नेपालभााषाया अतिकं हे बहुप्रतिक्षित म्ये मछालेगु बानी गनं वल बोलया म्येया प्रिमियर येँया सिटिसि मलय् जुल । थौं सिबें थ्यं मथ्यं ६४ बर्ष न्ह्य: हे प्रा. सुवर्ण शाक्यं च्वयादीगु थुगु म्येयात हाकनं न्हूगु लसय् व न्हूगु हे संगीत संयोजनय् निशा देशारया सलय् पिथंगु ख: । म्येया संगीत न्ह्यु बज्राचार्यं तयादीगु ख:सा संगीत संयोजन गोपाल रसाइलिं यानादीगु ख: ।
मोतिहर्ष फाउण्डेशनया ग्वसालय् छगू औपचारिक ज्याझ्व: याना: कलाकार व प्राविधिकपिन्त नं सम्मान व मतिनाया चिं ल:ल्हा:गु ख: । ज्याझ्वलय् म्हमफया उसाँय मदयाच्वंम्ह प्रा. सुवर्ण शाक्यया ब:चा हाक:गु भिडियो सन्देश म्येया बिषयलय् न्ववा:गु नं क्यंगु ख: । थौं सिबें ६४ बर्ष न्ह्य: हे च्वयात:गु थुगु म्येय् छगु जिवन दर्शन सुला:च्वंगु खँयात वय्कलं ब: बिया:दिगु ख: ।
म्येयात सुजन बज्राचार्य ‘ख्वपे’ नं निर्देशन यागु ख:सा थुकी थौं कन्हेया लोकंह्वानाच्वंम्ह मय्जु नेरिसा महर्जन व मनोज महर्जनया जोडी दु । व लिसें थुकी लोकंह्वा:म्ह कलाकार रवि डंगोलया नं अभिनय् दु ।
म्येय्या परिकल्पना केविएसं यानात:गु दु । छायाँकन व सम्पादन शैलेस श्रेष्ठ लुभुं यानात:गु दु ।
