स्वकुमिपिनिगु ल्याः लिसें संकिपाया बजेटयागु तप्यंक स्वापू दु धयागु झी सकसिनं स्यु। नेवाः संकिपा बजाः तब्या मजूगु आःया अवस्थाय् नेवाः समुदायया पाखें असाधारण ग्वाहालि मजूसा निर्मातापिंसं सफलताया सवाः कायेमफइगु निश्चित थें दु। स्वकुमिपिंत हल तक साला हयेगुलि संचार माध्यमया भूमिका दइ। अथेसां नेपालभाषा संकिपायात नेवाः संचार माध्यमं जक हे तिबः बियाच्वंगु दु। थुकिं याना अथे हे चीब्या झीगु बजाः झं चीब्या जुजुं वंगु छगू तसकं म्हाइपुगु तथ्य खः। बजेटया अभावं नेवाः संकिपाया प्राविधिक पक्ष प्रभावित जुयाच्वंगु दुसां बाखँ व अभिनय थें मेमेगु कलात्मक पक्ष पाखें धाःसा झीसं यक्व ज्या याये माःगु खनेदु।
संकिपाया गुण धइगु हलय् स्वयेबहःगु, मिखाः सालिगु दृष्य जक मखु उकि दुनेया सामाग्रीया प्राधान्य नं खः। ३५ दँया ईतिहास दयेधुंका नं नेपालभाषा संकिपा ख्यलय् आः तक गुलि विद्याया संकिपा निर्माण जूगु दु धकाः दुवालाः स्वयेबहः जू। विषयवस्तु पाखें स्वयेगु हे खःसा धार्मिक, लोक बाखँ व समसामयिक मुद्दा पिने वना धाःसा झीसं उलि मालाच्वनागु मदु। ऐतिहासिकता झीगु बल्लागु पक्ष खःसा भविष्यवाद पाखें धाःसा झीगु पलाः न्ह्याःगु मदु। अथे हे, संकिपा निर्माणया झ्वलय् न्हू–न्हूगु प्रयोग न्ह्यात धाःसा जक थुगु ख्यलय् जोखिम कायेगु संस्कार ब्वलनी। जोखिम मकाःसें सकसिनं न्हापानिसें पलाः न्ह्याकाच्वंगु लँय् हे विनगु खःसा व सिर्जनात्मक कला मखुसें शिल्प जक जुयावनी।
च्वय् न्ह्यब्वयागु यक्वथें समस्यात सीमित बजाःया लिच्वः कथं काये ज्युसा स्वनिगः दुने हे नेपालभाषा संकिपाया प्रदर्शन याये मखनिगु धयागु दकले निराशाजकन खँ खः। गुलि संकिपाया यात्रा रजतपट तक मथ्यंसे हे सिधइ। थ्यंसां स्वकुमिपिंसं खँय् व हिन्दी भाय्या संकिपा लिसें तुलना हे जक यायेगु। झीगु थःगु सः झीसं मालेमफू, मालिगु कुतः याइपिंत नं हःपाः मदु। संवेदनशील विषयत कयाः संकिपा दयेकिगु खःसा मनोरंजन ख्यलं नं समाजय् ह्यूपाः हयेफू। उकि स्वकुमिपिनिगु न उलि हे भूमिका दइ। इमिसं मनोरंजन–प्रधान व व्यावसायिक जक मखु, विषय–प्रधान व कलात्मक संकिपायात नं उलि हे संवेदनशीलता व उत्साह लिसें लसकुस यायेगु खःसा संकिपा विद्याय् सकारात्मक ह्यूपाः अवश्य हे वइ।
यक्वथें भाषा ख्यलय् सनाच्वंपिं संकिपा लेखन व अभिनय पाखें नं सक्रिय जूगुलिं नेपालभाषा संकिपाया संवाद दुने भाषा आन्दोलनया गाक्क छाप खनेदु। खय्त ला थुगु बांमलागु खँ मखु। अथेसां थुकिं स्वाभाविक कथं प्रचारवादी लंपू कायेगु खतरा धाःसा दइ। उकिया लिच्वः कथं नेपालभाषा संकिपा दुने आलंकारिक स्वयाः नं संवाद पाखें तप्यंक आभिव्यक्ति बियेगु अप्व खनेदु। उगु प्रभावयात म्हो यानाः वने मफूबलय् संकिपाया कलात्मक पक्षया निंतिं छगू अवगुण सिद्ध जूगु दसु यक्व दु। अथे हे, लैंगिक समानतापाखें मेथाय् स्वया नेपालय् सःस्युपिनिगु अभाव जूगुलिं मनोरंजन ख्यलय् दयाच्वंगु विकृतिया बारे गुलि बहस जुइमाःगु खः उलि मजूनी। उकिया बांमलाःगु प्रभाव नेपालभाषा संकिपा ख्यलय् गाक्क खनेदु। ने सं ११४० या छगू यूट्यूब सर्वेक्षणया लिधंसाय् ८०% नेपालभाषा म्येचा दुने मिसातय्गु ल्युंल्युं वना उत्पींडित यायेगु जयायातः सकारात्मक चित्रण यानातःगु सुप्रिया मानन्धरया छगू शोधपत्रय् उल्लेख दु गुगु थौंया ईलय् गुकथं नं मान्य मदु।
कला धयागु समाजयात स्वयेगु मिखाः खः। उकि सकारात्मक व नकारात्मक निगुलं पक्ष उलाः क्यनाः झीत वैचारिक निकास बियेगु शक्ति दइ। अथे खःसां, गबलय् साःया छ्यंगु व गबलय् शाहवंशया मूलधार विपरित चित्रण धकाः सेन्सर बोर्ड नं नेवाः संकिपा व विषयवस्तुयात दिकीगु यानावःगु दु। गणतान्त्रिक राज्यं अभिव्यक्तिया स्वतन्त्रतायागु आभास अझं नं पूवंक बिये मफूनि। थजाःगु अवस्थाय् न्हूगु बिचाः, ब्यगलं धार बाय् पृथक अभिव्यक्तियात छु हे प्रश्रय दइ धइगु निश्चित मदु। झीगु समाज गुलि प्रगतिशील दु, गुलि मदु धकाः उकिं हे क्यनी। चीब्या बजाः, सीमित प्रचार माध्यम व बजेटया थिथि हाथ्यातय्गु दथुइ नं छु हे नाफाया आस मयासें नेपालभाषा संकिपायातः कलात्मक व समाजय् ह्यूपाः हयेफइगु जक मखुसें, नेपाः देय्या हे प्रतिनिधिमूलक संकिपा जुयेफइगु वातावरणया सिर्जना यायेत संकिपा दयेकिपिं व स्वकुमिपिं निम्हसिन उलि हे संवेदनशील जुयेमागु जिं वाःचायेकाः।
नेपालभाषाया मनाेरंजन ख्यःया यथास्थीति छिं गथे खंका दिया ? न्ह्यसःया लिसः ब्युसें
संयुक्त श्रेष्ठ (निर्माता, निर्देशक, च्वमि)
