स्थानीय चुनावय् थ्यंमथ्यं थुगुसी यक्व हे स्थानीय कलाकरपिंसं थःगु उम्मेदवारी ब्यूगु जुल। तर थुकी मध्ये सुं सुं जक हे थुगुसीया चुनावय् सफल जुल । थुपिं त्याःपिं स्थानीय कलाकार थुगु कथं दु ।
सुनिता डंगोल
नेपालभाषाया मनोरंजन ख्यलय् तसकं हे सकृयम्ह छम्ह स्थानीय ब्यक्तित्व खः सुनिता डंगोल । येँ महानगरपालिकाया उप मेयरया उम्मेदवारी बियाः मुक्कं ६८ हजार ६ सय २१ मत हयाः त्याःगु खः । सन २०११या मिस नेवाः जुइत ताःलाम्ह सुनिता डंगोल ज्याझ्वः संचालिका जुयाः सकसिया नुगः त्याकाच्वंम्ह व्यक्तित्व खःसा नेपाल लिपिया प्रर्वद्धकया रुपय् थाय्थासय् क्यालिजात्रा नं न्ह्याकाच्वंगु खः ।
न्हूच्छेकाजि महर्जन
येँ महानगरपालिका १८ वडाया वडा अध्यक्ष न्हूच्छेकाजि महर्जन त्याःगु दु । १ हजार २ सय ९३ मत हयाः न्हूच्छेकाजि महर्जन त्याःगु खः । न्हुच्छेकाजि महर्जन छम्ह म्येच्वमि कथंनं सकस्यां म्हस्यु । वय्कलं आपा धैथे नेवाः जागरण म्ये च्वयादी । वय्कया पुचः म्ये छि नेवाः जि नेवाः म्ये पेजथ्री पिपल्स च्वइस अवार्ड ११४२या नामांकनय् दुथ्याःगु खः ।
निर्मल रत्न शाक्य
यल महानगरपालिका १६या वडा अध्यक्ष निर्मलरत्न शाक्य त्याःगु दु । २ हजार ३७३ मत हयाः निर्मलरत्न शाक्य त्याःगु खः । निर्मलरत्न शाक्यं नेपालभाषा मनोरंजन ख्यःया निंतिं यक्व हे योगदान यानाच्वंम्ह व्यक्तित्व नं खः । वय्कयाः च्वसां पिज्वःगु म्ये लिक्क वयाः जितः धाल वं थौं तक्क नं हरेक मनोरंजनात्मक ज्याझ्वलय् प्याखँ हुलाच्वंगु दइ । वय्क छम्ह म्येच्वमि जक मखुसे संगीतकार, व निर्माता नं खः । पेजथ्री अवार्ड वय्कलं निक्वः तक्क त्याके धुंकुगु दु व पेजथ्री अवार्ड ११४२य् वय्कयात ज्यूरी सम्मान नं लःल्हाःगु खः ।
विरेन ताम्राकार
यलया १९ वडाय् विरेन्द्र ताम्राकार वडा सदस्यय् त्याःगु दु । विरेन्द्र ताम्राकार निर्देशक, निर्माता व स्क्रीप्ट लेखक कथं नं म्हस्यु । वय्कया निर्देशनय् त्याग प्याखं तसकं हे लोकंह्वाःगु प्याखँ खः गुकी हिसिला, भिंतुना व धीरेन शाक्यया अभिनय् दुगु खः ।
