स्थानीय निर्वाचन न्ह्यां न्ह्यां वयाच्वंलिसे न्हिं न्हिं न्हू न्हूपिं मनूत मेयर जुइगु आकांक्षा तयाः सामाजिक संजालय् बयबय् जुयाच्वंगु दु । तर नं समाज निर्माण सेवाय् गनं छुं अनुभव मदुपिं नं बय्बय् जुइगु कारणं थुकथंया अभियान हे न्ह्यानाच्वंगु थें खने दु ।
देय् सघीय राज्य प्रणालिइ वने धुंकाः नं येँय् धाःसा गैर स्वनिगः वासीतय्सं नं उम्मेदवारी कथं सामाजिक संजालय् घोषणा यानाच्वनिं । गैर स्वनिगः बासितय्सं थथे याना जुसां नं यक्व हे स्वनिगःवासीतय्सं धाःसा थज्योगु खँयात नं बय्बय् यानां सेयर लाइक यानाच्वनिं । न्ह्याम्ह मनू जुसां वा मेमेगु छुं लजगा यानाच्वंपिं जुसां मेयर थें जाःगु पदय् दने मफइगु मखु तर नं इमिगु थुकथंया प्रशासनिक ज्या वा स्थानीय श्रोत साधनया परिचालनाय् गुलि तक्कया अनुभव दु वा योजना दु धकाः गुब्लें बिचाः मयाः ।
थौं स्थानीय सरकारं स्थानीय भाय् संरक्षण यायेमाः धकाः संविधानया धारा अनुरूप येँ देय् म्हसीके पाठ्यक्रम सफू तयार यानां हे लाःगू याःगु अवस्थाय् तकं नं स्वनिगःवासीत वाध्यात्यमक रूपं तायेकाच्वंगु दु । स्वनिगःयात म्हसीके माः धैगु पाठय्क्रम येँ मनपां विकास यातं आपा सिके कृतज्ञ भाव लुइके थाकु तिनिं । स्वनिगःया अधिकांश धैथे सांस्कृतिक एवं पुरातात्विक संरचना थौंया स्थानीय सरकारं पुनरनिर्माण यानाच्वंगु अवस्था दु । म्हिगः थुपिं हे एजेण्डा नेवाः एवं स्वनिगःया नेवाःतय्गु जुयाच्वंगु खः । नेपाल संवत् राष्ट्रिय संवत्, नेवाः भाय्यात मान्यता बिइगु फुक्कं नेवाः आन्दोलनय् थ्वःगु नारा खः । स्थानीय सरकारं थुपिं नारायात व्यवहारय् हिले धुंकाः अले सम्पदाया पुनर निर्माण याये धुंकाः नं झीत वाः मचाः । हावादारी खँ ल्हाना प्याखनय् थें थथे याये अथे याये धकाः न्ववाइपिं मनूत प्रति झीगु झुकाव जुयाच्वंगु खँ वाः चायेके माः ।
थौंया स्थानीय सरकारया नेतृत्व नं सदां ल्यनाच्वनिगु मखु । न्हूगु ह्युपाः वा निरन्तरता केवल छुं निश्चित ईया निंतिं खः । स्थानीय विकासया निंतिं दकलय् सशक्त धार धैगु अर्थ व रोजगार खः । स्थानीय तवरं रोजगार उत्पन्न यायेगु ज्या थुगु स्थानीय सरकारं याःगु दु । स्थानीय पाठ्यक्रम ब्वंकेगु निंतिं १७२ म्ह शिक्षण सहायकया दरबन्दी बिइगु धैगु चिधंगु खँ मखु । थुगु खँयात वाःचायेके मेगु थज्याःगु हे योजना अन्तर्गत रोजगारीया दरबन्दी हे बिइफइगु योजना नं झीके दयेमाः ।
गुलिं खँ झीसं सतहीरूपय् स्वयाच्वनिं । गुलिं झी मेमेपिनिगु प्रभावय् लानाच्वनिं । सदां छम्ह हे मनूया सरोकारय् झी न्ह्यां नं वने फइ मखु तर झीसं सुयातं नं समर्थन यायेगु वा मयायेगु धैगु खँय् दुग्यंक वाः चायेके माः । फेसबुक वा सामाजिक संजालय् बय्बय् जुयाः येँया मेयर जुइ धकाः बक्तव्य बिइपिं मनूतय्सं थःम्हं यानागु ज्याया अनुभव ब्वये फयेमाः ।
झीसं नं येँया मेयर जुइ धकाः वइपिं मनूतय्त न्ह्यसः न्यनेत लिफः स्वयाच्वने मज्यु । येँया मेयर धैगु छुं संस्थाया नायो जुइगु थें मखु । झी येँमितय् हामा जुइगु बिषय खः । झीगु हामा गज्योम्ह जुइ माः धकाः निर्णय यायेगु अधिकार झीगु हे ल्हातय् वयाच्वंगु दु ।
