मनोरंजन ख्यः थौंया इलय् छगू लाज्याः जक मखय् धुंकल । याइपिंसं थन मनोरंजन जक बियाः लाखौंतका कमेयानाच्वंपिं नं दु । तर थ्व हे खँय् धाःसा नेवाः मनोरंजन ख्यलं वाःचायेके मफू । थौंया स्थीतिइ सामाजिक संजालय् यु्ट्युब, इन्स्टाग्राम, टिकटक् व आः वयाः फेसबुकं तकं नं आर्य आर्जन याये फइगु स्थीति ब्वलने धुंकूगु दु । थुकि मध्ये नं युट्युब तसकं हे गतिशिल रूपं न्ह्यानाच्वंगु छगू सामाजिक संजालया प्लाय्टफर्म खः ।
छुं नं सामाजिक संजाल पाखें आय आर्जन यायेगु निंतिं दकलय् न्हापां थःगु हे छगू पुचः आवश्यकता जुइ । छाय्की थःगु निश्चित पुचः मदयेकं थःगु प्रभाव सामाजिक संजालय् क्यने फइ मखु । थ्व हे कारणनं सामाजिक संजालय् गथेकि युट्युबय् म्होति नं द्वछि सब्सक्राइबर व ४००० घण्टा च्यानलया भ्यूअरशीप दयेधुंकुगु जुइमाः । थ्व छगू अतिकं सामान्य मापदण्ड कथं नालेमाःगु खँ खः । झीसं द्वछि मनूया हे संजाल दयेके मफूसा गथे थःगु प्रभाव समाजय् क्यनेफइ ? थौंया इलय् नेपालभाषा ख्यलय् आपलं नेवाः कलाकरपिंसं नं थःगु एकाउन्ट चायेकातःगु दु तर नं गुलिस्यां एकाउन्टय् द्वछि सब्सक्राइबर तकं मदु । छु द्वछि सब्सक्राइबर तकं दयेके मफूगु धात्थें खैला ? थुकियात हाथ्याःया रूपय् नेवाः कलकारपिंसं कायेमाः अले म्होति नं न्हापां द्वछि सब्सक्राइबर थ्यंकेगु कुतः यायेमाः छाय्की कन्हे वयाः सुं नं लगानीकर्तां थःगु विज्ञापनया पहुँच द्वछि सब्सक्राइबर हे मदुगु च्यानलय् विज्ञापन याये चाहे जुयाः च्वनिं मखु । यथार्थय् स्वयेमाल धाःसा थौं युट्युबय् लोकंह्वाःपिं नेवाः कलाकारपिं सिबें सामान्य छम्ह युट्युबर सिबें ल्यूने लानाच्वंगु दु । युट्यबय् छखे ला ओरिजिनल कन्टेन्टया आवश्यकता दु । उकिं याना नं युट्य्ुबया महत्व आपाः खने दु । छम्ह आर्टिष्टयात युट्युबया कन्टेन्टं वैगु क्षमता ब्वयेगु अवसर व प्लाय्टफर्म बियाच्वंगु दु।
सामाजिक संजालय् फलोअरशिपया कारणं हे छम्ह आर्टिस्टया मूल्य सिइदइगु खः । छम्ह आर्टिष्टया प्रभाव समाजय् गुलि तक्क लाः धैगु खँ हे अवसर त वइगु खः । थौंया इलय् कलाकारयात जक अवसर मखुसे उत्पादकतय्त नं अवसरया आवश्यकता जुयाच्वं । सामाजिक संजालय् छम्ह कलाकारं मेगु यायेमाःगु ज्या धयागु मद्दिक्क हे न्हू न्हूगु सामाग्री वा कन्टेन्ट बियाः हे च्वनेमाः । थ्व हे कन्टेन्टया आधारय् हे वयागु फलोअर्स संख्या बढे जुइगु खःसा सामाजिक संजालय् गुगु कथं थःत न्ह्यब्वयेगु धैगु खँय् नं कलाकार सचेत जुयाच्वने माः ।
थौंया इलय् न्हापा थें मिडिया प्लाय्टफर्मया आवश्यकता मदये धुंकल । मात्र थःके दुगु स्मार्ट मोबाइलया भरय् संसार लिसे स्वये फइगु अवस्था जुइ धुंकल । उकिं दकलय् न्हापां थःगु क्षमताय् विश्वास यानां संसार लिसे स्वायेगु कुतः यायेमाः ।
