नेपाःया कानूनकथं सुं नं मिसामचा लिसे असहमतिइ यौन स्वापू तलधाःसा वा १८ दँ सिबें म्हो उमेरया मिसामचालिसे सहमतिइ नं यौन स्वापू तल धाःसा उकियात बलात्कार ठहर यानातःगु दु । थथे बलात्कार ठहर याइगुया छगू मूल कारण थ्व नं खः की झीगु शरीर २० दँ तक्क नं शारीरिक व मानसिक रुपं विकास जुयाच्वनीगु प्रकृयाय् न्ह्यानाच्वंगु दइ । पूर्ण विकास मजूसे अझं विकासया प्रकृयाय् न्ह्यानाच्वंगु कारणं १८ दँं क्वय् छुं नं कथं याइगु निर्णय् अपरिपक्व जुइ धैगु मान्यताय्, नेपाःया कानूनं १८ दंक्वयया मिसामस्त लिसे शारीरिक स्वापू तयेमते धकाः कानून दयेकूगु खः ।
यदि थथे यात धाःसा लिपा तक नं शारीरिक शोषणका कारणं मानसिक एवं शारीरिक असर लानाच्वनीगु अवस्थाय् मानवीय जीवन नारकीय जुइफु । तर सेक्सया सहमतिया बर्ष धाःसा थीथी देशय् पानाच्वंगु नं दु । विश्वय् सेक्सया निंतिं सहमतिया निर्णायक वर्ष ११ निसें २१ तक्क दुसा अझ सेक्सया निंतिं वैवाहिक जीवनय् प्रवेश याये माःगु प्रावधान नं दु । सहमतिइ याइगु सेक्सया नितिं नाइजेरीया ११ बर्ष, फिलिपिन्स, एंगोला १२, जापान, नाइगर १३ बर्ष, चीन, ब्राजील, जर्मन, इटाली थें जाःगु देशय् १४ बर्ष, ग्रीस, स्वीडेन १५ बर्ष, रसिया, युके, स्पेन १६ वर्ष, आइरल्याण्ड, साइप्रस १७ वर्ष, भारत, इजिप्ट, इराकय् १८ वर्ष सिबें च्वये दुसा पाकिस्तान, इरान, अफ्गानिस्थान इत्यादी देशय् सेक्सया निंतिं न्हापां व्याहानिं यायेमाः । हरेक देशकथं यौन स्वापूया वर्ष पानाच्वंगु दु । छु देशया नागरिक खः वं व कथं पालना मयाःसा दण्डया हकदार अवश्यं जुइ ।
देशया नीति नियम कथं कानून पानाच्वनिं । नच्चागु न्ह्यपुं नच्चागु व्यवहार क्यनाच्वनिं । सुयांगु उक्साहट, सुयांगु लहलहलय् जुइगु, छु ज्या यातकी गज्योगु असर जुइ धकाः बिचाः याये मफइगु अवस्था जुयाच्वनिं । नेपाःया कानूनं थुगु हे खँयात वाःचायेकातःगु दु । कानून सकसितं बराबर यानातःगु दु ।
थुगु समिकरणयात न्ह्योने तयेधुंकाः आ आरोपि व्यक्तित्व सुं सेलेब्रेटी जुया बिइवं हे मेगु हे धटनाया रुप काइ । थुकी स्क्याण्डल दयेकेगु समाज व सामाजिक संजालं जीवन झन हे अस्तव्यस्त यानाबिइ । बैचारीक मत भिन्नता हया बी । सेलेब्रेटीया योगदानयात मुल्यांकन यानाच्वंगु दइ । जबकी कानून धैगु सकसितं बराबर जुइ ।
थुगु खँय् दकलय् होश यायेमाःगु धैगु सेलेब्रेटीतय्सं हे खः । समाजय् लोकंह्वायेवं हे संसार हे त्याका धैथे मनूतय् धारणा ब्वलनाच्वनिं । थः नेपाःया कानून सिबें च्वये धैगु तायेकाच्वनिं । तर सुं नं मनू धाःसा संविधान व कानून सिबें च्वये जुइ मखु ।
