येँ स्थानीय सरकारं अतिकं लोकप्रिय कार्यक्रम व नारा कथं महानगर दुने च्वंगु होटल, रेष्टुरेन्ट लिसें नीजि संघ संस्थाया शौचालय सर्वसाधारण मनुखं निशुल्क छ्यलेगु प्रस्ताव याःगुयात आपलं नीजि संस्थातय्सं समर्थन याःगु दु । स्थानीय सरकारया दकलय् प्राथमिकताय् निर्णय व कार्यान्वयन याःगु ज्याखँ सार्वजनिक शौचालय्या छ्यलाबुला छगू लोकप्रिय एजेण्डा नं खनेदु । थी थी ब्यवसायीया क्षत्रय् न्हू न्हू गाहकी दुकायेगु जुयाच्वनिं। थुकीया निंतिं माः माःगु कथं बजारीकरणया रणनीति थी थी व्यवसायीतय्सं दयेकाच्वंगु दइ गथेकी निपा पिज्जा नल धाःसा छपा पिज्जा फ्रि , १२ बजे निसं ५ बजेतक्क कफि त्वंवसाः छगू कपया जक ध्यबा धायेगु इत्यादी ।
बजारयम माग कथं स्वनिगलय् मानव चाप अप्वःगु कारण थाय्थासय् सर्भसुलभ रुपं शौचालय् नं मगाना च्वंगु दु । स्वनिगलय् थ्व सिबें न्ह्यो नं नीजि ख्यःया रेष्टुरेन्ट, बैक वा अफिसं थःगु शौचालययात नीजि हे धकाः मेपिं दुकाये हे मखु धैगु नीति तयातःगु मदु । यक्वस्यां हे गल्ली गल्लीइ चायेकातःगु च्यापसः, होटल इत्यादि थासय् वनां शौचालय् नं छ्यलेगु अले छुं सामान नं न्यायेगु वा च्या त्वनेगु नं यानाच्वं ।
येँ महानगरपालिकां दुने मुक्कं ६५गू जक सार्वजनिक शौचालय् दु । थुकी मध्यय् नं ३०गू ति सार्वजनिक शौचालय् जक छ्यलेबह जू । तर नगरपालिका दुनेया सार्वजनिक शौचालय् धाःसा निशुल्क मखु । छ्यलेगु निंतिं निश्चित ध्येबा पुलेमाः। येँया जनसंख्याः ३० निसें ४० लखया हाराहारी दु। उकिया निंतिं सार्वजनिक शौचालयया गा हे मगाः। जबकी येँया भोटरर्स थ्यंमथ्यं ३गू लखया धलः वंगु स्थानीय चुनावय् क्यन । थ्व ल्याखं ल्यंदुपिं मनूयात सितिकं हे शौचालय् छ्यले बिइकेगु धैगु सेवाया स्वरुप खनेदुसां नं व्यापारिक स्वरुप हे जक खः धकाः थुइके माः । छाय्की मेयर बालेन साहया धापू कथंनं मनूत नीजि व्यवसाय् दुथाय् सार्वजनिक शौचालय छ्यल धाःसा व्यापार नं बढे जुइ । तर महानगर अन्तर्गत हे चाःप दुगु थाय् पहिचान याना हे न्हूगु कथंया आधारभूत संरचना दयेके आवश्यक जू छाय्की व्यक्तिगत छ्यलाबुलायानिंतिं दयेकतःगु ट्वाइलेटया आधारभूत संरचना सार्वजनिक शौचालय्या वेग पुरा याये फइ मखु । निश्चित ईया निंतिं थुगु कथंया रणनीतिं साथ बिइ तर कालान्तरय् थ्व लाभदायिक जुइ मखु । येँ महानगरपालिकां चाप युक्त स्थान पहिचान याना लक्षित योजना कथंया सार्वजनिक शौचालय्या निर्माण याना वंसा पाय्छि खः । तर महानगरं थःगु अधीनय् दुगु शौचालय् सशुल्क यानाः मेपिनिगु नीजि सम्पति सार्वजनिक छ्यलाबुलाया निंतिं इनाप यायेगु कतिला सोच सिबें मेता छुं मखु ।
