कटारय् जुयाच्वंगु फिफा विश्वकप २०२२या लहर विश्वन्यंकं हे न्ह्याच्वंगु दु । विश्वकपया लहर दुने फुटबलकासाया प्रसंशक पिंसं अनेक कथंया ज्याखँया चर्चा जुयाःच्वंगु दइ । गुलिं मनू विश्वकपया मैदानय् वनां फुटबल स्वः वनाच्वनिं, गुम्हेस्यां विश्व कप हे थःगु देशय् निर्माण यानाच्वनिं । थ्व हे झ्वलय् फुटबलया छम्ह प्रख्यात प्रशंसक अले छैमले रिसोर्टया थुवाः बिजय श्रेष्ठं नेपालय् हे विश्वकपया ट्रफि दयेकुगु दु ।
विश्वकपया ट्रफिया निंतिं थी थी देश फुटबलया मैदानय् ल्वानाच्वंगु अवस्थाय् झी थाय् नेपालय् हे आः विश्वकपया ट्रफि तयार जुइधुंकुगु दु । तर थुगु ट्रफि धाःसा ल्हातं ल्ह्वने फइगु अवस्था मदु छाय्की थुगु ट्रफि मुक्ंक ५ फिटया दु अले थुगु ट्रफिया तौल नं निर्माण याःगु झ्वलय् १५० केजि दु । विश्वकपया ट्रफि निर्माण यानाः छैमले रिसोर्टय् ब्वःगु दु । थुगु ट्रफि लिसें दनां फोट कायेगु धाःसा याये फइ ।
छैमले रिसोर्टय् ५ फिटया विश्वकप ट्रफि जक मखुसे ८ फिटया बलनं दयेका तःगु दु । फुटकलया शौखिन विजय श्रेष्ठं फुटबलया लोकंह्वाःपिं कासामियानं कट्आउट दयेका तयातःगु दु सा रिसोर्टय् मिनि फुटसल कोर्ट नं दयेकातःगु दु ।
विश्वकप २०२२ स्वयेगुनिंतिं छैमलया चकं दबू लिसें सेमिनार हल व बारय् नं टिभिया ग्वसाः ग्वयाःतःगु दु ।
विश्वकप ट्रफि
विश्वकपया ट्रफि छाय् दयेकाःगु धैगु न्ह्यसःया लिसःलय् बिजय श्रेष्ठं धयादी की थः फुटबलया प्रशंसक जूगुलिं थी थीकथंया शोख पुरा यानाच्वनागु खँ पेजथ्रीयात कंगु दु । थ्व सिबें न्हापा नं मोहनीया इलय् दकलय् तःपाःगु भुतुमाली दयेकाः ब्वयेकाःगु खँ नं वय्कलं लुमंकादील सा विश्वकपया ट्रफि नं थःगु हे मनय् दुने सुलाच्वंगु मनसुवाः खः धकाः कनादील ।
थुगु ट्रफि दयेकेत श्याम तुलाधरया पुचः एवं परिवारं भाला काःगु खः । मुक्कं लच्छी धैथे ई काःगु थुगु ट्रफिइ श्याम तुलाधरया स्वंगु पुस्तां उतिकं हे मेहनत व लगनशीलतां ट्रफि निर्माण जूगुलिं विजय श्रेष्ठ तसकं लयलय्ताःयाच्वंगु नं दु ।
