पेजथ्री बाःछिपौया ग्वसालय् पेजथ्री पिपल्स च्वइस अवार्डया प्यंगूगु संस्करण येँया सभागृह हलय् चौलाथ्व पुन्हिं (बैशाख ३, २०७९) खुन्हु क्वचाल । नेपालभाषाया संगीत क्षेत्र, म्यूजिक भिडियो क्षेत्र व संकिपा क्षेत्रय् थुगु अवार्ड लः ल्हाःगु खः । पेजथ्री अवार्डया थ्व प्यंगूगु संस्करण खः । थ्व सिबें न्ह्यः नेपाल संवत ११३०, ११३३ व ११३७ य् न्ह्याये धुंकुगु खः ।
मुक्कं ४६ विधाय् सिरपा लः ल्हाःगु खः । संगीत विधाय् १९ अवार्ड, म्यूजिक भिडियो विधाय् १३ व संकिपा विधाय् १४गू अवार्ड लः ल्हाःगु खःसा ज्यूरी सम्मान कथं वि.नन्द बैद्य, निर्मल रत्न शाक्य, अन्नपूर्णेश्वरी श्रेष्ठ व इमर्ज ब्याण्डयात सम्मान याःगु खःसा लाइफटाइम एचिभमेन्ट अवार्ड वरिष्ठ हास्य कलाकार एवं ख्यालि जुजु मदनकृष्ण श्रेष्ठयात लःल्हाःगु खः ।
अवार्डय् संगीत विधा पाखे उत्कृष्ट मिजं सः – महेश राज थापा (गन वने त्यना), उत्कृष्ट मिसा सः –‘स्वस्ती महर्जन’ (वेनगु हे खः सा), उत्कृष्ट मिजं सः उदीयमान कलाकार – विजेन्द्र चवाल (जीवनया छुं ई), उत्कृष्ट मिसा सः उदीयमान कलाकार – पूर्णिमा शाक्य (सुयात कने), उत्कृष्ट मिजं सः आधुनिक म्ये – उत्तम महर्जन (मफूत म्वाये),
उत्कृष्ट मिसा सः आधुनिक म्ये – रत्नशोभा महर्जन (छु जुल रे), उत्कृष्ट मिजं सः उदीयमान आधुनिक म्ये – मुकेश शाक्य (छंगु हे खँ ला खः), उत्कृष्ट मिसा सः उदीयमान आधुनिक म्ये – चण्डीका बाडे (लुमना वल), उत्कृष्ट सः ज्वः म्ये – लसता जोशी, प्रवेशमान शाक्य (छन्त खनेवं), उत्कृष्ट सः आधुनिक ज्वः म्ये – प्रतिमा बज्राचार्य, रत्नसंभव शाक्य (छ वःग खनेवं), उत्कृष्ट मचा म्ये – एरोन महर्जन (यो मां), उत्कृष्ट भजन – तंकराज शाक्य (बुद्ध लुमना वइ), उत्कृष्ट पुचः म्ये – ज्यू ज्यान प्राण (जितेन शाक्य), उत्कृष्ट म्येचाः – मन (हरिराम महर्जन थेच्व), उत्कृष्ट म्ये च्वमि – रामेश्वर मिश्रण श्रेष्ठ (ल्वहं खः कि व), उत्कृष्ट संगीत – राजकुमार मानन्धर (हर्कनारां साहु), उत्कृष्ट संगीत आधुनिक –भुवन महर्जन (यो मां), उत्कृष्ट संगीत संयोजन – जिवित जल्मि (छलयाना जुसां ज्यु), उत्कृष्ट संगीत संयोजन आधुनिक म्ये – यल्लो अर्बिट (ओ मैंचा) त्याःगु खः ।
संकिपाः अवार्डय् धोषक पाखें उत्कृष्ट मिजं कलाकार मू भुमिकाय् – किशोर चिपालु, उत्कृष्ट मिसा कलाकार सह भुमिकाय्, ‘पल्पसा डंगोल’, उत्कृष्ट कलाकार खल भुमिकाय् ‘राजेन्द्र मान शाक्य’, उत्कृष्ट उदीयमान मिसा कलाकार अंजली शाक्य’, उत्कृष्ट निर्देशक ‘अमृतचन्द्र श्रेष्ठ’ व उत्कृष्ट संकिपा त्याकुगु दु । जामनः गुभाजु पाखें उत्कृष्ट स्क्रीनप्ले ‘सुशिल राजोपाध्याय’ व उत्कृष्ट छायाँकन ‘भवानि शिलाकारं’ त्याकुगु खः । अथेहे उत्कृष्ट कोरियोग्राफी ‘निशिला शाक्य’ व ओरिजिनल साउण्ड ट्राय्क ‘मायाजालं’ आसकुति पाखें त्याकुगु खः । उत्कृष्ट मिसा कलाकार मू भुमिकाय् अन्नु महर्जन (बसन्त ऋतु), उत्कृष्ट मिजं कलाकार सह भुमिकाय् पूर्णकाजी ज्यापू (हिसिमति), उत्कृष्ट सम्पादन मनोजरत्न शाही (वायादुने जाकि दु) व उत्कृष्ट संवाद यादव दास भोछिभोय लमि पाखें त्याकुगु खः ।
म्यूजिक भिडियो पाखे उत्कृष्ट मिजं मोडल किशोर चिपालु (छन्त जिगु माया मदुला), उत्कृष्ट मिसा मोडल रोजिना सुवाल (गन वन) , उत्कृष्ट उदीयमान मिजं मोडल अमोघवीर बज्राचार्य (अप्सरा थें च्वं), उत्कृष्ट उदीयमान मिसा मोडल नेन्सी महर्जन (छन्त नापलाये सातकि), उत्कृष्ट क्यामरा पर्सन म्यूजिक भिडियो आभेष बज्राचार्य (कुचुकुचु मिं), उत्कृष्ट सम्पादन म्यूजिक भिडियो बिजु कर्माचार्य (यो मां), उत्कृष्ट कोरियोग्राफर आराध्यालक्ष्मी खड्गी (जमाना मभिं), उत्कृष्ट मेकअप उमिसा पाण्डे (छंगु लँ), उत्कृष्ट भेषभुषा (छं न्हिला दः) उत्कृष्ट राष्ट्रिय भाव, धार्मिक भाव म्यूजिक भिडियो – दुःख दुःख (मिनर्वादेवी शाक्य बज्राचार्य), उत्कृष्ट पर्फोमिंग आर्टिष्ट मृगनयनी (न्हूपलाः) उत्कृष्ट निर्देशक विश्वास बज्राचार्य (पियाच्वने), उत्कृष्ट म्यूजिक भिडियो छन्त जिगु माया मदुला (धर्म महर्जन) त्याःगु दु ।
विराजकाजी राजोपाध्यायं संचालन याःगु ज्याझ्वलय् सुष्मा महर्जननं ज्याझ्वः संचालन याःगु खः । ज्याझ्वःयात लसकुस यायेगु झ्वलय् पेजथ्री अवार्डया संयोजक दर्शनवीर शाक्यं थुगु अवार्डं मनोरंजन ख्यलय् हयाच्वंगु ह्युपाःया बार खँ कुलादिगु खः । ईलोहं प्रकाशनया प्रबन्ध निर्देशक नरेशवीर शाक्यं ज्याझ्वलय् ग्वाहलि यानाच्वंपिंत सुभाय् देछानादीगु खः ।
सेभन वण्डर्स ब्याण्डपाखें गोल्डेन भ्वाइस अफ नेपाल प्रेम ध्वज प्रधान व स्वयंम्भुराज शाक्ययात श्रद्धाञ्जलि देछाःसें वयेकःपिनिगु म्येया म्याशअप प्रस्तुयाःगु खः । इमर्ज ब्याण्ड पाखें नं अतिकं हे लोकं ह्वाःगु म्ये मैंचा म्ये हाःगु खः सा लुँझ्या कलाकुञ्ज पाखें ख्यालि जुजु मदनकृष्ण श्रेष्ठया निंति बिशेष देछा नं न्ह्यब्वःगु खः । यो मदन दाइ बोलया म्ये म्ये च्वमि आनन्द बज्राचार्यया च्वसाय् निशा देसार व दिपा महर्जनं हालातःगु म्येय् मदनकृष्णया गेटअपय् प्रस्तुतयाःगु खः ।
ज्याझ्वःलय् बहुप्रतिक्षित एनिमेशन संकिपा संयुक्त श्रेष्ठया लाखे संकिपाया म्ये छपू नं प्रिमियर याःगु खः । अथे हे ख्यालि जुजु मदन कृष्ण लिसें गायिका सरिता शाही व रोजी श्रेष्ठया पर्फोमेन्सं सकल दर्शकया नुगः त्याकुखः ।
ज्याझ्वलय् मेयर विद्यासुन्दर शाक्यं ख्यालि जुजु मदनकृष्ण श्रेष्ठया प्रसंशा याःसें २२ सालय् उगु ईया सरकारं नेपालभाषाय् तःगु बन्देजयात लुमंकुसें थःगु कार्यकालय् दक्व स्कुलय् स्थानीयभाषा अनिवार्य यानागु खँ कुलादिल । ख्यालिजुजु मदनकृष्ण श्रेष्ठयात ईलोहं प्रकाशनया संरक्षक धर्मवीर शाक्यं दोसल्ला न्ययेका सम्मान यानादीगु खःसा मेयर विद्यासुन्दर शाक्यं लाइफटाइम सम्मान पत्र लः ल्हानादीगु खः ।
