ख्यालि जुजु मदनकृष्ण श्रेष्ठया रेकर्डिंग मजूगु नेपालभाषाया छपू लोकंह्वाःगु म्ये ज्वरा ज्वरा पर्सि बिया छं छाय् मसिना.. बोलया म्ये थौं हरिशरण साय्मिया स्टिं«ग्स रेकर्डिंग स्टुडियो, अनामनगरय् जुल ।
निम्ह कलाः दुम्ह मिजंया समस्यायात हास्य रसय् दुंबिंका च्वयातःगु थुगु म्ये खः । थुगु म्येया बिषयलय् ख्यालि जुजु मदनकृष्ण श्रेष्ठ जुं धयादी –‘सन १९९०स् फलोरिडाय् वनागु इलय् गंगा मालाकारयात नापलाना । वय्कलं म्ये छकू हालान्यंका दिल – ज्वरा ज्वरा पर्सि सिनां । थ्व हे छकू म्ये पुरा याना न्हूगु हे खँग्वः तनां छगू बिस्कं हे न्हूगु म्ये दयेका । उकिं थुगु म्येया च्वमि गंगा मालाकार व जि हे जुल ।’
थुगु म्ये न्हापा नं ख्यालि जुजु मदनकृष्ण श्रेष्ठं याकःचा हे हालाच्वंगु खःसा आ न्हूगु एरेन्ज कथं रोजी डंगोल श्रेष्ठ व सरीता शाही नं थुकी सः बियाच्वंगु दु ।
म्येया संगीत संयोजक जीवित जल्मिं थुगु म्ये पारम्परिक नेवाः म्ये शैली दु धाःसें अझ नं ख्यालि जुजु मदनकृष्ण श्रेष्ठलिसे न्यागू प्रोजेक्ट ल्यंदनि धकाः कनादिगु दु ।
