दिवंगत कलाकार प्रेममान चित्रकारया च्वसां थाैं सिबें १८ दँ न्ह्य पिदंगु छपू म्ये खः ” जित स्वया मिखा भाय् याना ” । थुगु म्यय् जुजुकाजि रन्जित व संगीता शाक्यया मिठासं जाःगु सः दुसा म्ये जिवित जल्मिं लसय् हनां संगीत संयाेजन नं यानादीगु खः ।
थुगु हे म्येया म्यूजिक भिडियाे कथं रामकृष्ण खड्गीया निर्देशनय् तयार जूगु खःसा भिडियाेलय् कर्म व शाेभा महर्जनया अभिनय् दु ।
यल वडा ल्याः १६ या वडा अध्यक्ष निर्मलरत्न शाक्य मूपाहाँसुइ न्ह्याःगु पितब्वज्या ज्याझ्वः गिफ्ट नेपालया ग्वसालय् जूगु खः ।ग्वसाखलःया कजि कलाकार व मोडल शोभा महर्जनया सभानायसुइ जुउगु उगु ज्याझ्वः भिक्षु तपस्वीधम्म महास्थविर भन्ते पाखें पवित्रं परित्राण पाठ याना शुरु याःगु खः ।ज्याझ्वलय् निर्देशक रामकृष्ण खडगीं लसकुस यागु खःसा सिने पत्रकार विजयरत्न असंबरें म्येयात कया समिक्षा यागु खः । ज्याझ्वलय् संगीतकार जिवित जल्मी, म्येहालामि जुजुकाजि रन्जित , स्वर्गिय प्रेममान चित्रकारया जहान विद्या चित्रकार, पाहाँ सुरेन्द्र तुलाधर व मूपाहाँ निर्मलरत्न शाक्यपिन्सं स्व.चित्रकार व चित्रकारं च्वयादीगु ” जित स्वया मिखा भाय् याना ” म्येया बारे थःथःगु नुगःखँ तयादीगु खः ।
