व हे लसय् मेमेगु बोलया म्येया भ्यूज् उलि थ्यंगु मदुनिं ।
म्येया प्रभाव समाजय् लानाच्वंगु दइ । छपू म्ये लोकंह्वायेवं हे उकिया प्रभाव नच्चापिं मस्तय्त नं लाइ । यक्व हे स्कुलया फंक्शनय् थौंकन्हे सालुगु गाःचा धकाः मस्त प्याखँ हुइकातःगु झीसं नं खंकाःच्वना । तर म्येया अर्थ मथुइकं शब्दया तालय् प्याखँ हुलाच्वंपिं मस्तय्सं खाइसी व झम्सीया अर्थयात खाइसी झम्सी हे तायेकुसां वय्स्कतय्गु मनोविज्ञानं उगुकथं धाःसा कायेफयाच्वनिं मखु ।
