नेवाः म्येया मोह विस्कं कथं दु । गैर नेवाः भाषितय्सं नं नेवाः म्ये गाक्कं हालातःगु दु । अझ गैर नेवाः भाषि कथं नालेगु खः सा नेपालय् जक च्वंपिं मखुसे बलिउडय् च्वंपिंसं तकं नं नेपालभाषाया म्ये हालातःगु दु । पेजथ्री अवार्डया निगूगु संस्करणय् न्हापांखुशी गैर नेवाःभाषीं नेवाः म्ये हाःपिन्त अवार्ड नं ब्यूगु खः । पेजथ्री अवार्ड ११३३य् उत्कृष्ट मिसा सः पाखें विजया गिरीया छु धकाः सतेगु छन्त व राजन क्षेत्रीया छं जितः बोलया म्येया निंतिं त्याकुगु खः ।
अथे हे तुं थौंकन्हेया लकसय् धाःसा नेवाःतय्सं नं गैर नेवाः भाय्या म्ये हालाः पिकयाच्वंगु दु । सामाजिक संजालय् स्वयेगु खःसा न्ह्यः सानुबाबु महर्जनं तिम्रो याद बोलया खस भाय्या म्ये पिकागु दु । थुगु म्ये चर्चित पत्रकार दब्बु क्षेत्रीं च्वयाः निर्देशन यागु खः सा संगीत एवं संगीत संयोजन जुगल डंगोलं याःगु खः । सानुबाबुया थ्व सिबें न्ह्यो नं स्वरान्तर नांया म्यचाः पिदने धुंकुगु दु । सानुबाबु महर्जन ‘ब्राइटर तिम्रो सुर मेरो गीत’ ज्याझ्वलय् फाइनलिष्ट नं जुइधुंकुम्ह खः ।
गैर नेवाः म्ये कथं हे नेवाः कलाकारया मन वा मोह हिन्दी म्ये पाखे नं वनाच्वंगु खंके फइ । म्ये च्वमि प्रकाशदीप श्रेष्ठया च्वसां छपू हिन्दी म्ये दिल से दिल बोलया म्येया प्रोमो सामाजिक संजालय् खने दु । थुगु म्ये लोकंह्वाःम्ह संगीतकार निल शाक्यं लसय् हंगु खःसा संगीत संयोजन जिवित जल्मिं याःगु दु सा म्ये मनिषा पोखरेलं हालातःगु दु । प्रकाश दीप नेपालभासाय् जक मखुसे गैर नेवाःभाय् कथं खस नेपालीभाषाया म्येया निंतिं नं तसकं हे नांजाःम्ह म्येच्वमि खः । मुक्ति एण्ड रिभाइभल ब्याण्ड लिसे नं प्रकाश दीपया लोकंह्वाःगु जिउने आश म्ये खःसा गैर नेवाः कलाकारपिन्त नं प्रकाशदीपं नेवाः म्ये हायेकातःगु दु ।
उकथं हे मेम्ह गायक एवं संगीतकार राज शाक्यया च्वसा व संगीतय् तु हि तो है मंजिल मेरे बोलया हिन्दी म्ये रिलिज याःगु दु । असामया म्ये हालामि निर्मली देवी बोरां हाला तःगु खःसा थुगु म्ये ए बि मिडिया पाखें पिदनाच्वंगु दु । थ्व सिबें न्ह्यः नं निर्मलीदेवी बोराया हे सःलय् छपू हिन्दी म्ये नं हायेके धुंकुगु दु ।
