न्ह्य:खँ
नेपालभाषाया न्हूगु संकिपा गालय् वन थौंकन्हे चर्चाय् दु । थी थी थासय् थुगु प्याखँया प्रदर्शन जुयाच्वंगु दु । छगू निश्चित श्रोत साधनं निर्माण यानात:गु थुगु प्याखनं गुलि चर्चा का:गु दु अवश्य नं थुगु चर्चां मेमेगु नेवा: प्याखँ निर्माण यायेगुलिइ सकसितं ह:पा: वनिगु खनेदु । न्हू दँया ज:ख: प्रदर्शन जूगु थुगु प्याखनं यक्व हे स्वकुमिया नुग: सालाका:गु नं खने दु ।
बाखं
गालय् वन शब्द न्येनिबलय् गुलि थुकीया अग्यानिक पह: दु । झट्ट न्यनिबलय् थुगु प्याखँया नामय् नकारात्मक प्रभाव दु थें च्वंसां थुगु प्याखनं कनाच्वंगु बाखं व सन्देश सकारात्मक जु । गालय् वनया अर्थयात यक्व तिफ्यानाच्वन धा:सानं प्याखँ स्वयेगुया मज्जा मवयेफु उकिं थुगु प्याखँया चर्चा यायेगु इलय् थ्व खँ नं ध्यानय् तयेमा: कि प्याखँया बाखँ तसकं हे सामान्य व सतिक जूगु कारण ं प्याखँ स्वयेगुया रोमांच स्यंके मज्यु ।
सामान्य रुपं धायेगु ख:सा थुगु प्याखँया बाखनं छगू परिवार दुने थौंया इलय् तकं जुइफइगु घटना न्ह्यब्वयात:गु दु गन खँया खँ मदया: वा सामान्य मतभेदया कारण निगू परिवार हे बाया वना च्वनेमा:गु अवस्था ब्वलनाच्वनिं । तर नं अन्तय् हरेक पारिवारिक प्याखनय् सुखद मिलन जुइ थें थुगु प्याखनय् नं मिलन जुइगु हे क्यनात:गु दु ।
कलाकार
कलाकार कथं शोभा महर्जनं थुकी थ:गु क्षमता न्ह्यब्वयात:गु खंके फइ । न्हापाया संकिपा सिबें शोभा महर्जनं गालय् वन प्याखनय् अभिनय् बांलाक्क यानात:गु वा: चाइ । शोभा महर्जनया क्यारियरय् थुगु प्याखं छगू टर्निंग प्वाइन्ट जुइगु खँय् शंका मदु ।
तता: व किजाया स्वापू न्ह्यब्वयात:गु थुगु प्याखनय् बिज्ञान पक्काया अभिनय् नं स्वयेबह: जु । तता:या योम्ह किजाया भुमिकाय् बिज्ञानया अभिनय् पत्या: यायेबहजू खने दु ।
किरण जोशी छम्ह मतिनामि लिसें नायकया भुमिकाय् दु । किरणया अभिनय नं बांला: जु । थ्व लिसें हे कमल प्रसाद भट्ट, मंजु श्रेष्ठ, अन्नपुर्णेश्वरी श्रेष्ठ लगायतया आपलं कलाकारया अभिनयलं प्याखँयात यक्व हे सशक्त यानाब्यूगु दु । थुगु प्याखँया बांलागु पक्ष हे कलाकारपिनिगु अभिनय ख:। मार्मिक दृष्यत कलाकारया अभिनयलं जिवन्त यानाब्यूगु नं दु । गुलिं गुलिं दृष्यय् स्वकुमिया नुग: खुल्ल मिनिगु लिसें मिखा तकं प्याका: नं बिइ ।
मेमेगु पक्ष
लाकेशन लिसें वस: नं थुगु प्याखँया बांला जु । बाखँया थीमय् नेवा: पह दु । प्याखँनय् बिजिएम अर्थात ब्याकग्राउण्ड म्युजिकय् नं कुत: यानात:गु दु । प्याखँयात सन्तुलन यायेगु निंतिं म्ये व द्वन्द नं दुथ्याकात:गु दु । पूर्णमान महर्जनया सलय् तये हयेला अय्ला बोलया म्ये दु । थुगु म्येया संगीत संयोजन जीवित जल्मिं यानात:गु ख:सा प्याखनय् छगू मोड बिइगु कथं थुगु म्येयात छ्यलात:गु दु । अथेहे प्याखनय् लक्ष्मी प्रसाद भैल:या द्वन्द नं दु । प्याखँया परिवेश कथं ल्वयेक द्वन्द न्ह्यब्वयात:गु दु ।
निर्देशनय् संयुक्त स्थापितया थुगु प्याखँ छगू नेवा: परिवेशयात क:धानाच्वंगु वा:चायेके फइ । कलाकारपिसं निर्देशकया क्षमता अनुरुप हे न्ह्यानाच्वंगु खंके फइ । विषय वस्तु नं भचा संवदेनशील जूगु हुनिं कलाकारपिनिगु अभिनय् क्षमताय् नाटकीयपन नं म्हो हे दु । तर अथे ख:सां प्याखँया मेमेगु पक्षंयानां प्याखँ स्वयेबलय् गुलि सल्ल वनेमा:गु ख: उलि मवं ।
आलोचना
गालय् वनया दकलय् कमजोर पक्ष थुकीया टेक्निकल पक्ष खनेदु । प्याखनय् बांलाक्क क्यामरा वर्क व सम्पादन जुइमफूगु कारणं प्याखँ गुलि सल्ल न्ह्या: वनेमा:गु ख: बिचा: या:कथं मवंगु वा:चाइ । म्वा:गु दृष्यया आपा: फुटेज व मा:गु दृष्ययात म्हो फुटेज बियात:गु थुगु प्याखँया मू कमजोरी ख: । थुकींयाना प्याखँया अन्त गुलि प्रभावशाली याना क्यने ज्यूगु ख: व कथंया क्लाइमेक्स जुयाच्वंगु मदु । गनं गनं दृष्य आपा जुया: दक्युमेन्टरी स्वया: च्वना:गु थें जुइ । थुकिं यानां दृष्यं माग यानात:गुयात क्वात्तुक्क ज्वने मफू ।
थ्व लिसें हे थुगु प्याखँया मेगु कमजोरी स्क्रीनप्ले जुयाच्वंगु दु । गुगु दृष्य गपाय् हाक: यायेगु लिसें कलाकारया चरित्रयात गथे याना न्याय यायेगु धैगु खँय् ध्यान बियाच्वंगु मदु । च्वमि गन गन न्ह्या: अन अन कलाकार न्ह्याने थने हयाच्वंगु दु अले म्वालकि तंका: छ्वयेगु यानाच्वंगु दु । प्याखनय् कलाकारया चित्रणयात न्याय् याये मफूत धा:सा वा न्ह्या: न्ह्या: थे चित्रण जुयाच्वन धा:सा समाजय् गलत सन्देश नं वनिं । उकिं प्याखँ च्वयेगु वा दयेकेगु धैगु अ:पुगु खँ मखु । छाय्धाा:सां छगू प्याखँयात हजारौं मनुखं स्वया: प्याखँया प्रभावय् तक्यनाच्वंगु नं दइ ।
लिखँ
छगू निश्चित बजेटं ज्या न्ह्याकाच्वंगु खँ वा: चायेकफइ । प्याखनय् टेक्निकल कमजोरी दुसां प्याखँया बाखँ मार्मिक व नेवा: समाजलिसे स्वानाच्वंगु कारणं प्याखँया कमजोरी ल्वमनां वनि । प्याखँ स्वइगु इलय् नेवा: बाखँ स्वयाच्वनागु ताया:वइ गुकिं गालय् वन संकिपा सार्थक जूगु ताइ । थुगु प्याखँयात निर्माता अजय दुवालयात थुगु कुत:या निंतिं नं सुभाय् देछाय्मा: ।
प्याखनं सामाजिक बाखँया लिधँसाय् निर्माण यानात:गु कारणं स्वकुमिया ध्यान सालाकायेफूगु खनेदु । थौंया नेवा: प्याखनय् नेवा: समाजया वाखँ न्ह्यब्वयेगु म्हो जुया: वनाच्वंगु खंके फइ । थुगु प्याखनं थौंया समाजया न्हाय्कं हे क्यंगु थ्यंक धाये मछिं तर नं थौंसिबें ४०/५० र्दँ न्ह्य:या पवरिवेश न्ह्यथनात:गु दु । गुकिं प्याखँ स्व:वपिनिगु मनय् थ:पिंसं हे खना:गु घटना हलया पर्दाय् खंका:गु अनुभव थुगु प्याखँ स्वया: काये फइ ।
