निक्व:गु नेपालभाषा स्टार म्युजिक भिडियो अवार्डया औपचारिक समापन ख्वपया योयो ब्याँक्वेटय् क्वचायेकल । ज्याझ्व:लय् अवार्ड विजेता पिंत लिसें अवार्डय् सम्मान का:पिन्त नं प्रमाणपत्र ब्युगु ख:सा आर. बि. फिल्मस् पाखें त्या:पिं सकसितं नं भिंतुना पौ ब्यूगु ख: ।
अथेहे निक्व:गु नेपालभाषा स्टार म्युजिक भिडियो अवार्ड ज्याझ्व:लय् ग्वाहलिया:पिं व प्रायोजकपिंत नं दसिपौ ल:ल्हा:गु ख: । वरिष्ठ सिने पत्रकार विजयरत्न असंबरें प्रमाणपत्र ल: ल्हानादिगु ख:सा आर. बि. फिल्म्सया प्रवन्ध निर्देशक रविन्द्र शाहिं भिंतुना पौ ल:ल्हानादिगु ख: । भक्तपुर इन्टरनेशनल हस्पिटलया उपाध्यक्ष अशोक कुमार श्रेष्ठं खादा न्येका: सम्मान या:गु ख: ।
नुग: खँ तयेगु झ्वलय् वरिष्ठ सिने पत्रकार बिजयरत्न असंवरें नेपालभाषाया आन्दोलनयात लुमंकुसें न्हापा नेपालभाषां न्ववायेतकं मब्यु्गु ई व थौं अवार्ड ज्याझ्व: जुया: नेपालभाषाया अवार्ड हे न्ह्यानाच्वंगु खँया मूल्यांकन याना दिल । आर. बि. फिल्म्सया प्रवन्ध निर्देशक रविन्द्र शाहिं कला क्षेत्र व कलाकारयात सकस्यां मतिनायाना: हे च्वनेमा: धैगु खँ प्वंकादिल । संसार क्रिएसन्सया क्रिएटिभ डाइरेक्टर स्वतन्त्र महर्जनं अवार्डया स्वंगूगु संस्करण जुइगु प्रतिवद्धता लिसें निक्व:गु नेपालभाषा स्टार म्युजिक भिडियो अवार्डया औपचारिक समापन यानादिल ।
