नेपालभाषा ख्यः छगू आकर्षणया ख्यः खः । सकलें थुगु ख्यलय् आकर्षित जुयाः च्वं । थी थी अवसर नं थुगु ख्यलय् उपलब्ध जुयाःच्वं तर नं अवसरयात सदुपयोग याये मफूत धाःसा नं हाकनं मेगु हे समस्या ब्वलनिगु अवस्था दु । थज्योगु हे छगू अवसरया विश्लेषण यायेमाःगु दु मिसा च्वमिपिनिगु उपन्यासया धेंधेंबल्लाकासा । आख्यानकार मथुरा साय्मिया इनापय् छपुचः मय्जु च्वमिपिंत उपन्यास च्वयेगु निंतिं आह्वान याःगु जुल । उकि मध्य झिंनिम्ह मय्जुपिंसं ला उपन्यास च्वया पिकाःगु नं जुल । थुकी छुं कथंया समस्याया खँ खने मन्त । नेपालभासया धुकू जाःगु हे जुल। आख्यानकार एवं वरिष्ठ साहित्यकार मथुरा साय्मियात सकस्यां भिंतुने हे माः । वय्कया हःपालं छक्वलं न्हूपिं झिम्ह उपन्यासकार उत्पादन जुल । ज्याखँयात सकारात्मकरूपं स्वःसां थुकीया असर धाःसा दीर्घकालीन रूपं गज्योगु लाइ धकाः नं छक्व बिचाःयाये माःगु अवस्था दु ।
नेपालभाषा ख्यलय् शशिकला मानन्धर न्हापांम्ह मिसा उपन्यासकार धकाः इतिहासय् नां दुसां मिसा साहित्यकारपिनिगु निंतिं छगू प्रेरणाया श्रोत नं खः । तर थौंया स्थीतिइ प्रेरणाया श्रोत जक दयां मगाः थुकीयात अर्थया श्रोत लिसे नं स्वाकाः स्वयेमाः । अवश्यनं नेपालभासा ख्यलय् छक्वलं झिंनिम्ह मिसा उपन्यासकारया उपन्यास पिदन । छगू संस्थां ग्वसाः ग्वयेमाःगु ज्याखँयात छम्ह व्यक्तिं यात धकाः नं तसकं हे बयबय् जूल । संस्थागत रूपं आवद्ध मनूतय्सं तकं थुगु खँयात स्वीकार यात । तर थुगु ज्याखँ संस्थागत मजुइवं मेगु छगू तःधंगु समस्या थन ब्वलनीगु खने दु । छाय्धाःसां छक्वलं १२गू उपन्यासया बजार गुकथं व्यवस्थापन यायेगु धैगु खँय् झीगु नेपालभासा ख्यःया दुर्दर्शीता खने मदुनी ।
सय पन्नाया न्यासःपा सफू पिकायेगु इलय् थ्यंमथ्यं ५०,००० हजारतकाया खर्च दु । थ्व खँ मेगु हे खःकी ५०,००० तकाया खर्च गुगुकथं व्यवस्थापन जुइ वा आपूर्ति जुइ । थुगु हे रकम आपा थें च्वंसा औसत ४०,००० तकाया अनुमान याये अले छक्वलं पिदंगु १२ गू उपन्यासया अर्थतन्त्र बारे नं छक्व स्वये । औसतय् ५ लाख तकाःया अर्थतन्त्र नेपालभासाया मिसा उपन्यासकारपिंसं चलायेमान याःगु खने दु । तर खँ वइ की नेपालभासा ख्यलय् छक्वलं ५ लाख तकाः प्वंकुगुया लिच्वः गथे जुइ । झीसं थ्व ५ लाखया १० लाख यायेगु योजनाय् छाय् विचार यायेमफूगु धैगु खँय् आः वाःचायेकेमाःगु दु ।
उपन्यास च्वयेत हःपाः ब्यूगु तसकं हे च्वछाय् बहःजू तर आः पिदंगु उपन्यासया व्यवस्थापन गुगु कथं यायेगु धैगु खँय् झी सचेत जुइ माः । संघ संस्था वा नेवाः साहित्यकारपिंसं वाह वाह जक धकाः नेपालभासाया साहित्य ख्यः न्ह्यां वनिं मखु । साहित्य ख्यःयात न्ह्याकेगु निंतिं अर्थया नं उतिकं हे आवश्यकता दु । हःपाः बिइ धकाः झिंनिम्ह उपन्यासकार मय्जुपिंनिगु उपन्यास न्यायेमाः वा मिइ माः धकाः झीगु योजना खने मदुनी । थुकीया लिच्वः थ्व नं जुइफु की कन्हे थुपिं मय्जुपिंसं निक्वःगु उपन्यास मच्वयेफु । उकिं आः वाचायेके माःकी भाषणं जक नं साहित्यया विकास जुइ मखु । मुख्य थौंया हाथ्याः धैगु हे सफूया वितरण एवं बजार हे खः । उकिं मिसा उपन्यासकारपिंत हःपाः बिइगु ज्या क्वचाःगु मदुनी । नेपालभासाया संघसंस्थां थ्व झिंनिगु उपन्यासया बजार व्यवस्थापन यायेगु जिम्मा नं काये फयेकेमाः ।
