थ्यंमथ्यं निगु दशक लिपा किपूलिइ आधुनिक सुविधा सहितया छगू स्यल्लागु हल किर्तिपूर सिनेप्लेक्स संचालन जूगु दु । २८० सीट दुगु थुगु हल कोरोनाया कारणं संचालनय् वयेत लिबानाच्वंगु खःसां स्वन्तिया लकसय् संचालन जूगु दु । स्वनिगलय् धमाधम हल पाः जुयाः वनाच्वंगु इलय् किपू पांगाय् छगू न्हूगु पहल जूगु दु । थौंया स्थीतिइ येँ च्वंगु विश्वज्योति सिनेमा हल, रंजना, जय नेपाल, कुमारी लिसें गंगा हल तकं बन्द जुइधुंकूगु अवस्थाय् प्याखँ स्वयेत आः अष्टनारायण हल छगू हे जक ल्यनाच्वंगु अवस्था दु । कोरोनाया कारण हल फुक्कं बन्द जुयाः मनोरंजनया संसार हे शून्य जुयाच्वंगु इलय् छगू न्हूगु हल् चायेवं मनोरंजन ख्यलय् विशेषयाना नेपालभासा ख्यलय् छगू तरंग नं पिदंगु दु।
नेवाः बस्ती दुने छगू सिनेमा हल चायेवं नेवाः प्याखँ निर्माण यानाच्वंपिं छुं कथं उत्साहित जुयाच्वंगु दुसा किर्तिपूर सिनेप्लेक्सं हल संचालनय् वये धुंकाः छुं छुं नेवाः प्याखँ विशेष रूपं प्रदर्शन यायेवं आः नेवाः प्याखँ क्यनेगु व स्वयेगु निंतिं छगू अवसर लिसें वातावरण नं तयार जुयाच्वंगु दु । थनया संचालक समितियाके नेवाः नुगः दुगु कारण नं नेवाः प्याखँयात प्रदर्शन यायेत अःपुइगु खने दु । थ्व हे झ्वलय् नेपालभासाया हिसिमति व बसन्तऋतु क्यने धुंकुगु दुसा व आसकुतिया प्रदर्शन यायेत तयारी यानाच्वंगु दु । अथे हे घोषक नं क्यनेगु ग्वसाः जुयाच्वंगु दु ।
सिनेमा हलय् प्याखँ क्यनेत सुविधा दुसां थ्व लिसें मेमेगु समस्या नं दु । दकलय् न्हापां हलय् छुं नं प्याखँ क्यनेत प्याखँ सेन्सर यायेमा । थुकीया निंतिं चलचित्र विकास बोर्डय् दर्ता यायेमाः । सेन्सरया निंतिं छुं कथंया दस्तुर नं पुले माः । उकथं हे प्याखँया प्रचार मयाइगु रोगं नेवाः प्याखँया निर्माता ग्रसित जुयाच्वंगु थौंया नेपालभासा सिनेमाया अवस्था दु । लाखौं फुकाः दयेकीगु प्याखँयात छुं हजार तकाः खर्च नं याये माः धैगु मानसिकता विकास जुइमाःगु दु । थुकीया निंतिं पत्रपत्रिकाय् विज्ञापन याना जक मखुसे पोष्टर व पम्प्लेटिंग अले किर्तिपूरपाखे विशेषरूपं माइकिंग यायेगु नं असरदार जू धयागु खँ दु ।
नेवाः प्याखँ ख्यःया नितिं थुगु हलं यक्व हे अवसर चूलाका ब्यूगु दु । नेवाः संकिपा नखः वा छं नं म्युजिक भिडियो प्रिमियर लिसें नेवाः प्याखँया प्रमोशन यायेत थुगु हलयात छगू बांलागु हे अवसर कथं नाले माः । तर थुकीया निति निगुलिं पक्ष, हल लिसें प्याखँ निर्माता दथुइ बांलागु सहलह जुइमाः । किपूलिइ प्याखँ स्वयाः किपूया थीथी रेष्टुरेन्टयया सवाः कायेफइगु अवस्था नं दु । मूल रूपं थुगु हल नेवाः नुगलं जायाच्वंगु हलया रूपय् नालेमाः अले अवसर नं थ्व हे कथं दयावन धाःसा नेवाः मनोरंजन ख्यःयात छगू स्यल्लागु दबू लुगु दु धकाः झी विश्वस्त जुइ फइ ।
