न्ह्यः खँ
थौं सिबें ६४ बर्ष न्ह्यः दयेकातःगु छपू म्येयात मूर्त रूप बिइगु झ्वलय् मछालेगु बानी बोलया म्ये पिदंगु दु । थुगु म्ये प्राध्यापक सुवर्ण शाक्यं च्वयातःगु म्ये खः । म्येया संगीत न्हापा हे तयातयेधुंकुगु खःसां थुगु म्येयात न्ह्यु बज्राचार्यं ओरिजिनल सिबें पाक्क लय् चिनातःगु खः अले म्येया एरेन्ज गोपाल रसाइलिं यानातःगु दु । म्ये निशा देशारं हालातःगु खः ।
थुगु म्ये रेकर्ड जुसां निसें हे टिकटक दयेका प्रचार प्रसार यानाच्वंगु खः । थ्व हे कारणनं थुगु म्ये जनमानस दुने भ्यलय् पुनाच्वंगु नं खः । यक्वस्यां हे थुगु म्येया स्थाइयात कयाः टिकटिक दयेकातःगु सामाजिक संजालय् खने दइ ।
म्ये
म्येया बोल थौं सिबें ६४ बर्ष न्ह्यः च्वयातःगु म्ये खः । दबू प्याखंया संस्कारयात न्ह्याकेगु झ्वलय् ६४ बर्ष न्ह्यः हे च्वयातःगु थुगु म्ये कम्पोज जुसां रेकर्ड धाःसा मजूनिगु खः । ६४ बर्ष न्ह्यः च्वयातःगु थुगु म्येया च्वमि प्रा. सुवर्ण शाक्यं थुकी यौन मनोविज्ञानयात बः बियाः च्वयातःगु खनेदु । साहित्यकारया रूपय् प्र्रा. सुवर्ण शाक्यया बाखनय् आपाः धैथे हे यौन मनोविज्ञान दइगु याः उकिं थुगु म्येय् नं वय्कया थुगु विधाय् ब्वलनाच्वंगु खनेदु । थौं सिबें ६४ वर्ष न्ह्यः दबू प्याखनय् मिसामचा तकं दबुलिइ दँ मवइगु स्थीतिइ छम्ह मिसा मचाया यौवन जायाःवयाः मछालेगु बानी ब्वलनावःगु खँयात म्येय् न्ह्यब्वयातःगु दु । मचा जुयाः म्हिते जि मगाःनी तर नं मछालेगु बाःनि गनं वल धैगु भाव थुकी दु । थुगु हे मनोभावय् पुरा म्ये न्ह्यानाच्वंगु दु । म्येया संगीत न्ह्यु बज्राचार्यं तयातःगु खः । ताः ई लिपा हे न्ह्यु बज्राचार्य नेपालभाषा ख्यलय् पलाः तःवःगु दु । संगीत ख्यलय् न्ह्युबज्राचार्यया थुगु पलाः तसकं हे सामान्य म्ये कथं पराम्परागत म्येयात निरन्तरता बियाःच्वंगु खनेदु । लसय् मेलोडी दु तर पुरा म्येय् छथी हे लसय् जक लानाच्वंगु दु । म्येया शब्दं म्येयात न्ह्यइपुकाच्वंगु ताइ । उकथं हे सुरया धनी निशा देशारया सलं म्येयात जीवन्त यानातःगु दु । तसकं हे ल्वयेक मिसा सः थुकी दु । म्येया एरेन्ज नं पुलांगु पारम्पकि बाजंयात थाय् बियातःगु दु । म्ये न्यनिबलय् समग्र पारम्परिक म्ये थें ताःसां ६४ वर्ष न्ह्यः धाःसा थुगु म्येयात अतिआधुनिक म्ये कथं हे नालेमाः छाय् धाःसां उगु इलय् मिसामस्तय्गु मनोभावयात थुइकाः म्ये च्वयेगु व पिथनेगु धैगु छगु युगीन क्रान्तिकारी पलाः कथं नाले माः ।
भिजुअल
भिजुअल कथं मछालेगु बानिइ नेरिसा महर्जन, मनोज महर्जन, रवि डंगोलया अभिनय् दु । ताः ई लिपा रवि डंगोल नं थुकी खने दः वःगु दु । छम्ह मिसा मचा म्हितु म्हितुं मेम्ह हे मिजं लिसे नापलायेवं मिसाया छेँय् ब्याहाया खँ न्ह्याइ अले मिसा मचा बियाः छ्वइ । भिजुअलं कनाच्वंगु थुलि हे खः । मुलतः म्येय् न्ह्यब्वयातःगु बाखंकथंया अभिनय् सकसिया बांलाःजु । छम्ह मिसा मचाया मनय् वइगु ह्यूपाःयात नेरिसा महर्जनं यइपुक्क अभिनय पाखें न्ह्यब्वयातःगु दु । मनोज महर्जन सपोर्टिंग भुमिकाय् दुसा रवि डंगोलं छम्ह बौया भुमिकाय् जीवन्तरूपं अभिनय् यानाच्वंगु दु ।
भिडियोस न्ह्यब्वयातःगु बाखं स्पस्ट व सल्ल रूपं न्ह्यानाच्वंगु दु । भिडियोलय् न्ह्यब्यातःगु बाखनय् निर्देशक सुजन बज्राचार्य ख्वपय् ताः लानाच्वंगु दु । भिडियोया दक्वं धैथे शट क्लोज शट जक वनाच्वंगु दु । म्येया बाखँ कथं आर्ट निर्देशननं बांला । भिडियो सल्ल वनाच्वंगु दु । स्वइपिन्त पुंलांगु नेवाःतय्गु अतित् लुमनां वइगु स्वभाविक ख। भिडियो सकसितं यइगु खँय् शंका यानाच्वने म्वाः ।
आलोचना
मछालेगु बानि गनं वल बोलया म्येय् छता निता खँ धाःसा कन्ट्राय्डिक्ट जुयाःच्वंगु नं तायेकेफइ । गथेकि छम्ह नच्चाम्ह ल्यासे मय्जुं थः म्हिते हे मगाःनि धकाः थःगु अवोध पन न्ह्यब्वयाःच्वंगु दु तर निगुगू लाइनय् धाःसां मां बौनं बिया छ्वये मधाःनि धयाःच्वंगु दु । थुगु निगु लाइनय् कन्ट्राडिक्शन जुयाःच्वंगु दु । छम्ह मचां थःके मछालेगु बानी गनं वल धैगु न्ह्यसः तयाःच्वंगु दुसा व हे मिसा मचां मां अबुं बियाछ्वये मधाःनिं धैगु लाइनं थुम्ह मचां व्याहा जुइगु बिषयलय् स्युगु खँ जुल । च्वमिया
रुपय् छम्ह वयस्क मिजं च्वमिं छम्ह मिसा मचाया भावयात न्ह्यब्वइगु इलय् थुकथंया विचाः मब्वलनिगु स्वभाविक खँ खः । तर थौं सिबें ६४ बर्ष न्ह्यः थुलि शब्द च्वयेगु नं म्हो खँ धाःसा पक्कां मखु ।
६४ वर्ष न्ह्यः हे तयार जुइधुंकुगु म्ये थौंया इलय् हाकनं रेकर्डिंग जुयाः भिडियो तयार याःगु दु । तर म्यें छु धयाःच्वंगु खः धैगु खँ परिकल्पना याइम्हेस्यां भिडियोलय् क्यनाच्वंगु मदु । म्ये केवल छता हे जक खँ धयाच्वंगु दु कि छम्ह मिसा मचायाके मछालेगु बानी गनं वल ? थ्व तसकं हे थाकुगु खँ खः । यौन मनोविज्ञानंयात अंकित यानाच्वंगु थुगु म्येया भावयात छगू बाखंया रूपय् न्ह्यब्वयाः प्याखँ हे दयेकाब्यूगु दु । थुकींयानां म्येया मर्म तनाच्वंगु दु । म्येय् यक्व हे मेहनत याना तःगु दु । म्येया अनुरूप परिकल्पनाय् ध्यान ब्यूगु जुसा म्ये अझं मेगु हे लेभलय् वनीगु खः ।
भिजुअलया दक्व धैथे शट क्लोज शट्स जक म्हिता तःगु दु । थाय्बाय् स्टाय्ब्लिस यायेगु निंतिं थुकी वाइड शटस्या नं उतिकं हे आवश्यकता दुगु खः । म्येया बोल मछालेगु बानी गनं वल धकाः मू पात्रया मनोभाव क्येनमाथाय् नं निर्देशकं बाखंया भावय् ब्वाकाच्वंगु वाःचाइ ।
उकथं हे थुगु म्येया विषयलय् ज्याझ्वः यानां प्रिमियर यायेत स्वःगु खत । प्रिमियरय् आमन्त्रण यानां सिटिसि मलय् ५ मिनेटया म्ये क्यनेत २ घण्टाया ज्याझ्वः यात । तर नं तक्निकि कारणं म्ये धाःसा क्यने मफूत । थौंकन्हे ईया अभाव सकसितं जुयाच्वंगु इलय् थुकथंया लापर्वाही ज्याखँ सुयातं यइमखु । म्यूजिक भिडियोया प्रिमियर सिबें भाषण व मेमेगु ज्याखँयात बःबिइगु जुइवं म्यूजिक भिडियो स्वःयेगु ज्याखँ हे छखे लानाच्वंगु खँ ग्वसाः खलः एवं निर्माता पुचः मोतिहर्ष फाउण्डेशनं वाःचायेके माः ।
लिखँ
समग्रय् मछालेगु बानी म्ये छगू सुमधुर म्ये जुइत ताः लाःगु दु । म्येया शब्द फुक्कं स्पष्ट व संगीतय् छुं कथंया एक्सपेरिमेन्ट मयाःसे पारम्परिक लय्यात निरन्तरता बियाःतःगु कारणं न्यनिपिन्त कर्णप्रिय ताइ । म्येया बाखनय् छगू पुलांगु परिवेशया घटना न्ह्यब्वयातःगुलिं स्वकुमिपिं व हे परिवेशय् तनां वनाच्वंगु धाःसा खंकेफइ । । म्येया परिवेशं व सुमधुर सलं थुगु म्येयात अतिकं हे यइपुगु दयेकाब्यूगु दु ।
