कासा मध्ये फूटबल कासा तसकं लोकंह्वाःगु कासा खः । थौंकन्हे थथे लोकंह्वाःगु कासा फूटबलया वल्र्ड कप कतारय् जुया च्वंगु दु । संसारया दक्व देशं ब्वति काइगु थ्व वल्र्ड कप कासाय् थी थी क्वालिफाइंग राउण्ड त्याका फाइनल राउण्डया निंतिं सेलेक्ट जुइ । थथे सेलेक्ट जूगु स्वीनिगु देश दथुइ फाइनल राउण्डया कासा जुइगु खः । थ्वहे फाइनल राउण्डया वल्र्ड कप फूटबल कासा कतारय् जुया च्वंगु खःसा थुकियात हे वल्र्ड कप फूटबल कासा धका धाइ । थ्व इलय् संसारय् न्यंक्कभनं वल्र्ड कप फूटबल कासायात कया चिउता ब्वलना च्वंगु दु । नेपालय् नं थुकियात कया चिउता ब्वलनिगुला स्वाभाविक हे खः तर नेपालय् प्रतिनिधी सभा व प्रदेश सभाया चुनाव जूगु दिं व कतारय् वल्र्ड कप शुरु जूगु दिं छन्हू हे लानाबिल । उकिं याना देशया भविष्य धकाः धाइगु चुनावया लिच्वःयात कया चिउता काइपिं अप्वःया च्वन । थ्वहे झ्वलय् नेवाः मनोरन्जनख्यःया सेलिब्रिटितय्सं वल्र्ड कप फूटबलयात कया गुलि चिउता तया च्वंगु दु ले धइगु दुवालेत छुं छुं कलाकःमि यानि कि सेलिब्रिटियाके फेसबुकया मेसेन्जरया माध्यमं छुं छुं न्ह्यसः तयागु खः । अले अज्यागु न्ह्यसःया लिसःया आधारय् नेवाः सेलिब्रिटिया मिखाय् वल्र्ड कप फूटबल कासाया दुवाला थन न्ह्यब्वयेगु कुतः याये ।
सुरेन्द्र तुलाधर
नेवाः मनोरन्जनख्यःया छगः धिसिलागु थां कथं कयातःम्ह सुरेन्द्र तुलाधर विशेष याना छम्ह निर्देशक खःसा वय्कःया ल्हाः च्वज्याय् नं न्ह्याः अले म्ये च्वमि व कलाकार कथं पलाः नं न्ह्याः । अझ उलिजक मखसे नकतिनि पिहाँ वःगु “मन त्यासा काये धुंसेलि” म्येया म्युजिक भिडियोया वय्कः निर्देशक ला खः हे खतसा उकि अभिनय नं यानादीगृु दु अले उकिया भिजुअल एडिटरया रुपय् नं ज्या याना न्हूगु ख्यःयात नं कःघाना दिइगु दु । थथे थ्व ख्यलय् तसंक व्यस्तम्ह सुरेन्द्र तुलाधरया मिखाय् वल्र्ड कप फूटबल कासा धइगु छगू तःजिगु नखः बराबर खः धइगु खनेदु । अले थौंकन्हे थःगु लिमलागु इलय् नं ई फ्याना वल्र्ड कप स्वयेगु याना वया च्वना दिइगु दु ।
वय्कःयात यःगु कासा पोर्चुगल व अर्जेीण्टनाया खः । आः वया जापानया कासा खना तसकं प्रभावित जुयादीम्ह भाजु तुलाधरयात जापान नं तसकं यःगु टिम खः । वय्कःया विचारय् थुगुसिइ फाइनलय् अर्जेण्टिना व पोर्चुगल हे फाइनल थ्यनिगु खनेदुसा थुगुसिइ छक पोर्चुगलं वल्र्ड कप स्वयेदःसा जिउ धइगु दु । वय्कःयात अर्जेण्टिनाया मेस्सी व पोर्चुगलया रोनाल्डो तसकं यःपिं कासामिपिं खः।
रबिन्द्र शाही
रविन्द्र शाही नेवाः संकिपा ख्यलय् बिस्कं म्हसिका दुम्ह कलाकःमि खः । वय्कः छम्ह कलाकार खः अले छम्ह निर्देशक नं खः । वयकलं निर्देशन यानादीगु नेवाः संकिपा “थम्हं म्हूगु गाः” फिल्मं पेजथ्री पिपुल्स च्वइस अवार्डय् बेस्ट डाइरेक्टरया अवार्ड त्याकेत ताःलाःगु खः ।
लाबला न्ह्यः स्वन्ति नखःया जःखः थःगु सुर्य विनायक वनेगु लँपुइ लाःगु रेष्टुराँपाखें थिमिया छेँय् लिहाँ वया च्वंगु इलय् आकाझाका मोटर साइकल क्वदया घाःपाः जुइका च्वंम्ह खःसा थःगु उसाँय्या कारणं उलि पिहाँ जुया मच्वंम्ह भाजु शाहीया थौंकन्हे अप्वः धइथें ई छेँ व पसलय् बिते जुया च्वंगु दुसा फुर्सदया इलय् वल्र्ड कप स्वयेगु याना च्वंगु दु । वय्कःया विचारय् थुगुसिइ अर्जेण्टिना व ब्राजिल फाइनल थ्यनिगु खनेदुसा वय्कःयात ब्राजिलया नेयमार तसकं यःम्ह कासामि खः ।
आराध्यलक्ष्मी खडगी
आराध्यलक्ष्मी खडगी नेवाः ख्यलय् छम्ह हुला प्याखंमि व छम्ह कलाकारया रुपय् पलाः न्ह्याका च्वनादीम्ह कलाकःमि खः । उलि जक मखसे नेवाः म्युजिक भिडियो ख्यलय् वय्कः छम्ह निर्देशकया रुपय् पलाः न्ह्याका च्वनादीम्ह कलाकःमि नं खः । नांजाम्ह कोरियोग्राफरला खः हे खत, वय्कःया विचाः कथं थुगुसिइ फाइनलय् ब्राजिल, अर्जेण्टिना व फ्रान्स मध्ये निगु टिम वनिगु खने दु तर वय्कःयात पोर्चुगल नं उत्तिकं हे यःगु टिम जुयाच्वन । वय्कःयात अर्जेण्टिनाया मेस्सी व पोर्चुगलया रोनाल्डो दकले यःपिं कासामि खःसा रोनाल्डो ला तसक्कं ह्यान्ड्सम नं ताः वय्कःयात । मेस्सीया जन्म हे फटबल कासाया निंतिं जूगु खः थें च्वं वयकयात ।
पवित्र कसाः
छम्ह म्येहालामिया रुपय् पलाः क्वातुम्ह पवित्र कसाः नेपालभाषाया सन्चारख्यलय् नीन्यादँति न्ह्यः एफ एम ज्याझ्वःकथं ज्वःमदुगु म्हसिका न्ह्यब्वयादीम्ह खः । वय्कःयात नेवाः शर्टफिल्मख्यःया छम्ह ज्वःमदुम्ह अभियन्ता कथं नं काये जिउसा नेपाल लिपि ख्यःया छम्ह न्ह्यलुवाः नं खः । गुड नाइट एफ एमय् नेपालभाषा ज्याझ्वःया छम्ह संस्थापक दुजःया ल्याखं पवित्रलिसे थ्व च्वमिया नं क्वातुगु स्वापू दुगुजक मखसे उगु इलय् वल्र्ड कप फूटबल जुया च्वनिबलय् वयागु छेँय् हे वना लाइभ टेलिकास्ट स्वयाम्ह खः । व ल्याखं वय्कः फूटबल कासाय् नुगः क्वसाम्ह धकाः याउँक हे सी दु । तर थुगुसिइ धाःसा वय्कलं फूटबल स्वयेत उलि इ फ्याये खना च्वगु मदु । वय्कःया जनबहापिने छगू कापः पसः नं दु अले थौंकन्हे वय्कः नेपालभाषा प्रशिक्षक जुया भानु माध्यामिक दरबार हाइस्कुलय् भाषा व तजिलजि स्यनेगु ज्याय् हे लिमला । अथे जूगुलिं वय्कलं न्हापा थें चच्छि न्ह्यः पाः याना लाइभ मस्वया हाइलाइट स्वया हे चित्त बुझेयाना च्वना धका धयादिल । वय्कःयात जर्मनी दकले यःगु टिम खःसा ईंग्लाएण्ड नं यः हं । वय्कःया विचारय् रोनाल्डो ज्वःम्ह मेम्ह कासामि आः तक नं थ्व ख्यलय् खने मदुनि । अले वय्कलं फाइनलय् ब्राजिल व ईग्लाएंण्ड लाःगु स्वयेदःसा जिउ धका धयादिल ।
स्वतन्त्रसंसार महर्जन
नेवाः मनोरन्जन ख्यलय् बिस्कं हे म्हसिका दुम्ह छम्ह कलाकार स्वतन्त्रसंसार महर्जन खः । छम्ह निर्देशक, छम्ह सन्चारकःमि वय्कःयात म्हसिकेगु खःसा थौंकन्हे वय्कः नेपालभाषाया संगीत ख्यलय् दकले तधंगु म्युजिक भिडियो अवार्डया ग्वसाः ग्वया च्वनादीम्ह खः । संसार्स अनलाइन टिभिया क्रियटिभ डाइरेक्टर खः । वय्कः छम्ह ग्राफिक डिजाइनर नं खः उकिं वय्कः आपालं लिमलाम्ह व्यक्ति खः । ज्यां लिमलागु कारण उलि फूटबल स्वये मखंसां इलं लात कि स्वयेगु मत्वःता धकाः धयादिइ । वय्कःया विचारय् ब्राजिल व पोर्चुगल फाइनल थ्यनिगु खने दुसाः ब्राजिल. हे त्याकि धइगु दु । वय्कःयात यःम्ह कासामि रोनाल्डो खः ।
रामकृष्ण खड्गी
थ्व ख्यःया छगः थां खः रामकृष्ण खड्गी । वय्कः छम्ह निर्देशक नं खः अले स्यल्लाम्ह ख्यालःमि नं खः । थौंकन्हे म्युजिक भिडियो ख्यलय् व्यस्तम्ह निर्देशक खः । वय्कःया पटाचारा, कृषा गोतमी व कर्म थेंज्यागु ज्वःमदुगु बौद्धकालिन संकिपा दयेका दीम्ह खः । वय्कःयात यःगु टिम धइगु अर्जेण्टिना खःसा फाइनलय् अर्जेण्टिनालिसे ब्राजिल लाइ धका वय्कलं धयादिल । अले थुगुसिया कप अर्जेण्टिना हे त्याइ धका धयादिल ।
राजेशमान सिं
“हिसिमदु” थेंज्यागु फिल्म दयेकादिम्ह राजेशमान सिं थ्व ख्यःया छम्ह सकृय कलाकःमि खः । म्युजिक भिडियो ख्यःया वय्कः छम्ह न्ह्यलुवाः खः । शर्ट फिल्म नं आपालं दयेकादिगु दु । वयकलं नीदँ नीन्यादँ न्ह्यःहे म्युुजिक भिडियो दयेकादीगु खः । वय्कःयात यःगु टिम अर्जेण्टिना हे खः । थुगुसिइ अर्जेण्टिनां कप त्याकि धइगु विचाः वय्कलं प्वंका दिलसा फाइनलय् थ्यनिगु मेगु टिम धइगु फ्रान्स जुइगु विचाः प्वंकादिल ।
रोजिना सुवाल
थ्व ख्यःया नांजाम्ह कलाकार रोजिना सुवाल म्युजिक भिडियो ख्यःया व्यस्त कलाकार खः । वय्कःया विचारय् नेपालया राजनितिइ ह्यूपाः वया न्हू न्हूपिं नेता व न्हूगु पार्टि त्यानावःथें थ्व वल्र्ड कप फूटबल कासाय् नं न्हापा न्हापा त्याना वयाच्वंगु टिम बाहेक मेगु न्हूगु टिम त्याःगु स्वयेदःसा जिउ धका धयादिल । उखुन्हु जापानं जर्मनीयात त्याकुबलय् थः तसकं उत्साहित जूगु खँ कनादिल । थःगु व्यस्तताया कारणं थौंकन्हे उलि कासा स्वये मखं धका धयादिम्ह रोजिनां क्वार्टर फाइनल निसें दक्वं कासा लाइभ स्वयेगु मति तया च्वनादिइगु दु ।
रुपेन्द्र श्रेष्ठ
नेवाः मनोरन्जनख्यलय् नेवाः सुपरस्टार कासाय् दुथ्याना च्वंम्ह रुपेन्द्र श्रेष्ठं थ्व ख्यलय् तसकं पलाः न्ह्याम्ह व नुगः क्वसाम्ह कलाकःमि खः । वय्कःयात फूटबल कासा धइगु उलि यःगु कासा ला मखु तर थ्व कासाय् यःगु टिम ल्ययेमाःसा पोर्चुगलयात ल्ययादी । वय्कःयात यःम्ह कासामि रोनाल्डो खः । वय्कःया विचाः कथं थ्व वल्र्ड कपय् अज्यागु टिम फाइनल थ्यंगु व त्यागु टिम धइगु नेपाल व नेपाःमिपिन्त मतिना याइगु टिम जुइमा धइगु दु । वय्कलं न्यनादिइ कथं अर्जेण्टिना देशय् च्वपिन्सं नेपाःमिपिन्त उलि मतिना मयाः धइगु दु । नेपाःयात मतिना याइगु देश व कासामि हे वय्कःयात यः धका धयादिल ।
