नारी दिवसया दिन लाका निर्देशक सुरेन्द्र तुलाधरं थः म्ह्याय् इभेन्जलीना तुलाधरया न्हूगु म्युजिक भिडियोया प्रिमियर सिडिसि सिनेमाज्य् याःगु दु । स्वकुमियात सम्बोधन याःसें निर्देशक तुलाधरं थुगु म्ये थः म्ह्याय्यात देछाना धकाः कंगु दु । स्वर सम्राट नारायण गोपालया म्ये एउटा मान्छेको मायाले या कभर भर्सन दयेका थुगु म्ये प्रिमियर याःगु खः । म्येया मोडल कथं थुकी संगम सागर शाक्य व इभेन्जलिना तुलाधरया जोडी दु ।
निर्देशक तुलाधरं थः म्ह्याय्या निंतिं थुगु म्ये दयेकाःगु जक मखुसे स्वर सम्राट नारायण गोपालया म्ये नं लुमन्ति कथं ल्यनाच्वनेमा धैगु आशय प्वंकुगु खः । ज्याझ्वलय् म्यूजिक भिडियोलय् ग्वाहलि याःपिन्त नं खादा न्ययेका सम्मान याःगु खः।
मोडल इभेन्जलिनां थः बाः सुरेन्द्र तुलाधर लिसे हे ज्या यायेगु इच्छा दुगु व थुगु खँ कने मफुुसें थः मांया मार्फत थ्यंकागु खँ कंसें सुटिंगया इलय् नं बौम्ह लिसे ग्याग्यां ज्या यायेमाःगु अनुभव कन । अथे हे तुं न्हूम्ह मोडल संगम सागर शाक्यं छम्ह कलाकार जुइत बांलागु म्हगः जक मखु कलाकारया गुण नं दयेमाःगु खँ कनादील ।
