गोल्डेन भ्वाइस अफ नेपाल, म्ये हालामि एवं संगीतकार प्रेमध्वज प्रधानया न्हापांगु बार्षिक श्रद्धाञ्जली सभा ज्याझ्वःस गोल्डेन भ्वाइस प्रेमध्वज प्रधान स्मृति प्रतिष्ठानया उद्घाटन यात । मदुम्ह प्रेमध्वज प्रधानया जहान किरण प्रधानं थुगु प्रतिष्ठानया उलेज्या यानादीगु खः ।
प्रतिष्ठानय् सल्लाहकारय् अग्रज सर्जकपिं बच्चु कैलाश बस्नेत, किरण खरेल, योगेश वैद्य, शम्भुजित बासकोटा व मञ्जु कुमार श्रेष्ठ दु । कार्यकारिणी समितिइ संरक्षिका तथा अध्यक्ष मय्जु किरण प्रधान, उपाध्यक्ष प्रसन्नध्वज प्रधान, सचिव कविरध्वज प्रधान, कोषाध्यक्ष भूवन मास्के ‘मुस्कान’ व सदस्यय् मनराजा नकर्मी, जुगल डङ्गोल, राजु वैद्य व एरिना श्रेष्ठ दु ।
थुगु प्रतिष्ठानं नेपाया साङ्गीतिक क्षेत्रय् प्रेमध्वज प्रधानं ब्यूगु योगदानयात ल्यंकातयेगु, नेपाःया सांगीतिक क्षत्रय् योगदान यानाच्वंपिं सांगितिक ब्यक्तित्वयात सिरपा व सम्मान बिइगु, प्रेमध्वज प्रधानया बिषलय् जानकरी प्रदान यायेगु, आत्मकथा व स्मृतिग्रन्थ पिकायेगु, प्रतिभाशाली कलकारपिंत न्ह्यांवनेगु निंतिं ग्वाहलि यायेगु लिसें प्रेमध्वज प्रधानया बिष्यलय् अध्ययन अनुसन्धानय यायेगु निंतिं ग्वाहलि यायेगु खँ न्ह्यब्वःगु खः । थुगु प्रतिष्ठानया मू ज्याकू संरक्षिका एवं अध्यक्ष किरण प्रधानया निवास बैंक मार्ग, बागबजारय् चायेकुगु दु ।
ज्याझ्वलय झी मदनकृष्ण श्रेष्ठ, दीप श्रेष्ठ, सम्भुजित बास्कोटा व यादव खरेलं नुगः खँ तयादीगु खः । ज्याझ्वःलय् प्रेमध्वज प्रधानयात सांगीतिक देछाःपाखें श्रद्धाञ्जलि नं ब्यूगु खः ।
