नेपाल संवत ११४३ न्हू दँ झीगु न्ह्योने दँ वयाच्वंगु दु । नेसं ११४२ या शुरुवात निसें हे आपालं हे गतिविधी नेपालभाषा मनोरंजन ख्यलय् जुयाच्वंगु दु । गतिविधीया धलः वा दस्तावेज दयेका वनेगु आवश्यक जू । थज्योगु हे दस्तावेज मुंकातल धाःसा लिपाया दिनय् थी थी कथंया नीति निर्माण, मुल्यांकन, टे«ण्ड एनालाइसिस् यानाः वने फइ ।
इतिहासया छगू पाना मुंकेगु कुतः पेजथ्री बाःछिपौया थुगुसी नं जुयाच्वंगु दु । थुकी मध्यय् थुगु दँया थीथी धटना दुमथ्यानाच्वंगु नं जुइफु, गुलिं ज्याझ्वःया सुचं मथ्यंगु नं जुयाच्वने फु, गुलिं सुचंया हक पाखें बन्देज तयेत स्वयाच्वंगु नं जुइफु । न्ह्यागु हे धाःसां निश्चित श्रोत व साधनं मुंकेमाःगु सुचं सदां हे थज्योगु परिस्थीतिया सामना याना हे च्वनिं ।
थुगु दँ नेपालभाषाया संकिपा ख्यलय् घोषक व कर्मया निगू संकिपाः पिदन । घोषक व कर्म स्वयेगु निंतिं मनूत हल तक्क वनां हाउस फूल यायेत स्वःगु नेपालभाषा मनोरंजन ख्यःया निंतिं तसकं हे सकारात्मक पक्ष खः । उकथं हे नेपालभाषाया मेगु संकिपाः गालय् वन नं वर्षया अन्तय् प्रदर्शन जुल । थुगु दँय् मुक्कं स्वंगू प्याखं प्रदर्शन जुल।
नेपालभाषाया मनोरंजन ख्यःयात ब्यापक यानाः यंकेगु झ्वलय् नेपालभाषाया म्यूजिक भिडियोया प्रिमियर सिनेमा हलय् यानाः यंकेगु प्रचलन थुगु दँ निसें शुरु जुल । नेपालभाषाया म्यूजिक भिडियो छुं दँ न्ह्यः निसें थीथी रेष्टुरेन्टय् वा पार्टि प्यालेसय् जुयाच्वंगु खःसां म्यूजिक भिडियोया सवाः थुइकेगु निंतिं किर्तिपूर सिनेप्लेक्सय् व मनू सु मनूया प्रिमियर जुलसा कविता जोशीया निपू म्ये नं सिटिसि मलय् प्रिमियर जुल।
नेपाल संवत् ११४२ दँया शुरु निसें हे पेजथ्री पिपल्स च्वइस अवार्डया गतिविधिं जाःयाच्वंगु खः । ११४२ वर्षया शुरुया दिनय् पेजथ्री अवार्डया नां दुतिनाया अन्तिम दिन खःसा धलः पिथनेगु, अनलाइन भोटिंग व भोटिंग सर्वे लिसें नामांकन ज्याझ्वः अले पेजथ्री अवार्ड नं तःजिक जुल । पेजथ्री अवार्डय् ख्यालि जुजु मदनकृष्ण श्रेष्ठयात लाइफटाइम एचिभमेन्ट अवार्ड नं लः ल्हाःगु खः । लिसें थुगु हे दँय् स्टार म्यूजिक भिडियो अवार्ड ११४२या नं घोषणा जूगु दु ।
सुख लिसें दुःख नं वइ धाःथें थुगु दँय् नेपालभाषाया मनोरंजन ख्यः नं दुःखं कःगु दु । नेपालभाषा मनोरंजन ख्यःया धिसिलाःपिं कलाकार थुगु अनित्य संसार त्वता वन । गजलकार रोशन राभण्डारी, कलकार मानकृष्ण वावा, गजल गाएक मोहन काजी, समाजसेवी लक्ष्मीदास मानन्धर अले वर्षया अन्तपाखे शताव्दीपुरुष सत्यमोहन जोशी नं मन्त। नेपालभाषा ख्यलय् थुलि नां जाःपिं हस्ती मदये धुंकाः थुगु प्वंगु थाय् गथेयाना जायेकेगु धैगु न्ह्यसः सदां ल्यनाःच्वनिं।
कछला
धोषकया हाउसफूल शो
चिराग फिल्मस्या ब्यानरय् रोशन बज्राचार्य व प्रेमा शाक्यया निर्माणय् अले अमृतचन्द्र श्रेष्ठया निर्देशनय् बुद्धकालीन एतिहासिक नेपालभाषाया संकिपा घोषकया न्हापांगु शो अष्टनारायण हल, बालाजु बाइपासय् हाउस फुल जुल । प्याखँ दिवंगत धर्मरत्न शाक्यं च्वयादीगु खःसा प्याखँया पटकथा दर्शनवीर शाक्यं च्वःगु खः। प्याखनय् कलाकारय् राजेन्द्रमान शाक्य, प्रेमा शाक्य, पल्पसा डंगोल, किशोर चिपालु, अंजली शाक्य, अन्नपूर्णेश्वरी श्रेष्ठ, राजु महजर्न, उदेन न्हूसाय्मि, भिमसेन रिसाल इत्यादि कलाकार दु ।
इपिक नेपाल म्युजिक अवार्ड
नेपालभाषाया म्ये छंगु लँ स्वैच्वंगु मिखा हालादीम्ह कल्पना श्रेष्ठं इपिक नेपाल म्यूजिक एवार्डय् उत्कृष्ट गायिकाया अवार्ड त्याकादिल । अथेहे हरि सुन्दर लाखे थुगु हे अवार्डय् उत्कृष्ट मिजं म्ये हालामि जुयादील । थुगु अवार्ड मध्यपुर नगरपालिकाया सहकार्यय् जूगु खः ।
पेजथ्री अवार्ड ११४२या नामांकन धलः
पेजथ्री पिपल्स च्वइस अवार्ड ११४२या निंतिं अवार्डय् दुतिंगु धलः पिदन । पेजथ्री अवार्डय् मुक्कं १६१ पू म्ये, च्यागू म्येचाः, ७गू फिल्म व १२० पू म्यूजिक भिडियो दर्ता जूगु खः ।
छंगु मतिनां स्वात्तुमत्तुस्वःगु नुगः
स्वरे छंगु मतिनां स्वत्तुमतु स्वगु नुगः म्यूजिक भिडियोया प्रिमियर यलया एम्बियन्स ३६५य् जुल । सुमित्रा महर्जन व बीरेन्द्र महर्जनया सः व खःसा थुगु म्ये सुरेन्द्र तुलाधरं च्वयःगु खः । एरेन्जर एवं रेकर्डिस्ट व संगीतकःमि सुरेन्द्र श्रेष्ठं लसय् हंगु खः । थुगु भिडियोया निर्देशन रामकृष्ण खडगीं याःगु खः। म्येय् सरिता बज्राचार्य, किरण जोशी व निभा डंगोलं अभिनय यागु दु ।
इसासया दँ मुज्या
इन्द्रेणी सांस्कृतिक समाज (इसास)या प्यक्वःगु दँ मुज्या २०७८ मंसीर ४गते सम्पन्न जुल । ज्याझ्वलय् मू पाहाँकथं नारायणभक्त श्रेष्ठ (रायन) झायादीगु खः । इसासया नायो भाजु वीरप्रसाद भन्सारीया नायोसुइ जूागु खः ।
थिंला
ईलोहं यात सुशासन पत्रकारीता
ईलोहं प्रकाशन प्रा. लियात येँ महानगरपालिकां सुशासन पत्रकारीताया सिरपाः लःल्हात । ईलोहं प्रकाशन प्रा. लि पाखें प्रकाशनया मू व्यवस्थापक दर्शनवीर शाक्यं लः ल्हानाकाःगु खः । येँ महानगरपालिकाया २७ क्वःगु महानगर दिवसया लसताय् मंसिर २९ गते वसन्तपरय् तःजिगु ज्याझ्वः याःगु खः ।
शर्ट फिल्म ‘ईन्द्रायणी’ पुरस्कृत
नेपाल कल्चरल इन्टरनेशनल फिल्म फेस्टिवलया स्वंगूगु संस्करण नेपाल टुरिज्म बोर्ड भृकुति मण्डपय् तःजिक क्वचाल । ज्याझ्वलय् पेजथ्री बाःछिपौया न्ह्यब्वया चिहाः संकिपाः इन्द्रायणीं नेशनल अवार्डं वुमेन विद्याय् जुरी अवार्ड पाखें सम्मानीत जुल । थुगु प्याखँया निर्देशक दर्शनवीर शाक्य खः सा निर्माता नरेशवीर शाक्य खः।
ट्री इन्टरटेन्मेन्टया धाये मफूत
ट्री ईन्टरटेन्टमेन्टं न्हापां खुशी नेपालभाषाया म्युजिक भिडियो ‘धाये मफूत’या प्रिमियर दरवारमार्गया क्यूज् सिनेमा, राइजिंग मलय् यात । ‘धाय् मफूत’ म्ये किपूया दिपक नेपालीया च्वसा खःसा दिनेश दर्शनधारी व यशोदा राईया निर्माणय् माइकल चन्दं निर्देशन यागु खः । म्येय् बाबुल गिरीं संगीत तःगु खः । प्रिजोल नेपाली व अस्मिता परियारं थुगु म्ये हाःगु खः ।
कीर्तिपुर सिंगिंग आइडल क्वचाल
किपू नगरपालिकाया ग्वसालय् कीर्तिपुर सिंगिङ आइडल ११४२ क्वचाःल । किपू नगरपालिकाया प्रमुख रमेश महर्जनं कासाय् ताः लापिंन्त सिरपा लःल्हानादिल । किपूया पांगाय् स्थीत कीर्तिपुर सिनेप्लेक्सय् जूगु कासाय् किपू नगरपालिका ४ वडाया प्रशान्त सुवेदी न्हाप लात । किपू नगरपालिका ३ कुतिसाया अतुल मानन्धर ल्यू व किपू नगरपालिका ५ पांगाया जोन महर्जन लियांल्यू लात ।
नेवाः फिल्म सोसाइटीया अफिस
नेपालभाषाया संकिपामिपिनिगु संस्था नेवाः फिल्म सोसाइटीया न्हूम्ह नायो विराजकाजी राजोपाध्यायया न्हापांगु पला कथं संस्थाया ज्याकू उलेज्या याःत । थाय्मदुइ प्यंगः थामय् न्हूगु भवनय् ज्याकूया विधिवत शुरुवात थिंलागा एकादशी ११४२या दिं खुन्हु जूगु खः ।
कविना महर्जनयात सम्मान
खोकनाया कलाकार कविना महर्जन ताः ई निसें अमेरिका स्थीत न्यू जर्सिइ च्वनाच्वंगु खः । सामाजिक जीवनया ५००० घण्टा सिबें आःपाः अमेरिकाया सार्वजनिक जीवनय् पानादिल धकाः सम्मान याःसें अमेरिकी राष्ट्रपति लाइफ टाइम एचिभमेन्ट अवार्ड २०२१ पाखें सम्मानी याःगु दु । वय्कः न्यूयोर्क नेवाः गुथिया दुजः खः ।
पोहेला
मोहन काजी मन्त
नेपालभाषाया गजल म्येचाः भचाभचाया म्ये च्वमि मोहन काजी (लम्बोदरपति राजोपाध्याय्) ७८ दँय् मन्त । ताः ई निसें दम व पिसाबया ल्वचं कयाच्वंम्ह मोहन काजीया अन्त्यष्टि पशुपतिइ जूगु खः ।
जातीय विभेद विरुद्ध शर्ट फिल्म
नेपाल चलचित्र निर्देशक समाजया कुतलय् कानून, न्याय तथा संसदीय व्यवस्था मन्त्रालय व युनडीपी जानाः मंकाः ग्वसालय् जुयाच्वंगु जातीय विभेदविरुद्ध चिहाः संकिपा कासा घोषणा यात । जातीय विभेद व उन्मुलनया उपाययात कलात्मक रूपं न्ह्यब्वयातगु २० गू (नीगु) फिल्मयात धेंधेंबल्लाया निंतिं ल्येल । थ्व कासाया निंतिं दुथ्याःगु ५६ गु फिल्मय् नेपालभाषाया ‘पूमवंगु म्हगस’ नं दुथ्याःगु दु । थुगु प्याखंया च्वमि व निर्देशक रामकृष्ण खड्गी खः । थुकी कर्म व सरिता बज्राचार्यया नापनापं राजेन्द्रमान शाक्य, प्रमिला मानन्धर व पालिजा मानन्धर खड्गीया अभिनय दु ।
सिल्ला
ज्वरा ज्वरा पर्सिया रेकर्डिंग
ख्यालि जुजु मदनकृष्ण श्रेष्ठया ज्वरा ज्वरा पर्सि म्ये हरिशरण साय्मिया स्टिं«ग्स रेकर्डिंग स्टुडियो, अनामनगरय् जुल । न्हूगु एरेन्ज कथं रोजी डंगोल श्रेष्ठ व सरीता शाही नं थुकी सः बियाच्वंगु दु । म्येया संगीत संयोजन जीवित जल्मिं या दु । थुगु म्ये गंगा मालाकार व मदनकृष्ण श्रेष्ठं च्वःगु खः ।
सज्जु मानन्धरया लुमनिं छन्त
सज्जु मानन्धरया म्ये सुथय् लुमनि छन्त बोलया म्ये पिदंगु दु । म्येया खँग्वः वय्कःया दाजु राजु मानन्धरं च्वयादीगु खःसा म्येया लय् व संगीत संयोजन जुगल डंगोलं यानातःगु दु ।
कर्मया प्रिमियर
नेपालभाषाया संकिपा कर्मया प्रिमियर गुण सिनेमा हल ग्वार्कोय् जुल । थुगु हे दिंनिसें कर्मया नियमित शो नं जुयाच्वंगु दु । रामकृष्ण खड्गीया स्क्रीनप्ले व निर्देशनय् निर्माता दिजेन्द्र शाक्यया थुगु प्याखँ खः । गुण समूहं निर्माण याःगु थुगु प्याखनय् ख्यालि जुजु मदनकृष्ण श्रेष्ठ, कर्म, आशिष्मा नकःमि, नारायणदेवी प्रधान, यमन श्रेष्ठ, कृष्णभक्त महर्जन, लुनिभाः तुलाधर, वत्स शाक्य, अन्नपूर्ण श्रेष्ठ, रजनी खड्गी लिसें आपलं कलाकार दुथ्यानाच्वंगु दु।
समावेशी अवार्डय् म्ये नामांकन
नेपाःया न्हापांगु समावेशी म्युजिक अवार्ड – राष्ट्रिय समावेशी म्युजिक अवार्ड २०२२ (निम अवार्ड) या मनोनयन सार्वजनिक जुल। उत्कृष्ट नेपालभाषा गायनय् सज्जु मानन्धरया सुथय् लुमनि, रविकुमार महर्जनया फरेम दुनेया तस्बीर, तेजवती जोशीया यःमां जितः, विजेन्द्र चवालया जीवनया छुं ई, व सोनी राजभण्डारीया जिगु मन स्वां खः । उत्कृष्ट नेपालभाषा म्येच्वमि कथं हरिराम थेच्वया यःमां जितः, राजु मानन्धरया सुथय् लुमनि, उत्तम मानन्धरया बुलुहुँ बुलुहुँ, अनिक शाक्यया जीवनयाः छुं ई व पवन जोशीया फरेम दुनेया तस्बीर दुथ्याना च्वंगु दु ।उत्कृष्ट नेपालभाषा म्यूजिक भिडियोया मोडल कथं रुक्साना महर्जन भुतमाली म्ये पाखें, शुशिल श्रेष्ठ नुगःघाःया वासः पाखें, अनु महर्जन छ व जि छम्ह हे पाखें, श्रेया कार्की पन्तिया मकर मेला पाखें व रोशन शाक्य राजमती कुमती पाखें दुथ्यानाच्वंगु दु । उत्कृष्ट कल्चरल म्ये पाखें पुर्णकाजी ज्यापु त्यःछिं त्यः व राष्ट्रिय भावया म्येपाखे जितेन शाक्यया ‘जिउ ज्यान प्राण’ नं मनोनयनय् दुथ्यानाच्वंगु दु।
जिवित जल्मीया भ्यालेन्टाइन म्ये
भाय्लेन्टाइन डेया लसताय् जिवित जल्मिं मोहनि दुगु मिखाया कभर म्ये ईलोहं प्रकाशनया युट्युब च्यानलं पितहल । थुगु म्येया च्वमि विष्णु जल्मि खःसा थुकीया संगीत कृष्णमान व मू सः प्रेमध्वज प्रधानया खः । न्हूगु म्येया नितिं जिवित जल्मिं हे सः बियातःगु खः ।
चिल्ला
हेरामाया चेस कासा
येँ जिल्ला बुद्धिचाल संघया ग्वसालय् निक्वःगु हेरामाया श्रेष्ठ स्मृति महिला राष्ट्रिय चेस प्रतियोगिता जुल। कासाय् न्हाप लाःम्हेसित नगद २५ हजार निगूगु लिसें न्यागूगु स्थान तक नगद लिसें प्रमाणपत्र लःल्हाःगु खः । बागमती प्रदेश बुद्धिचाल संघया प्रमुख सल्लाहकार अमृतचन्द्र श्रेष्ठ (संकिपा निर्देशक)या मांया नामं थुगु कासा न्ह्याकुगु खः ।
पल्पसा डंगोलया जलासेँ प्रत्यारोपन
ताः ईया संघर्ष लिपा कलाकार पल्पसा डंगोलया फागुन २५ गते जलास्यँे प्रत्यारोपन येँया महाराजग स्थीत शिक्षण अस्पतालय् सफलतापूर्वक क्वचाःल । पल्पसा डंगोलया किड्नीया निंतिं यक्व हे पहल जूगु खःसां अन्तत नेपाया कानूनया दायरा च्वनां थः किजा अज्जु डंगोलया जलास्येँ प्रत्यारोपनया निंतिं मिले जुल ।
जलय् स्वपू म्ये प्रिमियर
वरिष्ठ सिने पत्रकार विजयरत्न असंबरेया मूपाहाँसुइ हरिसिद्धिइ स्वपू नेवाः म्येया प्रिमियर जुल । शिलाच¥हे पाहाँच¥हे म्ये अशोक महर्जनं व राजेन्द्र महर्जनं हालातःगु खः । विष्णु जल्मीं च्वयादीगु व लसय् नं हनातःगु खः । स्वांया वासना म्ये अशोक महर्जन काकें हालातःगु खः । म्येच्वमि कृष्णराम महर्जन, संगीत निरन्जन महर्जन ‘कुमारी’, संगीत संयोजन जीवित जल्मि, किपालुमि व सम्पादन बि के जल्मि, कोरियोग्राफि व निर्देशन सुरज नापित खः । किशोर चिपालु रोजिना सुवाल व रविन डंगोलया अभिनय थुकी दु । छंगु रूप खना बोलया म्ये राजेन्द्र महर्जन व दिपा महर्जनं हालातःगु खःसा म्ये च्वमि व लय् चिनामि निरन्जन महर्जन ‘कुमारी’, किपालुमि व सम्पादन सोहन मानन्धर, कोरियोग्राफि आराध्य लक्ष्मी खडगीं यागु खः । म्येय् राजु महर्जन, आराध्य लक्ष्मी खड्गी व पूर्णकाजी ज्यापु व मचा कलाकार समर्पण गमाल व रोजिशा बलामि, सिम्रिक श्रेष्ठं अभिनय यानादीगु दु । म्येया निर्देशन जितेन्द्र महर्जनं यागु खः ।
पेजथ्री पिपल्स च्वइसया नामांकन
पेजथ्री पिपल्स च्वइस अवार्ड ११४२या नामांकन ज्याझ्वः यलया पाटन म्यूजियमय् जुल । मुक्कं ४६गू विद्याय् जूगु नामांकन संगीतय् १९ गू, म्युजिक भिडियो १३ गू व प्याखँनय् १४ विधाया नामांकन जूगु खः । यल १६ वडा अध्यक्ष निर्मलरत्न शाक्य, बागमति प्रदेशया सांसद एवं पूर्व आन्तरिक तथा कानून मन्त्री डा. अजय क्रान्ति शाक्य, पूर्व इजरायलया राजदूत डा अन्जान शाक्य, येँ महानगरपालिकाया मेयर विद्यासुन्दर शाक्य व पेजथ्री अवार्डया कजि दर्शनवीर शाक्यं नुगः खँ तयादीगु खः । बागमति प्रदेश सांसद एवं पूर्व आन्तरिक तथा कानून मन्त्री डा. अजय क्रान्ति शाक्यं थुगु दँय् लाइफटाइम एचिभमेन्ट अवार्ड वरिष्ठ कलाकार मदनकृष्ण श्रेष्ठयात लः ल्हाइगु क्वछिना न्यंकादीगु खःसा कलाकारपिं नं मूलधारय् दुहांवने मागु खँय् बः बिया दिइगु खः । ज्याझ्वलय् नामांकन जूपिं कलाकारपिन्त पाहाँपिंसं दसिपौ लःल्हाःगु खः ।
द नेवारल्याण्ड
नेवाःतय्गु मां भाय् नेपालभाषाया विकास व संरक्षणया निंतिं न्ह्यानाच्वंगु ईलाहं प्रकाशनपाखें मेगु छगू पत्रिका हाकनं पिनथेगु ज्या जूगु दु । थनि १० दँ न्ह्यः हे आः हाकनं पिदंगु ‘दि नेवारलाण्ड’ नं पिदने धुंकूगु खः । तर थी थी प्रावधिक कारणं दिनाच्वंगु थुगु अंग्रेजी भाषां पिदनीगु लय्पौ हाकनं पिदंगु दु । थुकथं ईलोहं प्रकाशनपाखें लच्छिया दुने न्हय्गु पत्रिका पिदनाच्वंगु दु । ‘दि नेवारलाण्ड’ लय्पौया सम्पादन सिद्धहस्त एवं अन्तर्राष्ट्रिय व्यतित्व डा. ज्योति तुलाधरं भाला क्वबिया दिइगु दु ।
पेजथ्री अवार्डया सर्वेक्षण
पेजथ्री पिपल्स च्वइस अवार्ड ११४२या निंतिं सर्वेक्षण भोट किपूया साहित्य नखलय् जुल । साहित्य नखःया निन्हू खुन्हु किर्तिपूरया पांगा लाछिइ साहित्य नखलय् छगू स्टल तयाः सर्वेक्षण याःगु खः ।
यः बाः यः बाःया प्रिमियर
म्ये च्वमि शैलेश शाक्य लगं बरेया च्वसां पिदंगु म्ये ‘यः बाः यःबाः’या म्यूजिक भिडिओ नेपालभाषा एकेडमीया उपकुलपति मल्ल के. सुन्दरं विमोचन यात । रीता महर्जनया संगीत व सलय् हालातःगु थुगु म्येयात रबि साय्मिं सम्पादन व निर्देशन यागु खः । निर्माता गोपाल कृष्ण महर्जनं तयार याना दिइगु खः ।
चौला
आशाकाजी थकुयात सम्मान
ख्वप मिडिया सर्कलया नायो राजु मानन्धरया सभापतित्वय् वरिष्ठ कलाकार आशाकाजी थकूयात हंगु दु । कलाकार थकूं थःपिंसं न्हापा आपालं दुःख सियाः ख्यालः व नेपालभाषा संकिपा ख्यलय् बियागु योगदानया कदर स्वरुप हंगु खः।
चिहा संकिपा कासाया लिच्वः
नेपालभाषा चीहाः संकिपा कासाय् योवन शाक्यया चिहाः संकिपा ‘सहिद’ न्हाप लात । विज्ञान पक्काया निर्देशन यानादीगु ‘कतिलाः पाकः’ लिउ लातसा निर्देशक सौगातया ‘अतृप्त माया’ लियांलिउ लाःत । किपुली जूगु साहित्य महोत्सवय् स्वंगुलिं चीहाः संकिपाया निर्मातापिंत सिरपाः लःल्हायेगु ज्या जूगु खः । न्हाप जूगु संकिपायात ७५,००० तका, लिउयात ५०,००० तका व लियांलिउयात २५,००० तका सिरपाः लाःगु खः ।
रजिन महर्जनया डक्युमेन्टरी
नेपालभाषा चिहाः संकिपा म्यूजियमया निर्देशक रजिन महर्जनं अतिकं हे संवेदनशील विषयवस्तुया डक्यूमेन्ट्री नेपाल्स मेनस्ट्रएल मूभमेन्ट ः ट्राय्किंग ट्याबुस (ल्भउबकिु ःभलकतचगब िःयखझभलत स् त्बअपष्लिन त्बदययक) निर्देशन यागु दु । थुगु डक्यूमेन्ट्री १–३ जुलाईस जुइगु १८ क्वःगु अन्तर्राष्ट्रिय शर्ट फिल्म फेस्टिवल डेटमोल्डय् छनोट नं जूगु दु । थुगु डक्यूमेन्ट्री टोरोन्टो इन्टरनेशनल वुमन्स फिल्म फेस्टिभल, २०२२ व डब्लुएचओ हेल्थ फर अल फिल्म फेस्टिभल, २०२२ य् नं ल्यये धुंकूगु दु ।
छन्त नापलाये सातकि
अडियो व भिडयो म्येचाः छन्त नापलाये सातकि जनकवि दुर्गालाल श्रेष्ठं छगू ज्याझ्वलय् पितब्वज्या यात । म्ये च्वमि राजु मानन्धरया रचना व म्येहालामि सज्जु मानन्धरं सः बियातःगु थुगु म्येचालय् संगीत व संगीत संयोजन जुगल डंगोलं यानादीगु दु । ज्याझ्वः एफ टेन पार्टिप्यालेसय् जूगु खः ।
ज्योती सिङ्गिग स्टार २०७८
ज्योती म्युजिकया ग्वसालय् ज्योती सिङ्गिग स्टार २०७८ या सेमीफाइनलपाखें फाइनलय् थ्यनेत ताः लापिं नेपालभाषा विधाया ७ कासामि मध्ये सबिन महर्जन न्हाप, राजेश बज्राचार्य लिउ व प्रबिन बज्राचार्य लियाँल्यु लाःगु दु । फाइनलय् वंपिं मेपिं कासामि पुष्प रत्न बज्राचार्य, यजु शिल्पकार, सिद्धार्थ बज्राचार्य, बुबहाल, व सना महर्जन खः ।
पेजथ्री पिपल्स च्वइस अवार्ड ११४२
पेजथ्री बाःछिपौया ग्वसालय् पेजथ्री पिपल्स च्वइस अवार्डया प्यंगूगु संस्करण येँया सभागृह हलय् चौलाथ्व पुन्हिं खुन्हु क्वचाल । संगीत विधाय् १९अवार्ड, म्यूजिक भिडियो विधाय् १३ व संकिपा विधाय् १४गू अवार्ड लः ल्हाःगु खःसा ज्यूरी सम्मान कथं वि.नन्द बैद्य, निर्मल रत्न शाक्य, अन्नपूर्णेश्वरी श्रेष्ठ व इमर्ज ब्याण्डयात सम्मान याःगु खः ।
अवार्डय् संगीत विधा पाखे उत्कृष्ट मिजं सः – महेश राज थापा (गन वने त्यना), उत्कृष्ट मिसा सः –‘स्वस्ती महर्जन’ (वेनगु हे खः सा), उत्कृष्ट मिजं सः उदीयमान कलाकार – विजेन्द्र चवाल (जीवनया छुं ई), उत्कृष्ट मिसा सः उदीयमान कलाकार – पूर्णिमा शाक्य (सुयात कने), उत्कृष्ट मिजं सः आधुनिक म्ये – उत्तम महर्जन (मफूत म्वाये), उत्कृष्ट मिसा सः आधुनिक म्ये – रत्नशोभा महर्जन (छु जुल रे), उत्कृष्ट मिजं सः उदीयमान आधुनिक म्ये – मुकेश शाक्य (छंगु हे खँ ला खः), उत्कृष्ट मिसा सः उदीयमान आधुनिक म्ये – चण्डीका बाडे (लुमना वल), उत्कृष्ट सः ज्वः म्ये – लसता जोशी, प्रवेशमान शाक्य (छन्त खनेवं), उत्कृष्ट सः आधुनिक ज्वः म्ये – प्रतिमा बज्राचार्य, रत्नसंभव शाक्य (छ वःग खनेवं), उत्कृष्ट मचा म्ये – एरोन महर्जन (यो मां), उत्कृष्ट भजन – तंकराज शाक्य (बुद्ध लुमना वइ), उत्कृष्ट पुचः म्ये – ज्यू ज्यान प्राण (जितेन शाक्य), उत्कृष्ट म्येचाः – मन (हरिराम महर्जन थेच्व), उत्कृष्ट म्ये च्वमि – रामेश्वर मिश्रण श्रेष्ठ (ल्वहं खः कि व), उत्कृष्ट संगीत – राजकुमार मानन्धर (हर्कनारां साहु), उत्कृष्ट संगीत आधुनिक –भुवन महर्जन (यो मां), उत्कृष्ट संगीत संयोजन – जिवित जल्मि (छलयाना जुसां ज्यु), उत्कृष्ट संगीत संयोजन आधुनिक म्ये – यल्लो अर्बिट (ओ मैंचा) त्याःगु खः ।
संकिपाः अवार्डय् धोषक पाखें उत्कृष्ट मिजं कलाकार मू भुमिकाय् – किशोर चिपालु, उत्कृष्ट मिसा कलाकार सह भुमिकाय्, ‘पल्पसा डंगोल’, उत्कृष्ट कलाकार खल भुमिकाय् ‘राजेन्द्रमान शाक्य’, उत्कृष्ट उदीयमान मिसा कलाकार अंजली शाक्य’, उत्कृष्ट निर्देशक ‘अमृतचन्द्र श्रेष्ठ’ व उत्कृष्ट संकिपा त्याकुगु दु । जामनः गुभाजु पाखें उत्कृष्ट स्क्रीनप्ले ‘सुशिल राजोपाध्याय’ व उत्कृष्ट छायाँकन ‘भवानि शिलाकारं’ त्याकुगु खः । अथेहे उत्कृष्ट कोरियोग्राफी ‘निशिला शाक्य’ व ओरिजिनल साउण्ड ट्राय्क ‘मायाजालं’ आसकुति पाखें त्याकुगु खः । उत्कृष्ट मिसा कलाकार मू भुमिकाय् अन्नु महर्जन (बसन्त ऋतु), उत्कृष्ट मिजं कलाकार सह भुमिकाय् पूर्णकाजी ज्यापू (हिसिमति), उत्कृष्ट सम्पादन मनोजरत्न शाही (वायादुने जाकि दु) व उत्कृष्ट संवाद यादव दास भोछिभोय लमि पाखें त्याकुगु खः ।
म्यूजिक भिडियो पाखे उत्कृष्ट मिजं मोडल किशोर चिपालु (छन्त जिगु माया मदुला), उत्कृष्ट मिसा मोडल रोजिना सुवाल (गन वन), उत्कृष्ट उदीयमान मिजं मोडल अमोघवीर बज्राचार्य (अप्सरा थें च्वं), उत्कृष्ट उदीयमान मिसा मोडल नेन्सी महर्जन (छन्त नापलाये सातकि), उत्कृष्ट क्यामरा पर्सन म्यूजिक भिडियो आभेष बज्राचार्य (कुचुकुचु मिं), उत्कृष्ट सम्पादन म्यूजिक भिडियो बिजु कर्माचार्य (यो मां), उत्कृष्ट कोरियोग्राफर आराध्यालक्ष्मी खड्गी (जमाना मभिं), उत्कृष्ट मेकअप उमिसा पाण्डे (छंगु लँ), उत्कृष्ट भेषभुषा (छं न्हिला दः) उत्कृष्ट राष्ट्रिय भाव, धार्मिक भाव म्यूजिक भिडियो – दुःख दुःख (मिनर्वादेवी शाक्य बज्राचार्य), उत्कृष्ट पर्फोमिंग आर्टिष्ट मृगनयनी (न्हूपलाः) उत्कृष्ट निर्देशक विश्वास बज्राचार्य (पियाच्वने), उत्कृष्ट म्यूजिक भिडियो छन्त जिगु माया मदुला (धर्म महर्जन) त्याःगु दु ।
ख्यालिजुजु मदनकृष्ण श्रेष्ठयात ईलोहं प्रकाशनया संरक्षक धर्मवीर शाक्यं दोसल्ला न्ययेका सम्मान यानादीगु खःसा मेयर विद्यासुन्दर शाक्यं लाइफटाइम सम्मान पत्र लः ल्हानादीगु खः ।
बछला
तेजवतीया न्हूगु म्ये
यो मां जित बियाछ्वये म्वाल तेजवति जोशीया सलय् न्हूगु नेपालभाषाया भिडियो बेन्टो लाउन्ज एण्ड बारय् प्रिमियर जुल। वरिष्ठ कलाकार रत्न बेहोसिया सभापतित्वय् मू पाहाँ कथं भृगुराम श्रेष्ठ झायादीगु खः। म्येया संगीतकार जुगल डंगोल व म्येच्वमि हरिराम महर्जन थेच्व खःसा थुगु म्ये प्रदीप खड्गीं निर्देशन याःगु खः।
त्वते मखु जिं
थौं सिबें ५० दँ न्ह्यो झी मदनकृष्ण व नगिना जोशीं हालातःगु म्ये ‘त्वते मखु जिं’या म्यूजिक भिडियो एफ टेन पार्टि प्यालेसय् जुल। आर्यम नकःमिया निर्देशनय् तयार जूगु थुगु भिडियोस मदन कृष्ण श्रेष्ठ, नगिना जोशी, लसता जोशी विजय मान सिं लिसें तेजस वैद्य व आध्या बज्राचार्यया अभिनय दुथ्यानाच्वंगु दु।
नातिकाजी सम्मान
नातिकाजी स्मृति समाजया ग्वसालय् राष्ट्रपति विद्यादेवी भण्डारीं सम्मान व सिरपाः लःल्हात। संगीत व कलालिसे स्वापू दुपि मुक्कं नीच्याम्ह संगीत श्रष्टापिन्त सम्मान व सिरपाः लःल्हाःगु उगु ज्याझ्वलय् वरिष्ठ सिनेकला पत्रकार विजयरत्न तुलाधर असंबरेयात नातिकाजी राष्ट्रिय कला पत्रकारिता सिरपाः लःल्हागु खः। नातिकाजी राष्ट्रिय संगीत सिरपाः अरुण तिवारी (रचना), सन्तोष श्रेष्ठ (संगीत), निशा देसार (गायन) व शिव परियार (गायन) , नातिकाजी राष्ट्रिय प्रतिभा सिरपाः डिपी दाहाल (रचना), अर्जुन पोखरेल (संगीत), सिन्धु मल्ल (गायन), अजर जंगम (गायन) व नातिकाजी राष्ट्रिय शास्त्रीय संगीत सिरपाः अमृतहिरा तुलाधर योगी (सितार) यात लःल्हाःगु खः। मेमेगु आपलं विधाय् नं सिरपाः व सम्मान लःल्हाःगु खः ।
ख्वाः बुरा जुसां
मदनकृष्ण श्रेष्ठया अतिकं हे लोकंह्वाःगु म्ये मध्य छपू ख्वाः बुरा जूसां मन जिगु ल्याय्म्ह म्येया भिजुअलया प्रिमियर जुल। येँया सासा बैंक्वेट विशाल वजारय् जूगु थुगु म्येय् मदनकृष्ण श्रेष्ठ, आर्यम नकःमि व आराध्या लक्ष्मी खड्गीया अभिनय दु। थुगु म्ये आर्यम नकःमिं हे निर्देशन याःगु खःसा संगीत नगेन्द्र हाडाया खः।म्येया निर्माता गोपालकृष्ण महर्जन खः।
रोटरी क्लब पाखें सम्मान
रोटरी क्लब अफ् ठमेलया ग्वसालय् दिवंगत पूर्वनायो कृष्णचन्द्र मानन्धरया नामं निस्वंनातःगु कृष्णचन्द्र मानन्धर लुमन्ति सिरपा वरिष्ठ संगीतकार एवं गायक अमरराज राजोपाध्याय व उदीयमान नव प्रतिभा निभाः डंगोलयात होटल शंकरय् छगू औपचारीक ज्याझ्वः याना लःल्हात। रोटरी क्लब अफ ठमेलया मदुम्ह पूर्वनायो कृष्णचन्द्र मानन्धर कोरोना ल्वचं कयाः थगुने मदुगु खः। वय्कलं न्हापा हे थः मदुम्ह अबु कृष्ण बहादुर मानन्धरया नामं स्वनातःगु कृष्ण बहादुर लुमंति कोष पाखें नेपालभाषा संगीत ख्यलय् योगदान यानाच्वपिं निम्हेसित दँय्दँस हनावयाच्वंगु खः।
तछला
बुदिंया म्ये खस भासं
नांजाःम्ह रेडियोकर्मी, म्येच्वमि व म्येहालामि, लोकंह्वाःम्ह सुरजबीर बज्राचार्यं च्वयादीगु बुदिंया भिन्तुना म्येया नेपाली संस्करणया पितब्वज्या जुल। म्येच्वमि व म्येहालामि बज्राचार्यया नेपालभाषाय् अतिकं लोकंह्वागु बुदिंया भिन्तुना म्येया नेपाली संस्करणया पितब्वज्या भृकुटीमण्डपया बुद्धविहारय् झी वरिष्ठ कलाकार मदनकृष्ण श्रेष्ठया मूपाहाँसुइ जूगु खः।
सह प्रा डा. रास जोशी नेभाकेवि प्रमुख
सहप्रा. डा. रास जोशी नेभा केन्द्रीय विभागया प्रमुख नियुक्त जुयादीगु दु । वय्कःया तःगू हे अनुसन्धानात्मक सफू, उपन्यास, चिनाखँ पिहां वयेधुंकूगु दुसा ‘ईया बाखं’ नांया शर्ट मूभी नं निर्देशन यानादीगु खः ।
स्थानीय चुनावय् नेवाः कलाकार
स्थानीय चुनावय् स्थानीय कलाकरपिंसं थःगु उम्मेदवारी ब्यूपिं मध्ये चुनावय् सफल जुपिंया धलः दयेकेगु ज्याखँ पेजथ्री पाखें जुल । थुगुसीया चुनावय् सुनिता डंगोल (उपमेयर) – नेपालभाषाया मनोरंजन ख्यलय् तसकं हे सकृयम्हम्ह, न्हुच्छेकाजि महर्जन (१८ वडा यँे) म्येच्वमि , निर्मल रत्न शाक्य (१६ वडा अध्यक्ष यल) म्येच्वमि, संगीतकार व निर्माता, विरेन ताम्राकार (यलया १९ वडा सदस्य) निर्देशक, निर्माता व स्क्रीप्ट लेखक सुरेन तापाख्यःमि (९ वडा चन्द्रागीरी नगरपालिका) कलाकार त्याःगु दु ।
प्रेमध्वज प्रधान स्मृति प्रतिष्ठान
म्ये हालामि एवं संगीतकार प्रेमध्वज प्रधानया न्हापांगु वार्षिक श्रद्धाञ्जली सभा ज्याझ्वःस गोल्डेन भ्वाइस प्रेमध्वज प्रधान स्मृति प्रतिष्ठानया उद्धाटन यात। प्रतिष्ठानं नेपाया साङ्गीतिक क्षेत्रय् प्रेमध्वज प्रधानं ब्यूगु योगदानयात ल्यंकातयेगु थी थी गतिविधिलिसें सिरपा व सम्मानया ग्वसाः ग्वयातःगु दु । थुगु प्रतिष्ठानया मू ज्याकू संरक्षिका एवं अध्यक्ष किरण प्रधानया निवास बैंक मार्ग, बागबजारय् चायेकुगु दु।
बैद्य बाल्या नासः पुजा
वाङ्मय शताब्दी पुरूष डा. सत्यमोहन जोशीया १०३ क्वःगु बुदिंया लसताय् वय्कलं च्वयादीगु पूधा प्याखं ‘बैद्य बा’यात टेलिप्याखं दयेकेत नासः पुजा याःगु दु । ‘बैद्य बा’या टेलिसिरियलय् शरद कसाः, पुर्णिमा शाक्य डंगोल, धर्मकृष्ण श्रेष्ठ, किरन केन रन्जित, मोहनदेवी महर्जन, निर्मला श्रेष्ठ, नविन थेच्वमि व शशीकला मानन्धर लिसें आपालं कलाकार दु । लोक साहित्य परिषदपाखें निर्माणया ज्या न्ह्याकीगु ‘बैद्य बा’ टेलिप्याखंया निर्देशनया भाला शान्तराज शाक्यं क्वबिइगु जुउगु दु ।
रोशनकुमार राजभण्डारी मन्त
नेपालभाषा व खस नेपाली भाय्या नांजाःम्ह गजल च्वमि रोशन कुमार राजभण्डारी मंत । ६३ दँ दुम्ह साहित्यकार राजभण्डारी क्यान्सर ल्वचं कयाच्वंम्ह खः । मदुम्ह राजभण्डारीया थीथी ७ गू साहित्यिक कृति पिदने धुंकुगु दु । वय्क छम्ह साहित्यकार जक मखुसे वरिष्ठ ज्ञानमाला भजनकःमि, गजलकार, गायक व संगीतकार नं जुयाःदी । नेपालभाषा जक मखुसे खस भासाय् नं वय्क नां जाः ।
दिल्ला
व मनू सु मनू
मगन ईन्टरटेनमेन्टया ब्यानरय् नेपालभाषया म्यूजिक भिडियो ‘व मनू सू मनू?’ कीर्तिपुर सिनेप्लेक्स कीर्तिपुरय् प्रिमियर जुल । थुगु म्यूजिक भिडियोया निर्देशन व छायांकन रजिन महर्जनं याःगु खः । भूवन महर्जनया शब्द संगीत व राजेन्द्र डंगोलया सलय् थुगु म्ये दयेकुगु खः । थुगु म्येया संगीत संयोजन सुरेन्द्र श्रेष्ठं याःगु खः । म्येय् किपूया नांजाःम्ह कलाकार लक्ष्मी कुमार महर्जनया मू भुमिका दु ।
विश्वास बज्राचार्यया न्हूगु म्ये
पेजथ्री पिपल्स च्वइस अवार्ड ११४२या उत्कृष्ट निर्देशकया सिरपा त्याकादीम्ह विश्वास बज्राचार्यया निर्देशनय् न्हूगु म्यूजिक भिडियो लिफः लिफः पिदंगु दु । पुस्कर प्रजापतिया परिकल्पनय् तयार जूगु थुगु म्यूजिक भिडियाया खँग्व, संगीत पुस्कर प्रजापतिं हे तःगु खः। थुगु म्येया संगीत संयोजक फिरोज बज्राचार्य खः । थुगु म्ये आशिष भडेलं हाःगु खः । कलाकार कथं सुधीर श्रेष्ठ, किरण जोशी व अनुज शाक्य लिसें रिम्सा श्रेष्ठ, विसुम राज शाक्य, रुक्साना महर्जन, श्रृजा अवाले व सोनिया तण्डुकार दु ।
स्वतन्त्र संसारया कमब्याक
नेपालभाषाया लोकंह्वाःम्ह कलाकार स्वतन्त्र संसार महर्जन ताः ई लिपा खस भाय्या म्यूजिक भिडियो पाखें हाकनं खने दयेकः वःगु दु। संसार क्रियशन्स नेपालपाखें निर्माण याःगु ‘नजाउ टाढा क्षितिजमा’ बोलया खस नेपाली भाषाया म्युजिक भिडियो किर्तिपूर सिनेप्लेक्सय् प्रिमियर याःगु खः। दिपक विवश आँसुं च्वःगु थुगु म्ये कल्पना श्रेष्ठं सः बियादीगु खः अले लय् मञ्जु नकःमिं चिनातःगु खः । म्येया संगीत संयोजन बुद्ध साय्मिं याःगु खः। म्युजिक भिडियोलय् स्वतन्त्र ‘संसार’ महर्जन व शोभा महर्जनया नापनापं संम्बत संसार महर्जन दुथ्यानाच्वंगु दु।
एम्सया न्हू धाः
एम्स इन्टरटेन्मेंटया तःमुँज्या व न्हूधाः जूल । न्याक्वःगु तःमुँज्यां सुरेन्द्र महर्जन तापाख्यःमियात हाकनं नायः ल्यःगु दु। अथे हे तुं न्वकु पदय् रामकुमार महर्जन ल्यःगु दुसा छ्यान्जे कथं राजेन्द्रकुमार महर्जन राजी किपू , दाँभरीं बुद्ध लक्ष्मी (अनु महर्जन) यात ल्यःगु दु। दुजलय् चन्दा श्रेष्ठ, कमला श्रेष्ठ व विक्रम महर्जन ल्यःगु दु।
नेवाः फिल्म सोसाइटीया कार्यशाला
नेवाः फिल्म सोसाईटीया ग्वसालय् भिडियोग्राफी कार्यशाला क्वचाल। नेवाः फिल्म सोसाइटीं यलया स्कूल अफ फिल्म मेकिङय् स्वन्हुयंक भिडियोग्राफी सम्वन्धि कार्यशालाया ग्वसाः ग्वःगु खः। समापन ज्याझ्वलय् सोसाइटीया नायः विराजकाजी राजोपाध्याय, आदिवासी जनजाति चलचित्र महासंघया नायः अमृत सुनुवारं सहभागीतयत दसिपौ लःल्हात।
गुँला
एम्सया फुट्सल कासा आह्वान
चन्द्रागिरी नगरपालिका ९ वडाया मच्छेगामय् च्वंगु मत्स्य रिक्रेशन सेन्टरया ग्वसालय् एम्स इन्टरटेन्टमेन्टं एम्स आर्टिष्ट फुटसल कासा याइगु खँ पत्रकार सम्मेलनय् एम्स इन्टरटेन्टमेन्टया नायः सुरेन्द्र महर्जनं आह्वान यात।
राजमान्चिया म्ये
लजना मानन्धर, प्रतिमा बज्राचार्य, रोजी श्रेष्ठ डंगोलपिन्सं हालातःगु ‘राजमान्चिया म्ये’ नं दुथ्याःगु म्येचाःया नापनापं नांजाःम्ह म्येहालामि प्रचण्ड राजोपाध्यायया नेपाली एल्बम ‘स्वर’ शुक्रवाः छगू ज्याझ्वःया दथुइ पितब्वज्या जूगुदु। नेवाः फिल्म सोसाइटी व कन्फराक्टिभ मिडिया सोलुसनया मंकाः ग्वसलय् येँया न्हूसतकया महर्जन कम्प्लेक्सय् जूगु ज्याझ्वः नेवाः फिल्म सोसाइटीया नायः व कन्फ्राक्टिभ मिडिया सोलुसनया संचालक, सम्पादक विराजकाजी राजोपाध्यायया सभानायःसुइ जूगु खः।
सम्झना थुसाया न्हू पलाः
नेपालभाषाया म्युजिक भिडियो ख्यःया कोरियोग्राफर एवं फोटोग्राफर सम्झना थुसा म्यूजिक भिडियो निर्देशक जुयाः पिलूवगु दु। “थःगु धइगु“ बोलया म्येया म्युजिक भिडियो वय्कःया निर्देशनय् पिलूवःगु दु। थुगु म्ये बिन्दु श्रेष्ठ जोशीं हालादीगु खः। भक्तबहादुर श्रेष्ठं च्वयादीगु थ्व म्येया मदन कपालिं लसय् हनादीगु खः। थ्व म्येया म्युजिक भिडियोया निर्देशन व परिकल्पना सम्झना थुसा, क्यामेरामाएन व एडिटर सन्देश प्रजापति खः।
गालय् वनया टिजर
एस स्क्वायर इन्टरप्राइजेज मल्टि इभेण्ट इन्टरटेंटमेंटया नेवाः संकिपा ‘गालय् वन’ या म्ये व प्रोमोया पितब्वज्या जुल। ख्वपया कमल विनायक सिनेमा हलय् जूगु पितब्वज्याय् ख्यालिजुजु मदनकृष्ण श्रेष्ठ मूपाहाँ कथं झायादीगु खः। संकिपा ‘गालय् वन’या निर्देशक संयुक्त स्थापित खःसा सिनेमाटोग्राफर व एडिटर बालकुमार मगर, द्वन्द्व निर्देशक व सह निर्देशक लक्ष्मीप्रसाद भैल ॐ बाबा, नृत्य निर्देशक रमिता बके श्रेष्ठ खः। शोभा महर्जनं, किरण जोशी, महेशप्रकाश हाडा, बिज्ञान चकेलेट नापनापं मन्जु श्रेष्ठ लगायत आपालं कलाकार थुकी दुथ्यानाच्वंगु दु ।
कविता जोशीया निपू म्ये
नेपालभाषाया लोकंह्वाःम्ह म्येहालामि कविता जोशी निपू म्ये पितब्वज्या जुल । ‘जोवनया रंग’ व ‘घालं अप्वः वइत हे ध्वइ’या म्युजिक भिडियो सिटिसि मलय् पितब्वज्या जूगु ज्याझ्वलय् कविता जोशीया श्रद्धय अबु द्वारिका लाल जोशीयात श्रद्धाया स्वां छानाः न्ह्याकुगु खः । जनकवि दुर्गालाल श्रेष्ठ मूपाहाँ कथं झायादीगु ज्याझ्वलय् म्येहालामि कविताया बाःजु अमरलाल श्रेष्ठया सभानायःसुइ जूगु खःसा विशिष्ट पाहाँ कथं लोकगायक भृगुराम श्रेष्ठ, वरिष्ठ म्येहालामि जुजु काजी रन्जित व समाजसेवी निरजनरत्न शाक्य नं उपस्थीति दुगु खः ।
नेशनल इन्टरटेन्मेन्ट अवार्ड
नेशनल इन्टरटेंटमेंट अवार्ड २०७९य् सर्वोत्कृष्ट भाषाभाषिया म्ये कथं नेवाः म्ये ‘धाये मफुत’ व सर्वोकृष्ट मोडल नेवाः कथं रन्जना सितिखु सिरपा त्याकेत ताःलागु दु।
राजु सिं सम्मानित
वरिष्ठ संगीतकार गोपाल योन्जनया ८० क्वःगु जन्मजयन्तीया लसताय् नेवाः साधना कला केन्द्रया ग्वसालय् वरिष्ठ संगीतकःमि राजु सिंहयात गोपाल योन्जन एचिभमेंट अवार्ड लःल्हाःगु दु । नेवाः साधना कला केन्द्रया संस्थापक बागमति भाइ सुन्दर मान श्रेष्ठया सभानायसुइ जूगु ज्याझ्वलय् वरिष्ठ संगीत विश्लेशक व फिल्म निर्देशक प्रकाश साय्मि मूपाहाँ कथं झायादीगु खः ।
डब्लू एन ओलय्् संयुक्त श्रेष्ठ
अमेरिकाया न्यूयोर्कय् जूगु प्यक्वःगु तःमुँज्यापाखें वर्ल्ड नेवाः अर्गनाइजेशन (हलिं नेवाः दबू) या न्हूम्ह नायः कथं बेलायतय् निवासी संयुक्त श्रेष्ठयात ल्यःगु दु ।
ञला
मानकृष्ण वा वायात ग्वाहलि
ईलोहं प्रकाशनया युट्यूबय् नेपालभाषाया नांजाःम्ह कलाकार मानकृष्ण ‘वावा’या संकिपा ‘थ्व ला ग्यानापु स्टाइल’या १००प भ्यूज पूवनाः जूगु आम्दानीया धेबा ५२ डलर व ईलोहं प्रकाशनपाखें मेगु धेबा तनाः मुक्कं १२०००÷– तका कलाकार मानकृष्ण ‘वावा’यात लःल्हात । थःगु शारिरीक अस्वस्थ्यताया कारणं छेँय् हे वासः याकाच्वना दिम्ह कलाकारयात वय्कःया हे निवासय् वनाः ईलोहं प्रकाशनया प्रबन्ध निर्देशक नरेशवीर शाक्यं उगु दां लःल्हाःगु खः ।
ए मय्जु
बागमति भाइया च्वसां “ ए … मयजु ’’ बोलया म्युजिक भिडियो पुल्चोक स्थीत नेवाः साधना कला केन्द्रय् पितब्वज्या जुल । थुगु म्ये सतिश महर्जन व सुधा लक्ष्मी श्रेष्ठं हालादीगु खः । म्येया संगीत व संयोजन जुगल डंगोलं तयादीगु खः। म्येया निर्देशन राम श्रेष्ठं याःगु खः। राम श्रेष्ठ, आकृति महर्जन, एन्जेल श्रेष्ठ व श्रृजना ग्वंगःबुया अभिनय थुकी दु ।
रत्न शोभाया तीजया म्ये
दच्छि न्ह्यः रेकर्ड जूगु तीजया म्ये टिका चुरा नौगेडी बोलया म्यूजिक भिडियो पिदंगु दु। लोकंह्वाःम्ह म्येहालामि रत्नशोभा महर्जनं निर्माण रत्नशोभा, दीपा महर्जन, रानीशोभा महर्जन, स्वस्ती महर्जन व सरिता महर्जनं सः बियातःगु दु । थुगु म्ये निर्देशक सुनीता राजभण्डारी जुनुं च्वःगु खःसा संगीत एवं एरेन्ज सुरेन्द्र श्रेष्ठं यानादीगु खः । म्यूजिक भिडियोस हिसिला महर्जन, सुनिता राजभण्डारी जुनु, आराध्या लक्ष्मी खड्गी, सुजाना बज्राचार्य, सुलोचना श्रेष्ठ, मिनू महर्जनं नृत्य न्ह्यब्वयातःगु दु ।
ख्यालि नखः ११४२
झीगु सः व सुकुण्दा फिल्मसया मंकाः ग्वसालय् ख्यालि नखः ११४२ क्वचाल । ज्याझ्वःया उलेज्या ख्यालि कलाकार मदनकृष्ण श्रेष्ठं यानादीगु खः । यलया ज्यापु प्रज्ञा भवनय् जुगु ख्यालि नखलय् ड्याडसन पुचःया मास्टरनी, राजेशमान मान सिंहया राजिनामा, बाशु शाहीया न्ह्यलं चायेकि, सुरेन्द्र मानन्धरया होस याना दिसँ, श्याम सुन्दर शिल्पकारया बुइके मखुला ख्यालः न्ह्यब्वःगु खः । ख्यालि नखःया ग्वसाखलकं म्हंफया वासः याका च्वनादीम्ह नांजाम्ह संगीतकःमि सुमन कपालि यात नं आर्थिक ग्वाहालि यायेगु बचं ब्यूगु खः ।
मानकृष्ण वा वा मन्त
ख्वताबजि सिरियलय् देपां बिइला व झूरम्ह खेलारी (खेलाडी) थेगो न्ववाना चर्चाय् वःम्ह व नेपालभाषा मनोरंजन ख्यःया चर्चितम्ह कलाकार मानकृष्ण वावा मन्त । छुं ई न्ह्यः निसें उसाँय् मदयाः छेँय् हे च्वना वासः याकाच्वंगु खः । ल्हाः तुति सना मवनेवं नये त्वनेगु नं कमजुजुं वनां च्वंगु खः । कपालि समाजया संस्कारकथं वय्कःयात जोगीपाखाया कपाली समाधिस्थलय् परम्पराकथं ध्यान मुद्राय अधिस्थान यानाब्थूंगु खः । मानकृष्ण वा वां थ्व ला ग्यानापु स्टाइल पाखें पेजथ्री अवार्डय् उत्कृष्ट कलाकार खल – भूमिकाय् त्याःकुगु खः ।
एम्सया फुटसल लिच्वः
एम्स इन्टरटेंटमेंटया एम्स आर्टिस्ट फुटसल ११४२ क्वचाल । फुटसल कासाय् मिजं कलाकार पाखे म्येहालामि भिम तुलाधरया टिम न्हापलाःगु खः । निर्देशक सुरेन्द्र तुलाधरया टिम लिउ व वरिष्ठ कलाकार राजेन्द्रमान शाक्यया टिम लियांलिउ लाःगु खः। मिसा कलाकार टिमय् कलाकार रचना सिंहया टिम न्हाप, हिसिला महर्जनया टिम लिउ व पल्पसा डंगोलया टिम लियांलिउ लाःगु खः । मिसा कलाकारय् उत्कृष्ट कासामि पल्पसा डंगोलं त्याकल, अले उत्कृष्ट गोलकिपर संगीता महर्जन त्याकल । मिजं पाखे उत्कृष्ट कासामि भुवन महर्जनं त्याकलसा उत्कृष्ट गोलकिपर किशोर चिपालुं त्याकल । ज्याझ्वलय् निवर्तमान राष्ट्रिय खेलकुद विकास मन्त्री माननीय राजेन्द्र कुमार केसी मू पाहां कथं झायादीगु खः ।
इन्दिरा घिमे मैँचा
न्हापांम्ह मिसा धिमेवादक ख्वपया इन्दिरा लाछिमस्यूया जीवनीइ आधारित नेपालभाषाया संकिपा इन्दिरा घिमे मैँचा’या मूहुर्त ख्वपया कमलविनायक ब्यांक्वेटय् जुल । बिके फिल्म्सया ब्यानरय् निर्माण जुइगु थ्व संकिपाया च्वमि व निर्देशक सुरेन्द्र तुलाधर खः । रोजिना सुवाल, गणेशराम लाक्षी, आशाकाजी थकु, नगिना जोशी, रुपेन श्रेष्ठ थक्वाःमि, देबचन्द्र बज्राचार्य, रामराजा भाम व सिम्रिक श्रेष्ठ दु ।
कौला
मां छन्त लुमंकाः
सज्जु मानन्धरया सलय् ‘मां छन्त लुमंका’ म्येया म्युजिक भिडियो नेवाः टिभि एचडिइ प्रिमियर जुल । राजु मानन्धरया च्वसा अले जुगल डंगोलया संगीतय् तयार जुउगु खः । थुगु म्ये संसार्स अनलाइन टिभिया युट्युबय् अपलोड याःगु खः । म्येया खँग्वःयात कयाः पेजथ्री बाःछिपौया सम्पादक दर्शन वीर शाक्यं विश्लेष्णात्मक टिप्पणी यानादीगु खः । म्यूजिक भिडियोयात कयाः वरिष्ठ सिने पत्रकार बिजयरत्न असंबरें नं बिश्लेष्णात्मक टिप्पणी यानादीगु खः ।
स्टार म्यूजिक भिडियोया दसिपौ
संसार्स अनलाइन टिभिया ग्वसालय् नेपालभाषा स्टार म्यूजिक भिडियोअर्वाडया निगुगु संस्करण ब्वति कायेगु निंतिं मुक्कं ८६ गु म्यूजिक भिडियो दर्तायाःसें सहभागीताया प्रमाणपत्र लःल्हाःत । स्वतन्त्र संसार महर्जनया सभानायःसुइ न्ह्याःगु उगु ज्याझ्वलय् यल महानगरपालिका वडा ल्याः २१ या वडानायः रविन्द्र महर्जन मूपाहाँ कथं झायादीगु खः ।
जूनु श्रेष्ठया पुनरागमन
नेपालभाषा संगीत ख्यलय् ताः ई लिपा म्येहालामि जुनु श्रेष्ठं थःगु म्ये पितहःगु दु । लोकं ह्वाःगु नेपालभाषाया म्ये ‘लुमंका च्वना जिं, जिगु नुगलय्, समा याना, मन जिगु उइं जुल’ म्येया नापनापं ‘मेरो चुपचापको अर्थ व पछ्याउँदै मेरा दिनहरु’ म्ये दुथ्याका ‘जुन’ म्युजिक भिडियो मुनाया पितब्वज्या याःगु दु । म्ये अनिल शाहीं संगीत संयोजन याःगु खः ।
हिसिमतिया शो सक्वय्
चःमति नेवाः खलःया कवः चःमति सँकिपा प्रोडक्शनया न्हापांगु पिथना नेपालभाषा संकिपाः ‘हिसिमति’ ऐतिहासिक नगर सक्व (संखरापुर नगरपालिका)या भक्ति बेम्बु कटेज एण्ड पार्टि प्यालेसय् प्रदर्शन जुल । ज्याझ्वःस सक्व नगरपालिकाया मेयर भाजु रमेश नापित, उप मेयर सरिता श्रेष्ठ, वडा अध्यक्ष राधाकृष्ण श्रेष्ठ लिसें किचः सिंह, रविन महर्जन व राजभाइ मानन्धर पिंत संकिपाया निर्माता निर्देशक पूर्णकाजी ज्यापुं हना नं दिल ।
लिक्क वयाःया म्यूजिक भिडियो
पेजथ्री पिपल्स च्वइस ११३० (न्हापांगु संस्करणय्) उत्कृष्ट संगीत मनराजा नकःमि, पेजथ्री अवार्ड ११३० व ११३३य् उत्कृष्ट म्ये च्वमिया अवार्ड त्याकेत ताः लाःम्ह निर्मल रत्न शाक्यया च्वसां पिज्वःगु अले पेजथ्री अवार्ड ११४२य् उत्कृष्ट मिसा सः आधुनिक म्ये त्याकेत ताःलाम्ह रत्न शोभा महर्जन , पेजथ्री अवार्ड ११४२य् उत्कृष्ट संगीत संयोजक जीवित जल्मि त्याकेत ताःलाःगु म्ये लिक्क वयाः जितः धाल वं.. या म्यूजिक भिडियो प्रिमियर लबिम मलय् जुल । थुगु म्येया निर्देशन देव कुमार श्रेष्ठं याना दीगु खःसा म्येय् हिसिला महर्जन व मणिराज लवतं अभिनय यानादीगु दु ।
यः ससःमां व गुलि जक हिसि मदु
संगीतकार, एरेन्जर एवं रेकर्डिस्ट अन्जन श्रेष्ठया सःलय् ससःमां म्ये अले ताराराम मुनकःमि व दीपा महजर्नयाया युगल सःलय् गुलि जक हिसिमदु म्ये नेवाः एचडी टिभिइ प्रिमियर जुल । सन्चारकःमि एवं हास्य कलाकार सुरेन्द्र मानन्धरया निर्देशनय् थुपिं निपुं म्येया म्युजिक भिडियो पिदंगु खः । थ्व म्ये निर्देशक मानन्धरं हे च्वयादीगु खःसा अन्जन श्रष्ठ व सुरेन्द्र मानन्धर जाना लय चिनादीगु खः । गुलि हिसि मदुया च्वमि आनन्द बज्राचार्य व लय् चिनामि अनिल तुलाधर खः ।
उच्च शिक्षाया टिजर
बिदेशय् वनां आखः ब्वंवनेग बिषय मगन इन्टरटेनमेन्टया ब्यानरय् निर्माण जूगु शर्ट फिल्म ‘उच्च शिक्षा, education for a commoner“ या टिजर सार्वजनिक जूगु दु । थुगु प्याखँया लेखन व निर्देशन रजिन महर्जनं याःगु दु । रामचन्द्र महर्जन व जमुना महर्जनं निर्माणा याःगु थुगु शर्ट फिल्म नेपालभाषा व नेपाली नितां हे भासं पिदनी । थुगु प्याखनय् लक्ष्मी कुमार महर्जन, क्रिसल श्रेष्ठ, कृष्ण भक्त महर्जन, सुदिप भजु, सकिना बट, श्रयम महर्जन कलाकार कथं म्हिताच्वंगु दु ।
