यल महानगरपालिका १६ वडां यलया नागबहाया इलाननिइ मिसातय्सं उत्पादिनयाःगु सामग्रीया प्रदर्शनी व बिक्री वितरणया कथं ‘उद्यमी महिला मेला २०७८’ थौं निसें न्ह्यायेत्यंगु दु ।
‘महिला सशक्तिकरणाको आधार, उद्यमशीलता र रोजगार’ नारा ज्वना फागुन २७ गते शुक्रबार निसें स्वन्हुन्यंक न्ह्याये त्यंगु दु । थुगु मेलाय् मिसापिं उद्यमिपिंसं उत्पादिन याःगु वस्तुया आवश्यक प्रचारप्रसार यासें महिला उद्यमशीलताया विकास यायेगु हे मू उद्देश्य खः धकाः यल १६ वडा अध्यक्ष निर्मलरत्न शाक्यं धयादीगु दु ।
मेलाया मेगु आकर्षण कथं ललितपुर उद्योग वाणिज्य संघ पाखें ‘मेड इन ललितपुर’या अवधारणा कथं विशेष पेभीलोन नं प्रदर्शन जुइगु व थी थी कथंया नसाज्वलंया स्टल लिसें सांगितिक ज्याझ्वः नं जुइ ।
ज्याझ्वय् महिला उद्यमि कथं फेशन डिजाइनया ज्या सयेकुपिंसं थी थी वसःया नमुना न्ह्यब्वसें फेशन शो याइगु नं ग्वसाः दु ।
सकलसित थुगु मेलाय् ब्वति कायेत यल १६ वडा अध्यक्ष निर्मलरत्न शाक्यं निमन्त्रणा नं बियादिगु दु ।
