नेपालभासा ख्यःया यथास्थीति धायेगु खःसा थन फुक्कं प्याखं म्हितेत रहर पुरा याःवःगु थें जक हे ताः । म्ये हालिपिं जुइमा वा प्याखँ म्हितिपिं कलाकार जुइमा व फुक्कं हे थः हे म्ये हालाः थः हे कलाकार जुयाः म्हिताच्वंगु खना । दक्वं थथे ला मखु तर जिगु सन्दर्भय् आपा हे कलाकार अथे खने दु । थ्व जिगु अनुभव जक खः । उकिं जितः जिं हे म्हितागु दक्वं म्युजिक भिडियो वा प्याखँ नं जितः लुधं धकाः धाये थाकु । थन झी मनोरंजन क्षत्रय् हे जुयाः म्वाये धैगु स्थीति नं मदुनी । थ्व झीगु भचा खायुगु यथार्थ खः ।
जितः ताः कि म्येहालिपिं लिसें कलाकार पिंसं नं यक्व हे मेहनत यायेमाःगु अवस्था दु सा झीसं ज्या यानाच्वनागु टेक्निकल टिम नं तसकं हे क्वातुइ माः । क्रियटिभ टिम लिसें कन्सेप्टय् झी कम्प्रोमाइज याना वने मज्यु थें ताः । छु याःसां प्याखँ बांलाइ धैगु खँ वाःचायेके माः अले थुकी छुं कथंया कम्प्रोमाइज याये मज्यु ।
कम्प्रोमाइज मयासे नं प्याखँ दयेकुगुया लिच्वः बांलानां वनाच्वंगु दु । गुलिं नेवाः प्याखँ युट्युबय् सब टाइटल तयाःतःगु अवस्थाय् यक्व हे गैर नेवाःतय्सं नं स्वयाच्वंगु दुसा न्हू न्हू कथंया म्येया भ्यूज नं थौं कन्हे लाखौंया हाराहारी स्वयाच्वंपिं दु । मुख्यत नेवाः प्याखँ वा म्युजिक भिडियो दयेकेत प्लानिंग लिसें ई मगाः थें ता । भचा गम्भीर जुयाः प्याखँ दयेकुसा थुकीया लिच्वः सुखद हे जू ।
नेपालभाषाया मनाेरंजन ख्यःया यथास्थीति छिं गथे खंका दिया ? न्ह्यसःया लिसः ब्युसें रोजिना सुवाल (कलाकार)
