नेपालभाषाया मनोरंजन ख्यः, नेपालभाषा संकिपा ख्यः थौं कन्हे छखे थःगु भाषा, कला, संस्कृति, संस्कारयात म्वाके माः धकाः हालाजुइगु, मेखे करोडौं वंगु बलिउडया भिडियो नाप तुलना यानां म्यूजिक भिडियो, शर्टमूभी दयेकीगु संस्कारया विकाश जुयाः वयाच्वंगु खनेदु । २१औं शताब्दीया थुगु इलय्नं कलाकारयात सितिकं ज्या याकेगु, सितिकं सुटिंग स्पट कायेगु, थःत माःगु फुक्कं हे फ्रि वा सितिकं कायेगु मनोवृति ब्वलंका च्यारिटी शोलय् जक सिमित यानां बलिउड नाप टक्क यानां म्यूजिक भिडियो, भिडियो फिल्म, संकिपा दयेकेगु शतप्रतिशत हे गलत खः । थुकिं याना मनोरंजन ख्यः चायेकं मचायेकं झन झन चिब्या जुजुं वनाच्वंगु दु धाःसां मपाः । योसां मयोसां सिमित व्यक्ति छगू हे प्रकारया बाखं, स्क्रीन प्ले पाखें मनोरंजन कायेमाःगु बाध्यता जुयाच्वंगु दु ।
दक्ष प्राविधिक, शिक्षित निर्देशक, निपूर्ण कलाकार सहभागी यानां निर्माताया लगानी सितिं मवंक तःधंगु पर्दाय बाँलाःगु संकिपाः दयेके माःगु थौंया चुनौति खः । मखुसा नेपाःउडय् म्यूजिक भिडिया, सर्टमूभी, भिडियो संकिपाः दयेकेगुयात स्थानीय प्रशासन, नेवाः संघ संस्था व सरोकारवालापिन्सं प्रतिवन्ध याःसां बांलाइ । नेपालभाषाया तःधंगु पर्दाया संकिपाः थौंया आवश्यकता खः । ध्यबा दयाःनं , ध्याबायात सहि सदुपयोगया मार्गदर्शन बिइ मफूपिं संकिपाःकःमिपिन्सं थःपिनिगु क्षणिक स्वार्थ व लोकप्रियताया निंतिं प्रोड्युसरतय्त म्यूजिक भिडियो, भिडियो फिल्म, शर्टमूभी जक अल्झे याना तःधंगु पर्दाया संकिपाः(सेलुलोइड) यात म्हो प्राथमिकता बिइगु मनोवृतिं मनोरंजन ख्यः चिब्याः जुयाः च्वंगु थौंया वास्तविकता खः ।
सु सिनियर, सु जुनियर, ई नापं नेपालभाषाया ख्यः (संकिपा)यात निर्देशन बिषय ब्वनावःपिं डिग्री प्राप्त निर्देशकत न्ह्योने सकृय जुयाः वयेमाल । नेपाया खस भाय्या प्याखँ थें नेपालभाषाया संकिपाःनं निर्माण जुइमाल, सिलु व राजमति थें हलया पर्दाय् प्रदर्शन यायेगु तकया प्रवन्ध जुल धाःसा जक नेपालभाषाया मनोरंजन ख्यः यथास्थीतिं च्वन्ह्याइ ।
नेपालभाषाया मनाेरंजन ख्यःया यथास्थीति छिं गथे खंका दिया ? न्ह्यसःया लिसः ब्युसें राजु महर्जन जुजु (कलाकार)
