अडियो व भिडयो म्येचा छन्त नापलाये सातकि जनकवि दुर्गालाल श्रेष्ठं शुक्रबार छगू ज्याझ्वलय् या पितब्वज्या यानादिल । म्ये च्वमि राजु मानन्धरया रचना व म्येहालामि सज्जु मानन्धरं सः बियातःगु थुगु म्येचाः खः सा संगीत व संगीत संयाेजन जुगल डंगाेलं यानादीगु दु ।
मुकं खुपु म्ये व म्येया भिडियो दुथ्यागु थुगु म्येचालय् निशा देशार व रत्नशोभा महर्जन लिसे नं सज्जु मानन्धरं म्ये हालातःगु दु । थुगु म्येचाःया टाइटल ट्राय्क छन्त नापलाये सातकि पेजथ्री पिपल्स च्वइस अवार्ड ११४२य् उत्कृष्ट आधुनिक ज्वः म्येया नामांकनय् दुथ्यानाच्वंगु खः सा थुगु हे म्येया माेडल द्वय् किरण जाेशी उत्कृष्ट उदीयमान मिजं माेडलया नामांकन व नैन्सी महर्जनं थुगु हे म्ये प्याखेँ उत्कृष्ट उदीयमान मिसा माेडलया अवार्ड त्याकेत नं ताःलाःगु खः ।
एल्बमय् दुथ्यानाच्वंगु थी थी भिडियो सुरेन्द्र मानन्धर,राजेन्द्र डंगोल , सुरोज महर्जन लगायतया अलग अलग निर्देशक पिन्सं निर्देशन यानातःगु दु ।
ज्याझ्वः गणेश कुमारी मानन्धर फाउण्डेशनया नायाे दिलबहादुर मानन्धर सभानाय जुयादीगु खःसा जनकवि श्रेष्ठं त्वाःदेवाय् मत च्याका ज्याझ्वःया उलेज्या यानादीगु खः । ज्याझ्वलय् सांसद जीवन राम श्रेष्ठ , नेवाः देय दबुया नायः पवित्र बज्राचार्य,नांजाम्ह म्येहालामि जुजुकाजि रञ्जित , सिने पत्रकार विजयरत्न असंबरें नुगःखँ तयादीगु खः ।
ज्याझ्वलय् म्येहालामि सज्जु मानन्धरं लसकुस यानादीगु खःसा म्ये च्वमि राजु मानन्धरं नं नुगःखँ तयादीगु खः ।
