चन्द्रागिरी नगरपालिका ९ वडाया मच्छेगामय् च्वंगु मत्स्य रिक्रेशन सेन्टरय् एम्स इन्टरटेन्टमेन्टं एम्स आर्टिष्ट फुटसल कासा यायेगु नितिं पत्रकार सम्मेलन एम्स इन्टरटेन्टमेन्टया नायः सुरेन्द्र महर्जनं याःगु दु ।
एम्स इन्टरटेन्टमेन्टया दांभरी बुद्धलक्ष्मी महर्जनं लसकुस याःसें प्रेस विज्ञप्ति ब्वनाः न्यंकादीगु खः ।एम्स इन्टरटेन्टमेन्टया छ्याञ्जे लिसें आर्टिष्ट फुटसल कासाया कजि राजेन्द्र कुमार महर्जन राजीं फुटसलया विषयस व एम्स संस्थाया विषयस कनादील।
एम्स इन्टरटेन्टमेन्टया नायः सुरेन्द्र महर्जन तापाख्यःमिं ज्याझ्वः क्वचायेकादीगु उगु पत्रकार सम्मेलनय् एम्स आर्टिष्ट फुटसल कासाया कप्तान व उपकप्तानपिन्त खादा क्वखायेकुगु खः।
वइगु २०७९ भाद्र १८ गते शनिवाः मच्छेगांया मत्स्य रिक्रेशन सेन्टरय् जुइगु एम्स आर्टिष्ट फुटसल कासाया नितिं मिजंपाखे कप्तानपिं सुरेन्द्र तुलाधर, पवन जोशी, मन राजलवट, सविन शाक्य, कृष्णभक्त महर्जन, आर्यम नकःमि, भीम तुलाधर व राजेन्द्रमान शाक्यपिन्त ल्यःगु दुसा उपकप्तानय् लक्ष्मीकुमार महर्जन उदास, सानुबाबु महर्जन, सुरज नापित, सुरज व्यञ्जनकार, सज्जु मानन्धर, विजय तण्डुकार, बालमुकुन्द प्रजापति व सुरेन्द्र श्रेष्ठपिन्त ल्यःगु दु ।
अथेहे, मिसा कप्तानय् रचना सिंह, हिसिला महर्जन, पल्पसा डंगोल व सरस्वती मानन्धरपिन्त ल्यःगु दुसा उप कप्तानय् शोभा महर्जन, गंगा महर्जन, रोजीना सुवाल व रुक्साना महर्जनपिन्त ल्यःगु दु ।
पत्रकार सम्मेलनय् सार्वजनिक याःगु विज्ञप्तिइ एम्स आर्टिष्ट फुटसल कासापाखें कलाकारदथुइ स्वापू क्वातुकेगु, भातृत्व सुदृढ व बल्लाकेगु, स्वापू विस्तार यायेगु लिसें कलाकारदथुइ आत्मीयता क्वातुकेगु विश्वास प्वंकातःगु दु । वइगु भाद्र १८ गते शनिवाः जुइगु मैत्रीपूर्ण एम्स आर्टिष्ट फुटसल कासा भाद्र ३१ गते शुक्रवाः मत्स्य रिक्रेशन सेन्टरय् समापन जुइगु व उगु ज्याझ्वलय् फुटसलय् त्याःपिं कलाकार टिमयात सिरपाः लःल्हयोगु लिसें थीथी कलाकारपिनिगु सांगितिक व सांस्कृतिक ज्याझ्वः म्युजिकल स्वीमिङ पुल पार्टी जुइगु जानकारी नं पत्रकार सम्मेलनय् ब्यूगु दु ।
