नेपालभाषा म्यूजिक भिडियो ख्यलय् तसकं हे बय्बय् जुयाःच्वंगु नां खः रामकृष्ण खड्गी । रामकृष्ण खड्गी थौं कन्हे नेपाः टिभि एचडीया चीफ् जुयाःच्वंगु दु सा वय्क छम्ह अतिकं नां जाःम्ह संकिपाः लिसें म्यूजिक भिडियोया निर्देशक नं खः । वय्कयाः हे निर्देशनय् छक्वलं न्यापू म्यूजिक भिडियोया प्रिमियर जूगु दु ।
अकसर नेपालभाषा ख्यलय् छपू म्येया म्यूजिक भिडियो प्रिमियर जुइगु याइ तर थुपिं न्यापुं हे म्यूजिक भिडियो म्ये च्वमि निरंजन रत्न शाक्यया च्वसां पिज्वःगु जुयाः थुगु न्यापुं हे म्येया छक्वलं प्रिमियर जूगु खः । लिसें न्यापुं हे म्येया संगीत रीता महर्जनं तयादीगु दु । लिसें भिडियो सम्पादन नं बालकृष्ण वंशीं याःगु खः ।
न्यापुं म्ये कथं जिन्दगी होसय् मदु, अय्ला अय्ला, हुलय् नं याकःचा, वइबिल छ व योम्ह छ ययेकुम्ह छ खः ।
जिन्दगी होसय् मदु म्यय् शोभा महर्जन, वत्स शाक्य, सरीना वज्राचार्यया अभिनय् दु । थुगु म्य् संगीता शाक्यं हालादीगु खः सा छायाँकन रक्की महर्जनं याःगु खः ।
अय्ला अय्ला म्येय् रीता महर्जन व भुपेन्द्र बज्राचार्यया सः दु । थुगु म्येय् रोजिना सुवाल, अमोघवीर बज्राचार्यया अभिनय् दु । म्येया छायाँकन रक्की महर्जनं याःगु खःसा नृत्य राजन शाहीं निर्देशन यानातःगु दु ।
हुलय् नं याकःचा बोलया म्ये रीता महर्जनं हालातःगु खः । थुगु म्येया छायाँकन रक्की महर्जनं यानातःगु दु । कलाकार कथं थुकी हसना महर्जन, युगेन शाक्य व निभाः डंगोलया अभिनय दु ।
वइबिल छ बोलया म्ये वरिष्ठ म्ये हालामि योगश वैद्य व रीता महर्जनया सः दु । थुकीया छायाँकन लूःजः सिंहं याःगु खः ।
योम्ह छ ययेकुम्ह छ बोलया म्येय् सृष्टि महर्जन व अनुज शाक्यं म्हिताच्वंगु दु। म्येया कोरियोग्राफ सृष्टि महर्जनं याःगु खःसा छायाँकन रक्की महर्जनं यानातःगु दु ।
येँया सिटिसि मलय् थुगु म्येया प्रिमियर जूगु खःसा नेवाः न्ह्यलुवाः मल्ल के सुन्दर मूपाहाँ कथं झागु खः ।
