चिराग फिल्मस्या ब्यानरय् राेशन बज्राचार्य व प्रेमा शाक्यया निर्माणय् अले अमृतचन्द्र श्रेष्ठया निर्देशनय् तयार जूगु बुद्धकालीन एतिहासिक नेपालभाषाया संकिपा घाेषकया न्हापांगु शाे अष्टनारायण हल, बालाजु बाइपासय् हाउस फुल जुल ।
नेपालभासाया संकिपा थुकथं हाउसफुल रूपं संचालन जूगु खँय् संकिपाया निर्देशक अमृतचन्द्र श्रेष्ठं लसता प्वंकुसें थःम्हं बिचाः हे मयानागु कथंया दर्शक हलय् थ्यंगु खँ प्रतिकृया बियादिल । शनिवारया दिं व अनेकाैं नेपालभासाया थी थी ज्याझ्वः ल्वानाच्वंगु लिसें स्वन्तिया नखत्या पाः लानाच्वंगु व आनन्दकुति विहारय् नं कथिन दान जुयाच्वंगुलिं हलय् मनू हे मवइला धैथे ग्याचिकु लानाच्वंगु जुयाच्वन तर थुगु प्याखँ उल्लेखनीय रूपं दर्शक सहभागी जूगु तसकं हे सन्ताेषजनक जू धकाः निर्देशक अमृतचन्द्र श्रेष्ठ कनादील ।
प्याखँया निर्माता मध्य छम्ह प्रेमा शाक्यं स्वकुमि तसकं हे उत्साहित जुयाच्वंगु खँ कंसें प्याखँ स्वःवपिंसं थाय्थासय् मेमेगु शाे नं तयेमाःल धकाः दबाब बियाच्वंगु खँ कंगु दु ।
घाेषकया मेम्ह निर्माता राेशन बज्राचार्ययं थःम्हं अनुमान याना कथं स्वकुमि वःगु खँ कंगु दु । आैसतय् छगू शाेलय् ३५० मनू दइगु साेच तःगु खःसां थ्यंमथ्यं १५०० मनुखं प्याखँ स्वःगु खनेदत धकाः जानकारी ब्यूगु दु ।
बुद्धकालीन प्याखं धकाः स्वःबिज्याम्ह विमलाे भन्तेनं थुगु प्याखँ बाैद्धकालीन प्याखँ मध्य छगू उत्कृष्ट प्याखँ जुइत ताः लाःगु प्याखँ खः धकाः प्रतिकृया बियादीगु दुसा विहारय् थःम्हं घाेषकया बाखं कनेबलय् थें हुबहु मिले जुइक प्याखनय् क्यनातःगु दु धकाः धयादीगु दु ।
थुगु प्याखँ दिवंगत धर्मरत्न शाक्यं च्वयादीगु खःसा प्याखँया पटकथा दर्शनवीर शाक्यं च्वःगु खः । प्याखनय् कलाकार कथं राजेन्द्रमान शाक्य, प्रेमा शाक्य, पल्पसा डंगाेल, किशाेर चिपालु, अंजली शाक्य, अन्नपूर्णेश्वरी श्रेष्ठ, राजु महजर्न, उदेन न्हूसाय्मि, भिमसेन रिसाल इत्यादि कलाकार दु ।
