निर्देशक रवि साय्मिया न्हूगू नेपालभाषाया संकिपाः तिबः (the support) या मूहुर्त काठमाडाैं नेवाः किण्डरगार्टेन स्कूलय् जुल । सर्जु रंजित व समिता रंजित श्रेष्ठया न्हापांगु पलाः लिसें वाइल्ड बुल प्राेडक्शनया न्ह्यब्वयाय् नेपालभाषाया थुगु प्याखं तिबः (the support) या ज्या न्ह्याकुगु खः ।
ओम शंकर श्रेष्ठया बाखनय् कलाकार कथं सुशिल राजाेपाध्याय्, आशाकाजी थकु, संघरत्न शाक्य, पुस्करभक्त माथेमा, कृष्णभक्त महजर्न, सरस्वती मानन्धर, मैंया मुनिकार, सुनिता ठाकुर, कंचन तुलाधर लिसें आपलं कलाकारपिं थुकी दुथ्यानाच्वंगु दु ।
प्याखनय् राजेन्द्र महजर्न, ओम शंकर श्रेष्ठ व सुशिल राजाेपाध्याय्या च्वसाय् शिव शाही व भुपेन्द्र बज्राचार्यया संगीतय् सर्जु रंजित व सतिश महर्जनया सलय् म्ये दुथ्यानाच्वंगु दु । अाकिवं हे थुगु प्याखँया क्यनेगु ग्वसा थुगु प्याखँ निर्माण पक्षाया दु ।
प्याखँया छायाँकन, कलर करेक्शन अमर चित्रकारं यायेत्यंगु दुसा, प्याखँया पटकथा ओम शंकर श्रेष्ठ, सुशिल राजाेपाध्याय् व रवि साय्मि जानां च्वःगु खः । थुकीया सम्पादन वाइल्ड बुल्स प्राेडक्शन, अमर चित्रकार व सुब्रिना चित्रकारं यायेत्यंगु दु ।
थुगु प्याखँया छुं छुं अंश अमेरिकाय् नं जुइगु खँ निर्माण पक्षं जानकारी ब्यूगु दु ।
