राष्ट्रिय समाबेशी म्युजिक अवार्ड –२०७९ या खुक्वःगु संस्करणय् उत्कृष्ट गायक व उत्कृष्ट म्ये च्वमिया अवार्ड राजेन्द्र डंगाेल व प्रकाश ‘दिप’ श्रेष्ठं त्याकुगु दु । राजेन्द्र डंगाेलं चकना चकना बाेलया म्ये पाखें उत्कृष्ट गायकया अवार्ड त्याकुगु खःसा उत्कृष्ट म्ये च्वमि प्रकाश ‘दिप’ श्रेष्ठया पुलुपुलु जितः बाेलया म्ये पाखें त्याकुगु खः ।
संघीय मामला तथा समान्य प्रशासन मन्त्री अमनलाल मोदी मूपाहाँ अले पूर्व सभामुख चित्रलेखा यादवया विशिष्ट पाहाँसुइ जूगु अवार्ड ज्याझ्वलय् ४२ विधाय् अवार्ड लःल्हागु खः । अवार्डय् जनजाति मातृभाषी समाबेशीपाखे उत्कृष्ट नेपालभाषा म्येया अवार्ड प्रकाशदिप श्रेष्ठ व नेपालभाषा गायनया अवार्ड राजेन्द्र डंगोलं सिरपा त्याकुगु खः ।
ज्याझ्वलय् साँफेबगर आछाम मेयर राजेन्द्रबहादुर कुँवर, काभ्रे भुम्लु गा.पा. उपाध्यक्ष जितेन्द्रमाना तामाङ, गायिका केन्जुमा सुब्बा, संगीतकार शँकर थापा स्माईल लगायतयात नं सम्मानित याःगु खःसा मन्त्री अमनलाल मोदी, पूर्व सभामुख चित्रलेखा यादब, अग्रज अभिनेत्रीहरु बसुन्धरा भुसाल, चैत्यदेवी सिंह, कार्यक्रम सभापति शान्तिप्रिय, आयोजक संस्था अध्यक्ष चलचित्र निर्देशक माधवराज खरेल, कार्यक्रम संयोजक कमला जोशी , सुर्य चन्द पिन्सं सम्मान लःल्हागु खः ।
नेपाली सहित थीथी भाषाया गीत संगीतया विकाश व हःपाः या लागिं खुदँ न्ह्यःनिसें अवार्ड ग्वसाः ग्वया वया च्वंगु पिम नेपालया अध्यक्ष माधवराज खरेल खः ।
अवार्डया निर्णायकय् संगीतकार जुगल डंगोल, गीतकार भरत बम्जन, मोडल सनम कठायत, भिडियो निर्देशक कल्याण अधिकारी, चलचित्र/ भिडियो छायाँकार कृष्णबहादुर थापा, गायक ओम सुनार, संगीतार योगेन्द्र उपाध्याय, गायिका कालिका रोक्का लगायत च्वनादीगु खः ।
